तग्वःगु धिमे, दकलय् अप्वः सःम्हेसित थाकीगु धिमे । पुजा याइबलय् दकलय् च्वय् तयाः न्हापालाक थुकियात निं पुज्याइ । धिमे क्वकाइबलय् नं थुगुपती न्हापां क्वकायेगु याइ ।

मृदङ भजनयात प्रमुख बाजंकथं व थुकिया सहयोगी वा पासा बाजंकथं झ्यालि, ताः, तिंछु व सुरुबाजा हार्विन (हार्मोनियम) समेत छयलाः याइगु भजनयात हे मृदङ भजन धाइगु खः । थ्व बाजंयात झीगु भासं पच्छिमा वा पछिमा खिंया कथं म्हस्यूगु जुयाः मृदङ भजनयात पछिमा खिं भजनकथं नं म्हस्यू । मृदङ भजनया पद्धति नं मेमेगु भजनया पद्धति नाप खास फरक खने मदु, तर यल करुणामय (बुंगद्यः)या मृदंङ भजनया पद्धतिइ धाःसा (मृदङया बोल, थायेगु पद्धति, म्ये हालेगु पद्धति, झ्यालि ताः तिंछु थानाः ताली खाली क्यनेगु पद्धति) आपालं फरक खंकेफु ।थीथी धार्मिक ग्रन्थ, पुराण आदिइ न्ह्यथना तःकथं थ्व मृदङ बाजं अतिकं पुलांगु, स्वर्गय्‌ देवसभाय्‌ थीथी धार्मिक, मांगालिक उत्सवया इलय्‌ व देवराज इन्द्रया संगीत नृत्यशालाय्‌ सम्भा, तिलोत्तमा, उर्वशी, मनेका आदि अप्सरापिं प्याखं हुइकीगु इलय्‌ जक थाइगु जुयाः थुकियात देब बाजा धकाः नं धाः । थथे हे थ्व बाजं महाद्यःयात नं अतिकं यःगु जुयाः वाद्य एवं संगीत विद्याया शिरोमणि जुयाच्वंम्ह लंकाया जुजु रावणं छगू इलय्‌ कैलाशय्‌ महाद्यःयाथाय्‌ वनाः न्हिथं मृदङ थानाः राग आलाप कयाः म्ये हालाः, प्याखं हुलाः सेवा भक्ति भाव याःवनीगु जुयाच्वन ।
रावणया थज्याःगु भक्ति भाव एवं संगीत, नृत्य वाद्य वादनं प्रभावित जुयाः ताण्डव नृत्य याःगु बाखं आपालं धार्मिक ग्रन्थय्‌ न्ह्यथना तःगु दु ।
छगू पौराणिक बाखं कथं थ्व मृदङ बाजाया निर्माण स्वाती मुनिया परिकल्पना व आग्रह बमोजिम देवशिल्पी स्वयं विश्वकर्मां याःगु खः । दकलय्‌ न्हापांगु मृदङया निर्माण छगू प्रकारया चाय्‌ थीथी नस्वाः वःगु जडिबुटि चुं ल्हुयाः चाय्‌ ल्वाकछ्यानाः ‘हलः’ वा ‘तछ्वः’या आकारय्‌ छखे चित्याः मेखे भतिचा तःचाः यानाः दुने निखें पिचायेक ह्वःखनाः, निखेसं छ्यंगुलिं भुनाः प्वाःतिनाः दयेकूगु जुल । थज्याःगु आदिम पौराणिक बाजंयात मूबाजंकथं थानाः याइगु भजन हे मृदङ भजन खः ।
स्वनिगःया येँ, यल, ख्वप स्वंगुलिं सहरय्‌ व थिमि, बोदे, किपू, तोखा, सक्व, पन्ति, लुभु, जल, थसि, सुनागू आदि नेवाःतय्‌गु ख्वातुगु वस्ति दुगु थासय्‌ नं मृदङ (पछिमा खिं) थानाः भजन यायेगु परम्परा आःतकं ल्यना हे च्वंगु दनि । थज्याःगु मृदङ भजनत मध्यय्‌ यलय्‌ करुणामय (बुंगद्यः)या मृदङ भजन विशेष लोकंह्वाःगु खनेदु ।

मृदङ्ग (पछिमा), ताः, बभू/झ्यालि, हार्मोनियम आदि मेमेगु गुहालि बाजं

मेलवादेबी मानन्धर गुरुङ्ग नेवाः व खस संगीत ख्यःया न्हापांम्ह मिसा म्येहालामि व लय्‌चिनामि खः । थ्वय्‌कःया जन्म वि.सं. १९५९ सालय्‌ ओखलढुंगाया रुम्जातारय्‌ जूगु खः । थ्वय्‌कः अबु ज्ञानबहादुर लामिछाने गुरुङ्ग व मां सप्तदेबी गुरुङ्गया न्हापांम्ह म्ह्याय्‌ खः । थ्वय्‌कःया इहिपाः येँया तबलावादक वस्ताद भगतकृष्ण मानन्धरलिसें जूगु खः । थ्वय्‌कःपिनि निम्ह काय्‌ व निम्ह म्ह्याय्‌ दुसां लिपा निम्ह म्ह्याय्‌पिं जक ल्यन ।
अद्वितीय व प्रकृतिया वरदानकथं सः दुम्ह थ्वय्‌कः न्यादँति दुबलय्‌ येँ चन्द्र शम्शेरया दरबारय्‌ दुहां वने धुंकाः सांगीतिक जीवन न्ह्याःगु खः । दरबारय्‌ जुइगु सांगीतिक ज्याझ्वःलिसें उस्ताद डुण्डे खाँ, बालाप्रसाद शर्मा व गणपत गुरुपिनिगु ग्वहालिं वय्‌कःया सः झन् थिनावःगु जक मखु शास्त्रीय संगीतय्‌ नं दख्खल दत । थ्वय्‌कःया वास्तविक नां सुनमाया खःसा दरबार थ्यनेधुंकाः तिनि मेलवा नामं म्हस्यूगु खः । सःया हुनिं दरबारय्‌ प्रधानमन्त्रीया यःम्ह जुयाः महिताःतय्‌ षडयन्त्रं यानाः छन्हु थःगु सः तंकेमाल । न्ह्याक्व उपचार यानाः नं वय्‌कःया सः न्हापा थें मजूसां अय्‌ नं कम धाःसा मजू ।
थ्वय्‌कःया दरबारदुने हे वस्ताद भगतकृष्ण मानन्धरलिसें यःत्यः जुल । लिपा चन्द्र शम्शेरया नं यःम्ह थ्वय्‌कः भगतकृष्णया स्वम्हम्ह तिरिकथं बिजेश्वरी च्वं झाल । थः भातःलिसेया कचवं व दरबारया ग्याःचिकुपहलं छन्हु थ्वय्‌कः नेपाः त्वःताः वि.सं. २०८५ पाखे भारतया कलकत्ताय्‌ च्वं झाल । थ्वय्‌कः सिबें न्ह्यः भारतीय बंगाली मिसातय्‌सं जक नेवाः व खसभाय्‌या म्येत हालातःगु खः । थ्वय्‌कलं वि.सं. १९९० सालपाखे थःगु म्येत डिस्क रेकर्ड भरे यानाः नेपाःया नेवाः व खस संगीत ख्यःया न्हापांम्ह मिसा म्येहालामि जुयादिल, लिसें लय्‌ तःम्ह न्हापांम्ह मिसा जुयादिल । थ्वय्‌कःया म्ये दुथ्याःगु डिस्कत लोकंह्वानाः साप हे चुल ।
वि.सं. १९९० या तःभुखाय्‌यात कयाः हालादीगु म्ये ‘भूकम्प त्रास बियेमते नाथ, थथेनं जिमित हायेके गात’ नेपाःया हे न्हापांगु भुखाय्‌ सम्बन्धी म्ये खः । थ्व म्ये डिस्क रेकर्डय्‌ व मिसा सलय्‌ न्हापांगु नेवाःभाय्‌या म्ये नं खः । थुगु म्येया च्वमि सिद्धिरत्न खःसा लसय्‌ हनादीम्ह डम्बरमान खः । थ्व बाहेक नं वय्‌कःया मेगु नेवाःम्ये नं डिस्क रेकर्डय्‌ दु धैगु न्यनेदु । थ्वय्‌कलं नेवाः, खस भाषाय्‌ जक मखु हिन्दी व बंगाली भाषाया नं म्ये हालादीगु दु । थ्वय्‌कःया खस म्ये ‘सवारी मेरो रेलैमा’ व ‘न घरलाई घर कहिन्छ’ लिसें दक्वं म्येत उतिकं हे लोकंह्वाः ।
दुरुत्वंम्ह मचालिसें भारतय्‌ वंम्ह थ्वय्‌कलं न्हूगु जीवन हनेया निंतिं थःगु नां तक्कं सुलभा देवी धकाः हिलादीगु खः । जीवन हनेगु व थः निम्ह म्ह्याय्‌पिं ब्वलंकेया निंतिं थासंथासय्‌ संगीत स्यनेगु ज्या यानादिल । अन हे च्वनाः दुपिं निम्ह म्ह्याय्‌पिनिगु इहिपाः नं यानाबिल । अले कलकत्ताय्‌ थः याकःचा जीवन हनादिल । थीथी थासय्‌ जुइगु संगीत सम्मेलन व साभाय्‌ ब्वति कयाः थ्वय्‌कलं न्यय्‌गुलिं मल्याक मानसम्मान काःगु जक मखु ‘ठुमरीकी रानी’ या पदवी नं कयादीगु दु । थ्व हे झ्वलय्‌ वि.सं. २००६ सालय्‌ छन्हु जा थुइगु झ्वलय्‌ स्टोभ मुयाः थ्वय्‌कःया जीवन अन्त्य जुल । वय्‌कः मदयेधुंकाः वयकःया इच्छाकथं वय्‌कःया संगीतलिसें स्वापू दुगु फुक्क मानपदवी, डिस्क रेकर्ड व बाजंत छ्वयेका छ्वःगुलिं थौं वय्‌कःया बारे यक्व खँ झीसं सीके मफुत ।

