तीनकुने/ताइँनाइ
नेवाः भजन पद्धती छ्यलीगु थीथी सहयोगी बाजं मध्यय् तिनकुने नं छगू प्रकारया सहायक बाजं खः । थ्व बाजं ३/४ इञ्च वा १ (इञ्च) पुगु डन्डीयात स्वकुंलाक्क (त्रिकोणत्मक आकारय्‌) चाःतुइकाः च्वय्या (शीर्ष) भतिचा गोलो यानाः उकी खिपतं चिनाः छपा ल्हातं यख्खानाः मेगु ल्हातं ७/८ इञ्च हाकःगु नँयागु हे दन्दिं त्रिकोणया क्वय्या भागय् दथुइ थाइगु खः । थुकिं पिज्वइगु सः (शब्द) ताइँताइँ/ नाइँनाइँ जूगुलिं थ्व बाजंयात ताइँनाइँ व स्वकुंलाःगु जूगुलिं तिनकुने बाय् स्वकुंलाः नं धाइ ।

संगीतकःमि तीर्थ मालीया जन्म ने.सं. १०८६ कौलाथ्वः दसमि, आइतबारखुन्हु अबु कृष्णबहादुर माली व मां धनकेशरी मालीया कोखं चन्द्रागिरी नपाया तीन थानाय्‌ जूगु खः । वय्‌कः नेवाः राष्ट्रिय म्ये ‘धुन दनेधुन संन्ह्यलं झी’ या संगीतकार खः । वय्‌कःया याकः संगीतय्‌ म्येचाः ‘छतिकि’ व ‘छ गजल जि गजल’ पिदनेधुंकूगु दु तीर्थ माली तीर्थ माली  ।

तुतः वा सिलः संस्कृत शब्द स्तोत्र, तोत्र पाखें अपभ्रंश जुयाः नेपालभाषाय्‌ वःगु खः । थ्व निगुलिं शब्दया अर्थ छगू हे खः ।
मभिं महिताःपिं दुष्ट दैत्य संहार यानाः भक्तजनपिंत करुणा सुदृष्टि तयाः रक्षा, उद्धार याइम्ह धकाः थीथी देवदेवीया रुप, गुण, सामथ्र्य, वर्णन यानातःगु छन्दोवद्ध पद्ययात हे स्तोत्र, स्तुति धाइगु खः । थुकियात हे नेपालभाषाय्‌ तुतः/सिलः धाइ । अप्वः थें तुतः सिलः काव्यात्मक खःसां गद्यात्मक नं दु ।
तुतः वा सिलःयात थीथी बाजं थानाः थीथी ताल व लसय्‌ हनाः भजनकथं नं हालेगु याः ।

स्नेहना फिल्म्सपाखें ने.सं.११२८ दँय्‌ निर्माण जूगु थुगु संकिपाया निर्माता श्यामलक्ष्मी ताम्राकार व सिरिना ताम्राकार खःसा निर्देशक रोशन नबीन ताम्राकार खः । थुकी सुलोचना मानन्धरया बाखं, कीर्ति श्यामसुन्दर जोशीया संगीत, अले छायाँकार देवआनन्द शिल्पकार खः । संकिपाय्‌ कलाकारकथं सुशील राजोपाध्याय, मञ्जु श्रेष्ठ, सिन्तिया सेन ताम्राकार व यज्ञमान शाक्य दुथ्याः । थुकी मांअबुपिन्सं थःगु सहारा छु खः धइगु सीकेमाः धैगु सन्देश बियाच्वंगु दु ।

ने.सं. ११३९ दँय्‌ निर्माण जूगु संकिपाया निर्माता अनु श्रेष्ठ व मनिष कुमार श्रेष्ठ अले बाखं व निर्देशक आर्यम नकःमि खः । थुकिया छायाँकार राजु कार्की खःसा थुकी कलाकारकथं मनिष कुमार श्रेष्ठ, अर्णेश्वरी शिल्पकार, सबिन शाक्य, साक्षी मुल्मी, मदनकृष्ण श्रेष्ठ, राजेन्द्र खडगी, हिसिला महर्जन, मणिराज लवटपिं दुथ्याः । संकिपाय्‌ थःगु जग्गा जमिन धैगु थःगु मातृभूमि खः, थुकियात संरक्षण याना तयेमाः धैगु सन्देश दु ।

