नविन जोशी अभिनय, क्यामेरापर्सन व संकिपा निर्माता जुयाः ज्या यानादीम्ह कलाकःमि खः । किपूया जोशी ननिइ ने.सं. १०८५ यंलाथ्वः पन्चमि, मंगलबारखुन्हु जन्म जूम्ह वय्कःया अबुया नां दुर्गानन्द जोशी व मांया नां रत्नमाया जोशी खः । वय्कः ने.सं. १०९२ दँय् ‘चरित्र” नांयागु नाटकय् बालकलाकारकथं म्हिताः थ्व ख्यलय् पलाः न्ह्याकादीम्ह खः । वय्कलं ‘जि वया ला लच्छि मदुनि’, ‘पलाः’, ‘धकिनय् लिकुंगु सः’ व ‘इपिं हे खः नि’ लिसेंया आपालं दबूप्याखं म्हितादीगु दु । वय्कलं ने.सं. ११०९ दँय् ‘चरित्र’ नांयागु नेवाः भिडियो प्याखनय् नायः जुयाः म्हितादीगु खः । क्यामरापर्सनया ल्याखं ‘कीर्तिपुर— द लिजेण्ड अफ किर्तिलक्ष्मी’ संकिपा लिसें आपालं संकिपा व म्यूजिक भिडियो खिचे याना दीधुंकूम्ह खः । काष्ठमण्डप टिभि, अरनिको टिभिया व्यवस्थापक व प्रमुख ज्याझ्वः निर्माता जुयाः ज्या यानादीधुंकुम्ह वय्कः नेवाः टिभि एचडिया कजि खः । ज्यापु विशेष सम्मान ११४२, कला संसारपाखें प्रेमध्वज प्रधान स्मृति सम्मान, खड्गी सेवा समितिपाखें विशेष सम्मान लिसेंया आपालं सम्मान व सिरपाःपाखें वय्कः सम्मानित जुयादी धुंकूगु दु ।