ने.सं. १०९५ थिंलागाः चौथि, बुधबारखुन्हु येँया धोबिचौरय्‌ जन्म जूम्ह कलाकार मेलिना मानन्धरया अबुया नां मोहनकुमार मानन्धर खः । मचाबलय्‌निसें कलाकारिता ख्यलय्‌ नुगः क्वसायेका वयाच्वंम्ह मेलिना मानन्धरया धात्थेंगु नां सुनिता खः । मेलिना मानन्धरया दकलय्‌ न्हापांगु नेवाः संकिपा वि.सं. २०६५ स पिदंगु ‘पटाचारा’ खः । वधुंकाः मेलिनां ‘बांलाः मयजु’, ‘धम्मवति’ व ‘कृषा गौतमी’ नापं यानाः मुक्कं प्यंगू नेवाः संकिपा म्हितूगु दु । खस् नेपाली संकिपा ख्यलय्‌ नांजाःम्ह व लोकंह्वाःम्ह मेलिना मानन्धरं ‘छहारी’ संकिपापाखें कलिउड फिल्म अवार्डय्‌ बेस्ट हिरोइन अवार्ड त्याकूगु दुसा नेपाल सरकार चलचित्र विकास बोर्डया ग्वसालय्‌ जूगु राष्ट्रिय चलचित्र पुरस्कारय्‌ वि.सं. २०६५ सालय्‌ ‘पटाचारा’पाखें व वि.सं.२०६६ सालय्‌ ‘बांलाः मय्‌जु’पाखें सर्वाेत्कृष्ट अभिनेत्रीया सिरपाः त्याकूगु दु ।

अबु हिराकाजी शाक्य व मां नानिमाया शाक्यया कोखं ने.सं. १०८४ यंलागाः दसमि, बुधबारखुन्हु यलया सिन्चाहितिइ जन्म जूम्ह मोहन शाक्य २०३९ सालंनिसें संगीत ख्यलय्‌ मदिक्क सक्रिय जुया च्वनादीम्ह खः । वय्‌कःया आशा नकःमिनाप हालादीगु ‘मैंचिया सपलय्‌ च्वंगु स्वाँनं स्वइत स्वइच्वन’, ‘सुराई’, ‘मुसुक्क न्हिलाः जितः छकः स्वये छं मज्यू ला ?’, ‘जिं छता खँ ल्हाये थन छकः स्व’ लिसेंया ज्वःम्ये लोकं ययेकूगु म्ये खः । ३० पु म्ये पिथनादी धुंकूम्ह मोहन शाक्यया न्हय्‌पु भजन म्ये नं थुकी दुथ्याः ।

मोहनलाल बाराही शास्त्रीय संगीत ज्ञातालिसें छम्ह सांगीतिक बाजंया आविष्कारक नं खः । थ्वय्‌कःया जन्म वि.सं. १९८८ दँय्‌ यलय्‌ जूगु खः । ल्याय्‌म्हबलय्‌ संकिपा स्वस्वं म्येसंगीत व शास्त्रीय संगीत ययावःगुलिं थीथी थासय्‌ वनाः भजन न्यनेगु यानादिल । वि.सं. २०१६ सालपाखे येँ नारायणहिति लिक्क एकादसिपतिकं भजन याइथाय्‌ तक्क नं न्यं वनीम्ह जुल । थः नं हालेगु व सयेके मंदुगुलिं संगीत प्रविण नरराज ढकालयात गुरु नालाः शास्त्रीय संगीत सयेकादिल, अथक कुतलं संगीतय्‌ निपुण नं जुल ।
वय्‌कलं रेडियो नेपालय्‌ शास्त्रीय संगीतया प्रस्तुती नं यानादिलसा वि.सं. २०३७ सालं रेडियो नेपालं याःगु शास्त्रीय संगीतय्‌ थ्वय्‌कः न्हाप लात । थ्वय्‌कलं म्ये राग व म्ये जक हालीम्ह मखुसे थःम्हं हे म्ये च्वयाः संगीत नं तइम्ह खः । थ्वय्‌कलं ने.सं. ११११ स झीगु भाषा शास्त्रीय संगीत व सुलाच्वंगु म्येया नामं सफू नं पिथना दीगु दु । थुगु सफुती थःम्हं हे च्वयादीगु पीपु म्येया नोटेशन नापं न्ह्यब्वया दीगु खः ।
थ्वय्‌कलं लिपा लजगाःकथं हार्मोनियमलिसें मेमेगु बाजं ल्ह्वनेज्या न्ह्याकादीगु खः । यलया पट्कोय्‌ थ्वयय्‌कःया पसः । पसलय्‌ वय्‌कः थः जक मखु केहें मोहनलक्ष्मीयात ज्या स्यना तयादीगु खः । थ्वय्‌कः हार्मोनियम दयेकेगु व धुनिङ्ग यायेगुली नामुदम्ह खः । पिने देसय्‌ हामोनियमया सूर मिले यायेत यन्त्रपाखें याइगु खः ।
पाकिस्तानया वरिष्ठ गजलहालामि गुलाम अलि नेपाः वःबलय्‌ ज्वनावःगु हार्मोनियमया सूर स्यन । दयेकेत न्यनेकने याःबलय्‌ थ्वय्‌कःया नां न्ह्यथन । अले गुलाम अलि हार्मोनियम दयेकेत वय्‌कःया पसलय्‌ वल । थम्हं न्यनाभरं यन्त्र म्वायेक हार्मोनियम दयेका ब्यूगुलिं प्रभावित जुयाः थ्वय्‌कःयात गुलाम अलिं प्रशंसा पत्र बिया थकुगु खः ।
थ्वय्‌कः शास्त्रीय संगीतय्‌ व बाजं ल्ह्वने ज्याय्‌ नांजाःम्ह जक मखु न्हूगु बाजंया आविष्कारक नं खः । थ्वय्‌कलं संसारय्‌ गनं मदुगु प्यताजि बाजंया आविष्कार यानादीगु दु । उपिं मध्यय्‌ खः– चतुरंग । थ्व बाजं प्यताजि बाजंया समिश्रण खः । थुकी छम्ह हे मनुखं तानपुरा, तुंगना व म्हुतुं हार्मोनियम पुयाः प्यताजि थायेज्यू । वय्‌कलं थ्व बाजं दयेकेगु ज्या वि.सं. २०२५ निसें न्ह्याकाः प्यदँ बिकाः पूवंकूगु खः । थ्व बाजनय्‌ विदेशं हःगु रीड छगू बाहेक मेगु फुक्क थनयागु हे सामानत छ्यलादीगु खः । थ्व बाजं थानाः न्यंकीबलय्‌ मनूत अजू चाइगु । थ्व बाजंया नां छुनादीम्ह उस्ताद गोबिन्दलाल खः । अथेहे वय्‌कलं आविष्कार याःगु मेगु बाजंत मोहनचन्द्र चंगल व मनरुवा खः । मोहनचन्द्र चंगल चन्द्रमा बांलूगु डम्फु व भ्वाय्‌लिनया समिश्रण खःसा मनरुवा कियाः थायेगु सारंगी विशेष स्वरुप खः, मेगु म्हुतुं पुयाः थायेगु हार्मोनियमया खः ।

वय्‌कलं आविष्कार यानादीगु चतुरंग बाजंया नामं यलय्‌ छगू बुलेटिन नं पिदंगु दु । नेपालभाषा मंका खलः यलया संगीत व नाटक उपसमितिपाखें ने.सं. १११४ स थुगु बुलेटिन पिथंगु खः ।