साम अडियो भिडियो प्रोडक्शनपाखें ने.सं. ११३२ दँय्‌ निर्माण जूगु थुगु संकिपाया निर्माता जोग्यलाल ताम्राकार अले बाखं व निर्देशक बीरेन ताम्राकार खः । थुकिया संगीतकार कृति व विजय खःसा छायाँकार शंकर महर्जन खः । थुकी कलाकारकथं धिरेन शाक्य, हिसिला महर्जन, भिन्तुना जोशी, विनोद श्रेष्ठ , लक्ष्मी गिरीपिं दुथ्याः । संकिपाय्‌ त्याग हे जीवनया तःधंगु तपस्या खः धकाः क्यनातःगु दु ।

त्वालं त्वालय् तइगु स्वापूया छगू बिधि । धुँन्या मदुगु त्वालय् झिंनिदँय् छकः वःलाः सपना लाकाः धिमे व प्वंगा स्यनी । स्यनेगु ज्या क्वचायेकाः पिदनाः पुजा सिधल धायेव त्वाःब्याः वनेगु याइ । दक्वं त्वालय् वनी मखु । स्वापू दुदुथाय् जक वनी । त्वाःब्याः वनीबलय् द्यःयागु ख्वाःपाः च्वयातःगु त्यपय् थ्वँ तयाः निम्हसिनं कुबियाः त्वाः खलःपिं दक्वं वनी । तपाः भ्यगतय् समय् तयाः उकी द्यःने मुस्या पालु नं तया यंकेगु याइ । त्वाःब्याः वंपिन्त भ्वय् बाय् समय् नकाहयेगु याइ ।

महालक्ष्मी मुभि म्याक्सपाखें ने.सं. ११३३ दँय्‌ निर्माण जूगु थुगु संकिपाया निर्माता विनोद ताम्राकार अले निर्देशक जीतेन्द्र राजोपाध्याय खः । थुकी पि.के श्रेष्ठया बाखं दुसा संगीतकार बीजेन श्रेष्ठ, बिजय कायस्थ व ईन्द्र व्यञ्जनकार खः । संकिपाया छाँयाकार सूर्य व दिपेन्द्र खःसा थुकी कलाकारकथं सबिन शाक्य, सचि राजोपाध्याय, सबिना डंगोल, सुरेन्द्र के.सी.पिं दुथ्याः । संकिपाय्‌ छगू परिवारय्‌ च्वनाच्वंपिं दुजःत गथे जुयाः कतः थें जुयावनी धकाः क्यनातःगु दु ।

नाट्यश्वर फिल्म्स्पाखें ने.सं. ११३१ दँय्‌ निर्माण जूगु संकिपाया निर्माता सुरेश खडगी व कृष्णप्रसाद खडगी अले निर्देशक रबिन्द्र शाही खः । थुकी सुरेश खड्गीया बाखं अले किशोर शाही व सुमन कपालीया संगीत दु । संकिपाया छायाँकार मदन महर्जन खःसा कलाकारकथं किशोर शाही, रुबिना महर्जन, मिरा मालि, रवि महर्जन, सुरेन्द्र के.सी., पल्पसा डंगोल, श्यामसुन्दर शिल्पकार, अर्णेश्वरी शिल्पकार, सिर्जन शाही, शंकर खडगी व सुजित ठकुरीपिं दुथ्याः । थुकी छम्ह मभिंम्ह मिसाया जालय्‌ लानाः गालय्‌ कुतुवंम्ह छम्ह मिजंया बाखं दु ।

ल्हातं बाय् कथिं बाजनय् दायाः न्यायेकेगु व बाजं हे थवंथवय् ल्वाकाः/छ्यानाः सः पिज्वयेकेगु यानाः निथी नेवाः बाजं दु ।