ज्ञानकाजी शाक्यया जन्म ने.सं. १०६३ इ मां सूर्यमाया व बौ सानुकाजी शाक्यया कोखं पाल्पा तानसेनया भीमसेन त्वालय् जूगु खः । थौंकन्हय् कपनय् च्वनादीम्ह वय्कलं अर्थशास्त्र व थेरवाद बुद्धधर्मय् एमए यानादीगु दु ।
सरकारी सेवाय् सहायक अञ्चलाधीश, प्रमुख जिल्ला अधिकारी, गृह मन्त्रालयया सहसचिव तक जुयादीधुंकूम्ह वय्कःया न्हापांगु निबन्ध ‘भवानी अम्बर’ धर्मोदयया दँ १२, पूर्णांक १३७ (ने.सं. १०७९) य् पिदंगु खः । वय्कलं थीथी पत्रपत्रिकाय् कविता, बाखं, निबन्ध, यात्रा संस्करण सम्बन्धी साहित्यिक रचना पिथनादीगु दु । वय्कःया च्वखँमुना ‘महिमा न्हिपंया मर्म न्ह्यपुया’ ने.सं. ११३५ य् पिदंगु खः । वय्कःया अंग्रेजी व खस नेपाली भाय्या नं सफू पिदंगु दु । वि.सं. २०१४ सालय् पद्मोदय हाइस्कूलय् नेपालभाषा विद्यार्थी सम्मेलनय् ‘सिमा व सिमाहः’ च्वखँय् न्हाप सिरपाः त्याकादिलसा २०१५ य् एसएलसी परीक्षाय् नेपालभाषा विषयय् न्हाप जूगुलिं च्वसापासां शारदा सिरपाः लःल्हाःगु खः । वय्कः प्रबल गोरखा दक्षिण बाहु, वीरेन्द्र ऐश्वर्य पदक यानाः गुंगू पदकं विभुषित जुयादीगु दु ।