मोहनसुन्दर श्रेष्ठ मिखां मखंम्ह छम्ह नेपाःया वरिष्ठ सरोदवादक खः । थ्वय्‌कःया जन्म येँया किलागलय्‌ ने.सं. १०६१ सिल्लागाः एकादसि, सनिबारखुन्हु जूगु खः । थ्वय्‌कः अबु गोपालसुन्दर श्रेष्ठ व मां मोहनमाया श्रेष्ठया चीधिकःम्ह काय्‌ खः । मचाबलय्‌ निसें हे थ्वय्‌कःया मिखां मखं । थ्वय्‌कःया इहिपाः कृष्णकुमारी श्रेष्ठलिसें जूगु खः । थ्वय्‌कःपिनि छम्ह काय्‌ व निम्ह म्ह्याय्‌ दु । मस्तमध्यय्‌ चीधिकःम्ह म्ह्याय्‌ सितार थायेगु यानादी । न्हय्‌दँति दुबलय्‌ हे म्ये हालाः थ्वय्‌कः संगीत ख्यलय्‌ दुहां झाःम्ह खः । थ्वय्‌कलं उस्ताद भगतकृष्ण मानन्धरलिसे म्ये हालेगु सयेकादीगु खः । तर थ्वय्‌कलं लिपा म्ये हालेगु स्वयां नं संगीत थायेगु हे ययेकाः वपाखे वनेगु बिचाः यानादिल । वि.सं. २०१३ सालपाखे गुरु नारायण प्रसाद श्रेष्ठलिसे सरोद थायेगु सयेका दिल । उगु हे इलय्‌ थ्वय्‌कः सिबें न्ह्यः व हे गुरुपाखें सितार सयेका च्वनादीम्ह नरेन्द्र बाताजु खः । गुम्ह छम्ह नेपाःया लोकंह्वाःम्ह सितारवादक खः । थ्वय्‌कलं लिपा म्ये गुथिया दुजः जुयाः नेवाः संगीत ख्यलय्‌ नं आपालं योगदान यानादिल । उगु गुथिं पिथनीगु नेवाः म्येचाःया म्येय्‌ थ्वय्‌कःया सरोदवादन उत्कृष्ट जू । थ्व बाहेक वय्‌कःया देन ज्ञानमाला म्ये संगीतय्‌ नं उतिकं हे दु । अथे हे न्हापा पिदनीगु थीथी म्ये व म्येचालय्‌ नं थ्वय्‌कःया सरोदवादनया स्वापू दया हे च्वं ।
सरोदवादनलिसें शास्त्रीय संगीतय्‌ नं दख्खल दुम्ह थ्वय्‌कलं विदेशीतय्‌त तक्कं संगीत स्यनादीगु दु । थ्वय्‌कलंं वि.सं. २०२६ सालय्‌ राष्ट्रिय नाचघरय्‌ सरोदवादकया लजगाः न्ह्याकादीगु खः । वि.सं. २०३७ सालय्‌ अनं लिकासेलिं हानं नेपाल अपांग संघया कुतलं करारय्‌ रेडियो नेपालय्‌ लजगाः न्ह्याकादीगु खः । अथेहे येँया होटल अन्नपूर्णय्‌ नं ज्या यानादिल । स्थायी लजगाः मदया च्वंबलय्‌ वि.सं. २०४२ पाखे जुजु वीरेन्द्रया कृपां थ्वय्‌कलं दरबारय्‌ हे स्थायीकथं सरोदवादनय्‌ लजगाः न्ह्याकादिल । अले अन हे वि.सं. २०६८ सालं अवकाश कयादीगु खः । अवकाश लिपा नं थ्वय्‌कलं होटलय्‌ ज्या न्ह्याका हे च्वनादिल ।
थ्वय्‌कःया सिर्जनात लिपांगु म्येचालय्‌ आपालं दु । थ्वय्‌कलं थःम्हं थानादीगु सरोदवादनया धून मुनाः फेवरेष्ट म्येचाः व फेवरेष्ट २ नामं सि.डी.चाः पिथनादीगु दु । वय्‌कलं गोर्खा दक्षिण बाहु तेश्रो व चौंथो, त्रिशक्ति पट्ट चौंथो लिसें थीथी संघसंस्थापाखें आपालं मानपदवी व सिरपाः कयादीगु दु । थ्वय्‌कः ने.सं. ११४१ सिल्लागाः दसमि, सोमबारखुन्हु मदुगु खः । थ्वय्‌कःया परिवारं थ्वय्‌कःया नामं वि.सं २०७८ सालं किराँतेश्वर संगीत आश्रम मोहनसुन्दर श्रेष्ठ पुरस्कार नं नीस्वना तःगु दु ।

मानवीय चेतनाया छगू उत्कृृष्ट अभिब्यक्ति खः – म्ये । नुगःया लसता जक मखु पीडा अले आक्रोश, असन्तोषयात नुगलय् थीगु कथं लय व गेययात छगू कलात्मक पहलं संयोजनयासें न्ह्यब्वयेगु कला खः, थ्व । उकिं म्ये धैगु मानवीय कला व सौन्दर्य पक्षया पर्याय खत । तर ब्यक्तिया ल्याखं जक मखु समष्टिगत समुदायदुने हे म्ये हालेगु, म्ये न्यंकेगु वा म्ये न्यनेगु छगू स्थापित संस्कृति परम्परा कथं न्ह्याकावयाच्वंगु गुगुं समुदाय दुसा उकी मध्ये छगू समुदाय खः – नेवाः !

म्येयात आकर्षक व कलात्मक प्रस्तुतिया लिधँसा खः बाजं । अथेला प्रागऐतिहासिक इलय् नं मनुखं सन्देश सम्प्रेषण व संवाहकया माध्यम कथं ताल व सुरयात नालावःगु खः । आःया बाजंत थुकिया हे उन्नत स्वरुपत खत । तर पाःगु छु धाःसां नेवाःतय्सं ताल सुरया निंतिं वा मनोरञ्जनया साधन कथं जक बाजं थायेगु मयाः । ई, मौसम, नखःचखः, जात्रापर्व अले मानवीय संस्कार हनेगु निंतिं छगू मदयेकं मगाःगु साधन कथं बाजंयात नाला यन । उकि बाजं नेवाः संस्कृति व नखःचखःयात वोध याकीगु छगू प्रमुख माध्यम जुयाबिल । अजुचायापूगु खँ, मनूया निंतिं बाजं मखु, बाजंया निंतिं मनू जुयाबिल । अथे जुयाः बाजंयात म्वाकेत नेवाःतय्सं आखाः दयेकल, गुथि स्वन । अले माःगु आयस्ता नं तयाथकल । मेमेगु समुदाय व नेवाःया दथुइ पाःगु वा बिस्कं थुकथं खत ।

छझाः न्ह्याइपुइकेगु जक खःसा मनुखं न्ह्यागु नं कथं अभिनय यायेफु । प्याखंया प्रयोजन उकथं मखु नेवाःतय् निंतिं । छपु छपु प्याखनय् लौकिक वा अलौकिक बाखं ला दइगु हे जुल तर उकियात दबुली हयाः जीवन्त यायेगुया आजु खः समाजया निंतिं जीवनया आदर्श, मूल्य, मान्यता अले दर्शनया सन्देश बीगु । नापनापं प्रत्येक प्याखं अले प्याखंम्वःयात जीवन्त दयेकीगु निंतिं नालीगु भाव, मुद्रा, कला, ताल, चाल अले पाश्र्व संगीतया उलि हे गुह्य अर्थ नं दु । अथेहे वसः, तिसा–पुंसा, ज्वंसाया नं थीथी महत्वं जाः ।

त्वाः पतिकं, लाछि व दुवाः पतिकं दय्काताःगु चकंदबू प्याखं पिदनेत खत । तर मनोरञ्जनया निंतिं सर्वजनया सुविधायात ध्यानय् तयाः थुकथं व्यवस्थित अले आकर्षक भौतिक संरचना तक धस्वाकेत निपुणपिं नेवाः पुर्खा नेवाःतय् निंतिं जक मखु मुक्कं नेपाःदेय्या निंतिं गौरवया खँ जुल ।

डिस्क धुंकाः लिपा लोकंह्वाःगु म्येचाः (क्यासेट) दुने नं नेवाः संगीत पिदने ज्यां नेवाः संगीत थपू यायेत आपालं हे लिधंसा जूगु दु । न्हापा थीथी इलय्‌ नेवाःतय्‌सं त्वाःत्वालय्‌ संगीत सम्मेलनत याइगु खः । अले धेंधेंबल्लाः नं याइगु खः । रेडियो नेपालं नेपालभाषाया बुखँ ज्याझ्वः लिकाःबलय्‌ थुकिया विरोध सांगीतिक रुपं जुल । थ्व हे सांगीतिक विरोधया ज्याझ्वलं आपालं नेवाः सर्जकत पिलू वल । थज्याःगु हे ज्याझ्वलय्‌ हालीगु म्येत मनूतय्‌सं थःके दुगु क्यासेट प्लेयरं रेकर्ड यात । थःगु नीजि सोखं रेकर्ड याःगु म्ये लिपा म्येचालय्‌ पिकायेगु ज्या नं जूगु खः । थज्याःगु ज्या वि.सं. २०३२/३३ लिपा जूगु खनेदु ।
पोष्टकार्डयात द्यबः दयेकाः थासा आखलं नां छुनाः व थासा आखलं जक द्यबः दयेकाः हिन्दी म्ये व अंग्रेजी म्येचालय्‌ (लिपा हङ्गकङ्गय्‌ रेकर्ड याःगु खनेदु) नेवाःम्ये हानं भरे यानाः मीगु ज्या नं जूगु दु ।
नेपालभाषा म्ये पुचः, नेपालभाषाया म्ये, म्ये मुना, नेवाः म्ये मुना व NEPALBHASA थज्याःगु नां छुनाः म्येचाःत पिदंगु खनेदु । तर थुपिं दक्वं तिथिमिति न्ह्यथना मतःगु म्येचाःत जुल । थुकीमध्यय्‌ दकलय्‌ न्हापां छापाय्‌ उल्लेख जूगु म्येचाः NEPALBHASA खः । थुपिं म्येचाःत नं आपालं चूगु खः । तिथिमिति न्ह्यथनाः पिथंगु न्हापांगु म्येचाः दापा खलकं पिथंगु म्येचाः ‘नेपालभाषाया म्ये’ खः । थ्व ने.सं. १०९९ स पिथंगु खः । थ्वयां लिपा ३५० स्वयां मल्याकंं म्येचाः पिदंगु खनेदु ।

म्येचाः ब्वज्या व धलः पिथना
नेपालभाषां पिदंगु म्येचाःत मुनाः उकिया ब्वज्या यायेगु व धलः पिथनेगु ज्या नं जूगु दु । हःपा गुथिं ने.सं. ११११ पाखे म्येचाः ब्वज्या याःगु खः । थुबलय्‌ हे उगु म्येचाःया धलः नं पिथंगु खः । सन्ध्या टाइम्स न्हिपौया स्वन्तिबलय्‌ पिदनीगु तँसापतिइ दच्छिया दुने पिदंगु म्येचाःया धलः पिथनेगु ज्या याःगु खः । थुगु धलः पिथना दीम्ह प्रेमहेरा तुलाधर खः । ने.सं. ११२१ स राजु बज्राचार्यं थःम्हं मुनागु म्येचाःया ब्वज्या बसन्तपुरय्‌ याःगु खः । अनंलिपा जमःया चेम्बर भवनय्‌ ने.सं. ११२५ य्‌ याःगु खः । वय्‌कलं निक्वःतक म्येचाः ब्वज्या यानादीगु खनेदु । लिसें वय्‌कलं म्येचाःया धलः सफू ‘नेपालभाषा म्येचाः धलःया म्हिचा स’फू निब्वतक पिथनादीगु दु । थ्वयां लिपा म्येचाः ब्वज्या व धलःत पिथनेगु ज्याजूगु खनेमदु ।

नेवाःम्येचाः धलःकथं दकलय्‌ न्हापां
ने.संं १०९९ निसें म्येचालय्‌ तिथिमिति न्ह्यथनाः पिथनेज्या जूगु खः । राजु बज्राचार्यपाखें पिथंगु ‘नेपालभाषा म्येचाः धलःया म्हिचा सफू’ उगुकथं पिदंगु म्येचाःया धलः न्ह्यब्वया दीगु खः । थ्व मुनाय्‌ दुमथ्याःगु म्येचाःत नं खनेदु । खय्‌त ला वय्‌कलं थःम्हं मुनादीगु म्येचाःया धलःकथं पिथना दीगु खः । व हे म्हिचा सपूm कथं अल ेतिथिमिति उल्लेख जूगु ल्याखं थीथी म्येचाःया म्हसीका क्वय्‌ न्ह्यथना कथं दुगु जुल ।

स्टेरियो म्येचाः
दकलय्‌ न्हापांगु स्टेरियो म्येचाःकथं पिदंगु ‘नेपालभाषाया म्ये कू’ खः । ने.सं. १०९९ स पिदंगु थुगु म्येचाः दापा खलः कालिमाति, येँपाखें पिथंगु खः । थुगु म्येचालय्‌ मुक्कं खुपु म्ये व न्हय्‌पु थीथी लोक धूनत मुनातःगु दु । म्येहालामि बेखा (बी.आर. संगम)या सलय्‌ स्वपु, शिवेशया सलय्‌ निपु व केदारया सलय्‌ छपु म्ये दुथ्याः । लिसें ‘वा माया वा वा’, ‘बालाबालाचिंगु मिखा’, ‘वारी मथ्यं पारी मथ्यं खुसि दथुइ लात रे राजनमाया’, ‘जय नमो श्री बुद्ध भगवान’ लिसें मनकामना माइ, मोहनी व सिलु म्येया धूनत दुथ्याः ।

कथहं पिथंगु म्येचाः पिकाक
लोकंह्वाःगु थीथी म्येत मुनाः दकलय्‌ न्हापां प्यब्वतक पिदंगु म्येचाः ‘नेपालभाषा म्ये’ खः । थुगु म्येचालय्‌ म्ये मुना ने.सं. ११००, ११०२, ११०३ व ११०४ स पिदंगु खः । लिपा निगू प्याखं मुनाया ४ चाः याना मुक्कं च्याचाः पिदंगु खः । ने.सं.११०५ स तसकं लोकंह्वाःगु ख्यालिंजाःगु प्याखं ‘किसि न्याइम्ह मदनमान’या निचाः पिदंगु दु । थुगु प्याखं येँया सहलह पुचलं न्ह्यब्वःगु खः । अथेहे ने.सं.११०६ स जनकवि दुर्गालाल श्रेष्ठया बुद्धकालीन घटनाया बाखनय्‌ दयेकेज्या जूगु अतिकं लोकंह्वाःगु म्येहना प्याखं ‘निमन्त्रणा’या निब्व पिदंगु खः । ने.सं.१०८८ पाखे लच्छियंक क्यनेज्या जूगु थ्व प्याखनय्‌ न्ह्यब्वःगु म्येय्‌ लय्‌ चिनादीपिं कान्छाबुद्ध बज्राचार्य, श्यामबहादुर थापा, हुतराज शर्मा, नगेन्द्र हाडापिं खःसा म्ये हालादीपिं योगेश वैद्य, ईन्द्रनारायण, भृगुराम श्रेष्ठ, मदनकृष्ण श्रेष्ठ, निर्मला श्रेष्ठ, उर्मिला श्रेष्ठ, प्रमिला बज्राचार्य, नगिना जोशी व सपना परियारपिं खः ।

प्याखं मुना
दबुली क्यनेज्या जूगु प्याखं मुना ने.सं. ११०२ स पिदंगु म्येचाः ‘छधाः प्याखं’ खः । अन्तर क्याम्पस नेपालभाषा छधाः प्याखं धेंधेंबल्लाः कासाय्‌ न्ह्यब्वयेगु ज्या जूगु मध्यय्‌ सिरपाः त्याकूगु प्याखंत मुनाः पिदंगु थुगु चाः पाटन संयुक्त क्याम्पसया विद्यार्थी पुचःपाखें अमोघ व ललितजुं पिथंगु खः । थुकी दुथ्याःगु प्याखंत खः– पाटन संयुक्त क्याम्पस (कुलां)या न्ह्यब्वया ‘न्हूगु छेँया भम्चा’, पद्यकन्या क्याम्पसया ‘ग्वय्‌दां’ व कीर्तिपुर बहुमुखी क्याम्पसया ‘छगू प्याखं धात्थेंगु’ दुथ्याः ।

ख्यालिं जाःगु म्येमुना
ख्यालिंजाःगु म्येत मुनाः ने.सं. ११०३ स पिदंगु म्येचाः ‘नेपालभाषा संग्स’ खः । मदनकृष्ण श्रेष्ठ व नगेन्द्र हाडाया द्यछाकथं पिदंगु थुगु म्येचालय्‌ निपु म्ये धूनलिसें गुपु ख्यालिंजाःगु म्येत दुथ्याः । आपालं म्ये च्वयाः लसय्‌ हनादीम्ह नगेन्द्र हाडा खः । थुकी दुथ्याःगु म्येत ‘असनय्‌ खः ल्वाकूबलय्‌’, ‘चाया धम्प ज्यालगे मजू’, ‘द्रुप बमबम भोला’, ‘छःपिं जक कालि मखु’, ‘कृष्ण थ्व भवसागरय्‌’, ‘ला छकू वयेकः समय्‌बजि’, ‘मरु गनेद्यःया देगलय्‌ गजू मदु’, ‘पपू चाना बिलकि’, ‘सापारु खुन्हु’, व ‘यःमरि चाकु थें’ दुथ्याः ।
सितार धून मुना
सितारया धून मुनाः ने.सं. ११०३ स पिदंगु म्येचाःया ुब् क्ष्तबचष्कत इा ल्भउबुि खः । ताराबीर सिं तुलाधरजुं थःम्हं हे पिथना दीगु थुगु म्येचालय्‌ लोकंह्वाःगु थीथी गुपु धूनत दुथ्याः । थुकी ‘जय नमो श्री बुद्ध’, ‘माय्‌ क्यःम्ह सिन्तलिचिया’, ‘घातुम्ये’, ‘छःपिं जक कालि मखु’, ‘मालश्री’, ‘थौं वइ ला कन्हय्‌ वइ ला’, ‘ला छकू वयेक समय्‌बजि’, ‘सितार कासा’, ‘राग माला’ व ‘रागश्री’ दुथ्याः ।

ज्ञानमाला म्ये मुना
ज्ञानमाला म्ये मुनाः ने.सं. ११०३ स पिदंगु म्येचाः ‘श्रीघः ज्ञानमाला भजन’ खः । श्रीघः ज्ञानमाला भजन खलकं पिथंगु थुगु मुनाय्‌ गुपु ज्ञानमाला म्ये दुथ्याः । थुकी ‘नमोतस्स’, ‘हे प्रभु भगवान’, ‘त्रिरत्नयाके शरण वना’, ‘झी वनेवा बुद्धया दर्शन’, ‘जय नमो श्री’, ‘नु नु पासा झी फुक्क जानाः’, ‘वया सदां जि भगवान’, ‘बुद्ध शासन’ व ‘थ्व विश्वय्‌ पूण्यभूमि’ दुथ्याः ।

प्रगतिशील (जनपक्षीय) म्ये मुना
प्रगतिशील म्ये मुनाः ने.सं.११०३ स पिदंगु म्येचाः ‘क्षितिज’ खः । थुगु म्येचाः क्षितिज सांस्कृतिक परिवारं पिथंगु खः । थुगु म्येचालय्‌ ‘ख्वबिलु म्ये जक गुलि हाले’, ‘धर धर ख्वबि’, ‘नेपाः देया’, ‘रंग मखु हिया’, ‘शोषकवर्ग’, ‘छ नं गरीब खः’, ‘मनूया दुने’, ‘पंगः न्ह्याक्व’, ‘जितः लुमंका ख्वबि तिकिनंकाः’ व ‘घाः जुलं छु जुल’ दुथ्याः ।

पूधाः प्याखं
छगू हे प्याखंया निब्व थलाः ने.सं.११०४ स पिदंगु म्येचाः ‘कुलां चकनी तिनि’ खः । ‘सहलह’पाखें पिथंगु थुगु चालय्‌ दबुली क्यनेज्या जुइधुंकूगु प्याखंया पूवंक खँल्हाबल्हा दुथ्याः ।

लोकम्ये मुना
लोकम्ये मुनाः ने.सं. ११०४ स पिदंगु म्येचाः ‘नेपालभाषा लोकम्ये’ खः । पिकाकःया नां दुमथ्याःगु थुगु म्येचाः लिपा सितु डिजिटलं पिथंगु सीदु । थुकी पुलांगु लोकंह्वाःगु म्ये सपना परियार (सपनाश्री), सुनन्दा, राकेश, प्रकाश व चन्द्रकृष्णपिनिगु सः दु । म्ये ‘वा माया वा वा’, ‘लसिकल न्यासिमिखा’, ‘अय्‌ नानि मय्‌जु’, ‘प्याखं हुले म्हां’, ‘अय्‌ लमि तता’, ‘ख्यालं ख्यालं ययेकां आः ला’, ‘झन जक माया क्यन’, ‘स्वये धकाः स्वैगु मखु’, ‘ल्याय्‌म्हम्ह दाजु तंचाया ला छु’, ‘मखु मखु खँ ल्हाना’ नापं छपु धून दुथ्याः ।

ख्यालिंजाःगु पूधाः प्याखं
ख्यालिंजाःगु पूधाः प्याखंया निब्व म्येचाः ने.सं. ११०५ स पिदंगु ‘किसि न्याइम्ह मदनमान’ खः । थुगु म्येचाःया पिकाक नेपालभाषा म्ये गुथि खःसा ‘सहलह’ पाखें दबुली क्यनेज्या जूगु प्याखंया पूवंक खँल्हाबल्हा दुथ्याः । थुगु नाटकया च्वमि बिजय मल्ल खःसा स्यनादीम्ह हरिहर शर्मा अले नांजाःपिं कलाकारत मदनकृष्ण श्रेष्ठ, हरिवंश आचार्यपिं दुथ्याः। थुगु प्याखं वरिष्ठ संगीत सर्जक फत्तेमान राजभण्डारीया वास्तविक जीवनय्‌ जूगु घटनाया कयाः दयेकूगु खः ।

धार्मिक पूधाः प्याखं
बौद्ध जातक बाखंया पूधाः प्याखंया निब्व म्येचाः ने.सं. ११०५ स पिदंगु ‘अंगुलिमाल’ खः । यलया मञ्जुश्री सांस्कृतिक परिवारया न्ह्यब्वयाय्‌ क्यनेज्या जूगु अले महाबौद्ध पुस्तकालयं पिथंगु थुगु चालय्‌ प्याखंया पूवंक खँल्हाबल्हा व म्येत दुथ्याः । प्याखंया च्वमि धर्मरत्न ‘त्रिशुली’ खःसा स्यनादीम्ह दुर्गाप्रसाद मानन्धर खः ।

छगू हे नामं अप्वः पिदंगु म्येचाः
छगूू हे नामं ने.सं. ११०६ निसें १११५ दुने खुचाःतक पिदंगु म्येचाः ‘लाय्‌लामा’ खः । येँया आरती स्वीटस् हाउसं पिथंगु थुगु म्येचाः लिपा म्युजिक नेपालं पिथनेज्या याःगु खः । तसकं लोकंह्वाःगु थुगु म्येचाःया सर्जकत च्वमि बिष्णु जल्मि व लय्‌चिनामि कृष्णमान डंगोल खः । थुगु म्येचालय्‌ आपालं न्हूपिं म्येहालामिपिन्त थाय्‌ बियातःगु दुसा लोकंह्वाःपिं नं आपालं दु ।

याकःच्वमि व लय्‌मिया म्येमुना
याकः च्वमि दुर्गालाल श्रेष्ठ व लय्‌चिनामि द्वारिकालाल जोशीया म्येमुना ने.सं.११०७ स पिदंगु म्येचाः ‘मन छकः याउँक दिके’ खः । मतजला प्रकाशनं पिथंगु थुगु म्येचालय्‌ झिंस्वपु म्ये दुथ्याः । थुकी म्येहालामिपिं रामप्रसाद मानन्धर, सानुमैंया ताम्राकार, तारा सुवाल, सत्यनारायण मानन्धर, सपनाश्री, दीप श्रेष्ठ, नगिना जोशी, प्रवीण ताम्राकार, मीरा राणा, प्रकाश श्रेष्ठ, सुवर्ण श्रेष्ठलिसें द्वारिका लाल जोशी व फत्तेमान राजभण्डारीपिं दुथ्याः ।

याकः लय्‌चिनामिया म्येमुना
लय्‌चिनामिया म्ये मुनाः न्हापां पिदंगु म्येचाः ‘नःलि पुचः’ ने.सं. ११०३ स पिदंगु खः । थुगु म्येचालय्‌ केशर खड्गीया याकः लसय्‌ पिदंगु थुगु म्येचाःया पिकाक असं दगुबहालय्‌ च्वंगु सफू धुकूया हामा नातिबज्र बज्राचार्य खः । थुगु म्येचालय्‌ मुक्कं झिपु म्येलिसें स्वपु म्येया धूनत दुथ्याः । थुकी म्ये हालादीपिं खः– बिपना चित्रकार, सालिकराम श्रेष्ठ, प्रमिला बज्राचार्य, रजनी व अनिता खःसा म्ये च्वयादीपिं गिरीजाप्रसाद जोशी, दुर्गालाल श्रेष्ठ, बासुपासा, पुष्पगोपाल, ईश्वरानन्द श्रेष्ठाचार्य व भगतदास श्रेष्ठ खः ।

गैरनेवाः च्वमि, लय्‌चिनामि व हालामि
गैरनेवालं थःम्हं हे च्वयाः लसय्‌ हनाः हालातःगु म्ये दुथ्याःगु म्येचाः ‘मांभाय्‌ म्ये पुचः’ ने.सं.११०५ स पिदंगु खः । थुकी राजन क्षेत्रीया स्वपु म्ये दुथ्याः । उपिं म्ये खः–
– न्यासिचायाः वने मते मय्‌जु लुफिं छन्त हाइ….. (सपना परियारलिसे)
– जिगु विश्वासघात यानाः छं, छन्त छु दैगु…….
सः बिष्णु महर्जन
– ख्वये मते छ न्हिलाः हुँ छंगु सुखमय जीबन सदां सदां अमर जुइमा
– छ वइ धकाः पिप्युं जिगु जीवन हे फुइन….
सः जुजुकाजि रंजित च्वमि ः सुनिता रंजित

्याकः मिजंसः मुना
याकः मिजंसः मुनाः पिदंगु म्येचाः ‘नेपालभाषा सङ्गस्’ खः । थुगु म्येचाः ने.सं. ११०३ स मुनासःपाखें पिथंगु खः । थुकी मदनकृष्ण श्रेष्ठं हालादीगु झिंछपु म्ये दुथ्याः । मदनकृष्ण श्रेष्ठं दबुली म्ये हाले न्ह्यः नासलं लीक स्वकुमिपिन्त संबोधन याइगु खँपुकथं हे द्यबलय्‌ च्वयातःगु नं दु ‘साप हे यःपिं दाजुकिजा तताकेहेंपिन्त मदनकृष्ण श्रेष्ठ व नगेन्द्र हाडाया द्यछा’ धकाः ।

याकः मिजं सलय्‌ गजल मुना
कमल क्षेत्रीया याकः सः व लसय्‌ न्हापांगु गजल मुना ने.सं. ११०८ स पिदंगु म्येचाः ‘भचा भचा’ खः । सांस्कृतिक संगमं पिथंगु थुगु म्येचाः येँ असनय्‌ लाइभ हाःगु म्येया मुना खः । थुकी रामबहादुर वादे व मोहनकाजि राजोपाध्यायया गजल दुथ्याः ।

गैरनेवाःया न्हापांगु म्येमुना
गैर नेवाःया याकः सलय्‌ व लसय्‌ ने.सं. ११०८ स पिदंगु गजल म्येचाः ‘भचा भचा’ खः । वय्‌कःया मेमेगु नं म्येचाः पिदंगु दु । उपिं खः ने.सं.१११७ स पिदंगु ‘याउँक च्वने’ व ‘भय्‌ब्यूगु यौवन’ । थुगु निचाः म्येचालय्‌ मेमेपिं म्येहालामिपिन्त नं म्ये हायेका तःगु दु ।
न्हापांगु संकिपाया म्येचाः
नेपालभाषाया संकिपाया म्ये व खँल्हाबल्हाया निब्व मुना ने.सं. ११०८ स पिदंगु म्येचाः ‘सिलु’ खः । सिलु न्हापांगु नेवाः संकिपालिसें जनजातिया न्हापांगु संकिपा नं खः । तसकं पुलांगु लोक म्ये सिलुया लिधंसाय्‌ दयेकूगु संकिपाया बाखं च्वमि अले निर्देशक प्रेम बानियाँ खःसा म्येचाः म्यूजिक नेपालं पिथंगु खः ।

याकः मिसासः मुना
निर्मला श्रेष्ठया याकः सः मुना ने.सं. ११०९ स पिदंगु म्येचाः ‘म्येयागु उपहार’ खः । म्येहालामि थःम्हं हे पिथना दीगु थुगु म्येचाः वरिष्ठ संगीत सर्जक अम्बर गुरुङ्गया याकः लसय्‌ पिदंगु खः । च्वमिपाखे दुर्गालाल श्रेष्ठया च्यापु व ध्रुबकृष्ण दीपया निपु म्ये दुथ्याः । थुकी म्वाःल हुँ वनेसा, मतिनाया मुखूस्वां नं, तुकि मतचा, सय्‌ रे बि अय्‌ हिस्सि मदुम्ह, छन्हु धाधां निन्हु धाधां, नुगलं मछिं मछिंसे च्वनी,
चुलुबुलु चंचल, उखें वइ ला थुखें वइ ला म्ये दुर्गालाल श्रेष्ठया खःसा छाय्‌ थ्व मनय्‌, बुलुं बुलुं च्या निपु ध्रुबकृष्ण दीपया खः ।

पुलांम्येया ओपेरा मुना
पुलां लोकम्येया ओपेरा मुना ने.सं. ११०९ स पिदंगु म्येचाः ‘सगं’ खः । ओपेराकथं पिदंगु थुगु म्येचालय्‌ पुलां लोकम्येत मुनाः संगीत संयोजन यानादीम्ह केशर खड्गी खः । थुकी दुथ्याःगु म्ये साहनाजुं ‘सितला माजु’ व ‘हरि हरि’ अले प््रतिसरा साय्‌मि, बनिता व एल.एच.एम जुं ‘जि वया ला लछि मदुनि’ हालातःगु दु ।

गैरनेवाःया याकः लसय्‌ मुना
गैर नेवाः वरिष्ठ संगीत सर्जक अम्बर गुरुङ्गया याकः लसय्‌ ने.सं. ११०९ स पिदंगु म्येचाः‘म्येयागु उपहार’खः । थ्व बाहेक नं वय्‌कःया लसय्‌ न्हापा दबुली म्येत प्रस्तुत जूगु दु ।

मचा म्ये मुना
मचा म्ये मुना ने.सं. ११०९ स पिदंगु म्येचाः ‘चुलिचिया चंचं’ खः । थुकिया म्येच्वमि दुर्गालाल श्रेष्ठ खःसा लय्‌चिनामि खः न्ह्यू बज्राचार्य । हःपाः गुथिं पिथंगु थुगु म्येचालय्‌ मुक्कं झिपु म्ये दुथ्याः । मस्तय्‌सं हालातःगु म्येया दथुइ ख्यालि ख्यलय्‌ अतिकं नांदंपिं मदनकृष्ण श्रेष्ठ व हरिवंश आचार्यया सलय्‌ नं छपु म्ये दुथ्याः, म्ये खः ‘कुने सु वल ? धाप्लांख्याः’ । थुगु म्येचाःया म्ये आपालं लोकंह्वाः ।

भिडियो संकिपाया म्येमुना
भिडियो संकिपाया म्येमुना ने.सं. ११०९ स पिदंगु म्येचाः ‘चिपनिप’ खः । थुगु संकिपाया बाखं व म्ये च्वमि महाकवि गिरीजाप्रसाद जोशी, लसय्‌ हनादीम्ह रामकृष्ण दुवाल, निर्देशन यानादीम्ह मनोज सुवाल व दयेकादीम्ह संघदास ताम्राकार खः । MCC पाखें थुगु म्येचाः पिथंगु खः । थ्व सिबें न्ह्यः ने.सं. ११०९ स महाकवि गिरिजाप्रसाद जोशीया बाखनय्‌ क्यनेज्या जूगु पूधाः प्याखं ‘बाखा छेँ’ पिदंगु दु ।

याकः सः, लय्‌ व च्वसाय्‌ म्येमुना
रोशनकुमार राजभण्डारीया याकः च्वसा, लय्‌ व सलय्‌ ने.सं. ११११ स पिदंगु म्येचाः ‘रोशनकुमारया न्हापांगु आधुनिक म्ये’ खः ।
ख्वपयाम्ह भाजुं पिथनादीगु थुगु म्येचालय्‌ मुक्कं झिंनिपु म्ये दुथ्याः । थुकी दुथ्याःगु म्ये छखे छ मेखे जि, मचाखाचा ख्वयेकाः, म्हुतु जायेक, ए हवा, हिया होलि, यः मां यः मां, दना वइच्वन, झ्यालं झ्यालं धूयागु होलि, स्वर्गया मिला, हासाचा पसः, आसे आसे व मिसां न्यनी तरकारी चि गाः ला खः ।

ऋतु लसय्‌ ज्ञानमाला
ऋतु लसय्‌ पिदंगु ज्ञानमाला म्येमुना ने.सं. १११२ स पिदंगु म्येचाः ‘ऋतु लय्‌या ज्ञानमाला भजन’ खः । श्रीघः ज्ञानमाला भजन खलकं पिथंगु थुगु म्येचालय्‌ लोकंह्वाःगु ज्ञानमाला म्येयात ऋतु लसय्‌ हालातःगु खः । थुकी मुक्कं झिपु म्ये दुथ्याः । बिजुलीमान कंसाकार व रामरत्न तुलाधरया ग्वसालय्‌ पिथंगु थुगु म्येचालय्‌ भृगुराम श्रेष्ठ, रामरत्न तुलाधर, आनन्द, पन्ना व कमला स्थापितपिन्सं म्ये हालादीगु खः ।

मिखां मखंम्ह सर्जकया म्येमुना
मिखां मखंम्ह सर्जक ईश्वर अमात्यया याकःसः मुना ने.सं. १११२ पिदंगु म्येचाः ‘जिगु थ्व ख्वबि’ खः । येँया नेपालभाषा मंका खलकं पिथंगु थुगु म्येचालय्‌ मुक्कं झिपु म्ये दुथ्याः ।
यलया झतापोलय्‌ कूलछेँ जुयाः नं त्रिशुली ब्वलंम्ह ईश्वर अमात्य थःम्हं हे थुकी दुथ्याःगु म्येत लसय्‌ हनाः हालादीगु खः ।

करुणामय, हारति व बसुन्धराया म्येमुना
करुणामय, हारति, बसुन्धरादेवीया म्येत छथासं मुनाः ने.सं. १११२ स पिदंगु म्येचाः ‘करुणामय, हारति व बसुन्धराया म्येमुना’ खः ।
श्रीघः ज्ञानमाला भजन खलकं पिथंगु थुगु म्ये मुनाय्‌ हारति मां, नालाया श्रृष्टिकान्ता लोकेश्वर, जनबहाःया आर्यावलोकितेश्वर, बसुन्धरा देबी, च्वबहाःया आनन्दादी लोकेश्वर, पद्यपाणी लोकेश्वर बुंगद्यः व स्तुति म्ये न्हय्‌पु व निपु धूनलिसें मुक्कं गुपु म्ये दुथ्याः ।
स्वन्ति नखःया म्येमुना स्वन्ति नखःयात कयाः हालातःगु म्येमुना ने.सं.१११२ स पिदंगु म्येचाः ‘ग्वय्‌स्वांमाः’ खः । आरती स्वीटस् हाउसं पिथंगु थुगु म्येचाःया म्येत फुक्क विष्णु जल्मिं च्वयाः लसय्‌ हनादीगु खः । थुकी दुथ्याःगु गणेश पूजा, मिस्तय्‌सं
यायेमाःगु छु छु दु, धा रे धा पासापि, छि बिना मदु, राममायाचिया, थौं ला जिमि ततां, छेँय्‌ वनां छु याये पासा, छु मति तया मैंचा व यः मां जितः ब्याः याये बोलया म्येत रचना जि.सी., तीर्थकुमारी, नानि महर्जन, रोशन शाक्य, राजेन्द्र महर्जन, रोजी श्रेष्ठ, नलिना चित्रकार, सलिना श्रेष्ठ, प्रेमध्वज प्रधान, बिष्णु जल्मि, बिजयनारायण मानन्धर व सबिना श्रेष्ठपिन्सं हालादीगु खः । थुकी दुथ्याःगु म्ये ‘धा रे धा पासापिं’ स्वन्तिबलय्‌ हालीगु न्हापांगु नेवाः भैलो म्ये खः ।

गुंला बाजं मुना
गुँला जःछि थाइगु थीथी बोलया बाजं धूनत मुनाः ने.सं.१११३ स पिदंगु म्येचाः ‘गुंला बाजं मुना’ खः । स्वय्‌म्भुया ज्ञानमाला भजन खलकं निब्व थलाः पिथंगु थुगु बाजं धून मुनाय्‌ मुक्कं झिंच्यापु दुथ्याः । येँया झिंन्याखलः बाजं खलःतय्‌सं ब्वति काःगुया प्रत्यक्ष रेकर्ड मुना खः थ्व ।

चिनाखँ मुना
धूस्वां साय्‌मिया याकः चिनाखँ मुना ने.सं.१११३ स पिदंगु म्येचाः ‘धूस्वांया कबिता स्वां’ खः । अर्थ पिकाकं पिथंगु थुगु चाः नेपालभाषाया ख्यलय्‌ नांदंम्ह न्हापांम्ह उपन्यासकार च्वमि धूस्वां साय्‌मिया याकः चिनाखँ न्ह्यब्वया मुना खः ।

धाः बाजं मुना
धाःबाजंया धूनत मुनाः ने.सं.१११४ स पिदंगु म्येचाः ‘सम्यक’ खः । थुगु म्येचाः यल इतिल्हन, नागबहाःया धाः बाजा खलःपाखें पिथंगु खः । मदुम्ह गुरु जोगमान शाक्यया लुमन्तिइ पिथंगु थुगु म्येचालय्‌ जति, पलेमा, चो व एकतालया बाजं धूनत दुथ्याः ।
धिमेबाजं मुना
न्हापांगु धिमे बाजयां धून मुनाः ने.सं.१११५ स पिदंगु म्येचाः ‘धिमे धेंधेंबल्लाः कासा’ खः। २५३९ क्वःगु बुद्ध जयन्तीया लसताय्‌ ज्यापु पुचः ओमबहाः येँया ग्वसालय्‌ जूगु धिमे धेंधेंबल्लाः कासाय्‌ न्ह्यब्वःगु मध्यया छुं छुं मुना खः ।

विदेशी लसय्‌ पिदंगु
विदेशी लसय्‌ हालातःगु म्येमुना ने.सं. १११४ स पिदंगु म्येचाः ‘नेवाः विटल्स’ खः। म्हय्‌खा पिथनाया न्ह्यब्वया थुगु म्येचाः अंग्रेजी रक ब्याण्ड ‘द विटल्स’य्‌ तसकं लोकंह्वाःगु झिंनिपु म्येया लसय्‌ हालातःगु नेवाः रक एण्ड रोल म्ये मुना खः । थुकी नेवाःभासं म्ये चिनादीपिं रत्न प्रजापति, निर्मल तुलाधर व सुरेशकिरण मानन्धरपिं खःसा पवित्र कसाः, प्रभात रिमाल, निर्मल तुलाधर, बिनय स्थापित, भूषण स्थापित व राजेन श्रेष्ठपिन्सं हालादीगु खः । छगू इलय्‌ थ्व म्येचाः नेवाःभाय्‌या दकलय्‌ चूगु म्येचाः नं खः । थुकी दुथ्याःगु म्ये अरे छ हिसि दुम्ह हाकुमैंचा, लिकसं वा रे स्व, जि यःम्ह मय्‌जु, छन्त जिं ययेकाच्वने, ख्वाः स्वःसा मदु रुप,झंगः ब्वः थें मन ब्वल , मोहनि तइबी, बांलाः मय्‌जु छं दः माया याः याः, अय्‌ जि यःम्ह, जीवन धैगु स्वां खः, मनय्‌ छताः म्हुतुइ छता खः ।

म्येमाः हना
लोकंह्वाःगु थीथी म्येया कुचात माःहनाः ने.सं. १११५ स पिदंगु म्येचाः ‘नासः’ खः । थुगु म्येचाः अन्नपूर्ण क्यासेट सेन्टर असंपाखें पिथंगु खः । थुकी नेपालभाषाया अतिकं लोकंह्वाःगु थीथी भिंmच्यापुति म्येत माः हनाः हालातःगु दु । म्ये हालादीपिं भिम तुलाधर, सन्जिप प्रधान, राम श्रेष्ठ, पवित्र कसाः, प्रकाश श्रेष्ठ, एन्जिला सिंह, सुवर्ण राजभण्डारी व जोश्ना राजभण्डारी खः ।
म्ह्याय्‌ ब्याहाःया म्येमुना
म्ह्याय्‌मचा बिया छ्वयेबलय्‌या म्येत. मुनाः ने.सं. १११६ स पिदंगु म्येचाः ‘म्ह्याय्‌ लुमंकाः’ खः । यलया प्रतिभा विकास कुञ्जपाखें चेतन लहर ब्व १ या नामं पिथंगु थुगु म्येचालय्‌ झिपु म्ये दुथ्याः । म्ये च्वयादीम्ह बिष्णुरत्न शाक्य खःसा लसय्‌ हनादीम्ह न्ह्यू बज्रचार्य खः । थुकी म्ये हालादीपिं ईश्वर अमात्य, अञ्जान शाक्य, बिष्णु शाक्य, लोचन भटराइर्, श्रीजना श्रेष्ठपिं खः ।

न्हूगु लसय्‌ ज्ञानमाला
लोकंह्वाःगु ज्ञानमाला म्ये न्हू लसय्‌ हालाः ने.सं. १११६ स पिदंगु म्येचाः ‘न्हूगु ज्ञानमाला’ खः । यल बालिफःया विश्व शान्ति पुस्तकालयं लोकंह्वाःगु ज्ञानमाला च्यापु म्येयात हानं न्हूकथं लसय्‌ हनाः पिथंगु खः । म्ये च्वयादीपिं धर्मरत्न त्रिशुली, भिक्षु सुदर्शन व महाप्रज्ञा खः । लसय्‌ हनादीम्ह किरण शाक्य खःसा कबिता जोशी, संगीता शाक्य, संघरत्न शाक्य व किरण शाक्यपिन्सं म्ये हालातःगु दु ।

झ्याउरी म्येमुना
झ्याउरी म्येमुना ने.सं.१११७ स पिदंगु म्येचाः ‘२०५४ सालया झ्याउरी म्ये’ खः । रोशनकुमार राजभण्डारीया च्वसा व लसय्‌ पिथना दीगु थुगु म्येचालय्‌ वय्‌कःलिसें रविचन्द्र प्रजापति, रीता सुवाल व पुष्प राजभण्डारीपिन्सं म्ये हालादीगु खः । वि.सं. २०४५ सं झ्याउरी म्येमुना म्येचाः नं पिदंगु दु । झ्याउरी म्ये पिथनेगुली ख्वप देय्‌ न्ह्यःने लाः, ख्वपं स्वचाः पिदंगु खनेदु ।

उपदेश प्रवचन मुना
बौद्ध धर्म सम्बन्धी उपदेश प्रवचन मुनाः ने.सं.१११७ स पिदंगु म्येचाः ‘बौद्ध धर्म निर्वाण मार्ग’ खः । आनन्द विहार क्याम्पस, शाक्यसिंह विहार यलं डा. भिक्षु सुनन्दया बौद्ध धर्म सम्बन्धी उपदेश प्रवचनत मुनाः खुब्वतक पिदंगु खः । थुकी प्रवचन नेवाःभाय्‌लिसें खसभासं नं दुथ्याः ।
नासंगीतिया तुतः मुना
नामससंगीति तुतःत मुनाः ने.सं.१११८ स पिदंगु म्येचाः ‘आर्य नामसंगीति तुतः पुचः’ खः । येँ मखं बहाःया मणिरत्न बज्राचार्यपाखें पिथंगु थुगु मुनाय्‌ तःम्ह हे म्येहालामिपिन्सं हालादीगु झिपु तुतः दुथ्याः ।
थुकी महायान सुत्र, नाम संगीति, नजातो, लोकपाल, कापोतल, मध्येगत, भुवनंत्रय, स्निग्धनील, अरुण वर्ण व षटपारमिता दुथ्याः ।

ख्यालः मुना
एफ.एम.य्‌ न्ह्यब्वयेज्या जूगु ख्यालः मुनाः ने.सं. १११८ स पिदंगु म्येचाः ‘ख्यालः मुना’ खः । थुगु म्येचाः गुड नाईट एफ.एम.या नेपालभाषा ज्याझ्वः पुचलं पिथंगु खः । थुकी सुरजबीर बज्राचार्य व सुरज ब्यञ्जनकारया सिपाहीया सरकार, हृदयप्रसाद मिश्रया तुकुचिया दुगुचा, सुरेश किरणया मिष्टर न्हाय्‌पंख्वाँय्‌ व हेल्लो हेल्लो, शरद कसाःया थौंया बाखं, तारा प्रधानया शुटिङ्ग दुथ्याः ।

पञ्चदान गाथा मुना
पञ्चदानया गाथा मुनाः ने.सं. १११८ स पिदंगु म्येचाः ‘पञ्चदान गाथा’ खः । थुगु थीथी गाथा मुनाया पिकाक श्रीघः ज्ञानमाला भजन खलः खः ।

मुक्कं नेवाः आखः छ्यःगु म्येचाः
देवनागरी लिपि मछ्यःसें रञ्जना व प्रचलित लिपि छ्यलाः ने.सं. १११९ स पिदंगु म्येचाः ‘जिमिगु पलाः’ खः । सुलिन्द्र शाक्य व बिरेन्द्रमान शाक्यं पिथना दीगु थुगु म्येचालय्‌ दकलय्‌ न्हापां देवनागरी लिपि मछ्यःसें मुक्कं प्रचलित व रञ्जना लिपिलिसें अंग्रेजी ल्याटिन लिपि जक छ्यःगु खः। थुकी च्यापु म्ये सुलिन्द्र शाक्य व बिरेन्द्रमान शाक्यया सलय्‌ दु । म्ये च्वमिपिं नबिन बज्राचार्य, नीलः शाक्य, सुलिन्द्र शाक्य, बिनोद शाक्य, कंचनकुमार महर्जन, रुमन जोशी व बि.के. करण खःसा लसय्‌ हनादीपिं सुलिन्द्र शाक्य, दिलिप संगम, भूपेन्द्र बज्राचार्य, नीलः शाक्य व बुद्ध साय्‌मि खः ।
भारतीय म्येहालामिया सः दुथ्याःगु
डिस्क चाः धुंकाः भारतीय संकिपा ख्यःया न्याम्ह सर्जकपिनिगु सः दुथ्याःगु मुना ने.सं. १११९ स पिदंगु म्येचाः ‘छंगु किपा’ खः । थुकी नेपाःया संजीप प्रधान, सरिश्मा अमात्य, गोबिन्द ह्यूमतलिसें भारतीय संकिपा ख्यःया नांजाःपिं म्येहालामिपिं अभिजित, अनुराधा पोड्वाल, जस्बिन्दर नरुला, महमद अजिज व बिनोद राठौरपिनि सः दुथ्याः । म्येचाःया च्यापु म्येया च्वमि रमेशमान शाक्य खःसा लसय्‌ हनादीम्ह गोबिन्द ह्यूमत खः ।

ख्वप भासं म्ये दुथ्याःगु
ख्वपभासं म्ये दुथ्याकाः ने.सं.११२० स पिदंगु म्येचाः ‘हुँका दः’ खः । खयेत ला थ्वसिबें न्ह्यः २०४५ सालपाखें मुक्कं ख्वपभासं झ्याउरी म्ये मुना पिदंगु खः ।

नेपाल संबत् प्रवर्तकया म्ये
नेपाल संब्तया प्रवर्तक शंखधर साख्वाःजुयात कयाः हालातःगु म्ये दुथ्याःगु मुना ने.सं. ११२० स पिदंगु म्येचाः ‘जिमिगु सः’ खः । तुयू पुंया द्यछाकथं नेवाः एफ.एम. पुचलं पिथंगु थुगु म्ये मुनाय्‌ नेपाल सम्वत्या पर्वतक शंखधर साख्वाःयात कयाः तुयू पुं च्वयादीगु म्ये ‘खिउँगु थासं लूम्ह तारा, युग युगया महापुरुष, थ्व हे खः झीम्ह शंखधर साख्वाः’ भिंmन्हय्‌म्हसिनं हालादीगु म्ये खः । थ्व लिसें मुक्कं च्यापु म्ये दुथ्याः । थुकी नलिना चित्रकार, बबिन प्रधान, संजीप प्रधान, दिलिप संगम, प्रवेशमान शाक्य, स्वयम्भुराज शाक्य, सुमन कपालि, दबल शाक्य, संजय खड्गी व राजु शाक्यपिन्सं म्ये हालादीगु खःसा बुद्ध साय्‌मिं न्यापु, बिरेन्द्रकुमार शाक्यं निपु व दिलिप संगमं छपु लसय्‌ हनादीगु खः ।

योगाभ्यास
न्ह्यः वयेकेत यायेगु योग अभ्यासया मुना ने.सं.११२० स पिदंगु म्येचाः ‘योगनिन्द्रा’ खः । शक्तियोगोपचार केन्द्र, छाउनी, चागःपाखें पिथंगु थुगु चालय्‌ डा. समा शाही (अलाख शक्ति) पाखें दुनंनिसें आराम कायेगु योगाभ्यास न्ह्यब्वया दीगु खः ।
याकःच्वमि, लय्‌ व सःया मुना याकः च्वसा, लसय्‌ व सलय्‌ दुगु न्हापांगु मुना ने.सं.११२१ स पिदंगु म्येचाः ‘स्वय्‌नगु’ खः । थुगु म्येचालय्‌ नातिबज्र बज्राचार्यया म्ये सुरेशमान श्रेष्ठं लसय्‌ हनाः जुजुकाजि रंजितं हालादीगु खः । थुकी मुक्कं च्यापु म्ये दुथ्याः । म्येया छ्यं थुकथं दु— खः छझाः जक, गथेभनं छन्त, स्व रे स्व छकः, थ्व मिखा दयाः नं, दुने दुने दुहां वना स्व, मनया खँ मनय्‌ मच्वं, वने च्वने धैगु नं, जल्ल थिनाच्वन ।

रेडियो पत्रिका मुना
रेडियो पत्रिका ज्याझ्वःया न्ह्यब्वया मुनाः ने.सं. ११२१ स पिदंगु म्येचाः ‘वन्दना’ खः । यल पूर्णचण्डीया बुद्धिष्ट कम्युनिकेशन सेन्टरं पिथंगु थुगु चाः बुद्ध धर्मया थीथी खँत मुनाः रेडियो पत्रिकाकथं पिथंगु खः ।

नित्य भजन मुना
मिसा सलय्‌ नित्य पुजाबलय्‌ हालीगु भजन मुना ने.सं.११२० स पिदंगु म्येचाः ‘सुमरण या भगवान’ खः । ईन्द्र जवाहर सहयोग गुथिं पिथंगु थुगु मुनाय्‌ सुथय्‌ भक्तिनीपिन्सं हालीगु नीछपु भजन मुनातःगु दु । थुकी कमला श्रेष्ठ, संगीता शाक्य, नलिना चित्रकार, सरिश्मा अमात्य, श्रीजना श्रेष्ठ, सानुमैंया ताम्राकार, दिसु मानन्धर, सबिता मालाकार, रिता महर्जन, रोशनी श्रेष्ठ व योक्षा श्रेष्ठया सः दुथ्याः ।

मचा कासा म्ये
म्हितेबलय्‌ हालीगु थीथी कासा म्ये हनाः हालातःगु म्ये दुथ्याःगु ने.सं. ११२० स पिदंगु म्येचाः ‘मचामय्‌लिं’ खः । माया मानन्धरं पिथना दीगु थुगु मुनाय्‌ राजभाइ जकःमिया गुपु म्ये दुथ्याः । लसय्‌ हनादीपिं रामकृष्ण दुवाः, राजभाइ जकःमि, अनिल तुलाधर, गोबिन्द ह्यूमत, रामकृष्ण खड्गी, हरिशरण साय्‌मि, अजयक्रान्ति शाक्य व न्ह्यू बज्राचार्य खः । म्ये हालादीपिं जगतसुन्दर ब्वनेकुथिया ब्वँनापिंलिसें विश्व नेपाली, सदीश शाही, दिलीप महर्जन, मदनकृष्ण श्रेष्ठ, सृजना श्रेष्ठ, रामकृष्ण खड्गी, श्रीनिता तुलाधर, संस्कृति श्रेष्ठ, प्रमिला मानन्धर व शर्मिला महर्जनपिं खः ।

नेवाःरक एन रोल म्ये मुना
रक पहलं हालातःगु म्ये मुनाः ने.सं.११२१ स पिदंगु म्येचाः ‘नेवाः रक एन रोल’ खः । पवित्र कसाःपाखें न्ह्यब्वःगु थुगु म्येचाः निब्व थलाः नीपु म्ये मुनाः पिथंगु खः । थुगु पहःया न्हूगु पुलांगु म्ये मुनातःगु थुगु
चालय्‌ प्रेमध्वज प्रधान, संजीप प्रधान, पवित्र कसाः, सुलिन्द्र शाक्य, अमर बज्राचार्य, अनिल हाडा, राजु प्रधान, प्रभात कसाः, भिम तुलाधर, बिजेन श्रेठ, न्ह्यू बज्राचार्य, पबित्रमान शाक्य, प्रवेशमान शाक्य,बिजयमान सिं तुलाधर, सतिश महर्जनलिसें नेवाः बिटल्स व मचा पुचःया म्येत दुथ्याः । थुकी प्रेमध्वज प्रधानया न्हापांगु रक एन रोल म्ये ‘बालाबालाचिंगु मिखा उहु, व मिखा ला मूसःगु अय्‌लाः’ पुलांगु व न्हूगु निपुं दुथ्याका तःगु दु ।

मांया म्ये मुना
मांयात लुमंकाः हालातःगु म्येत मुनाः ने.सं.११२२ स पिदंगु म्येचाः ‘मांया माया’ खः । म्युजिक नेपालं पिथंगु थुगु म्येचाःया मुक्कं म्ये च्वयादीम्ह हरि श्रेष्ठ खःसा लसय्‌ हनादीपिं कृष्णमान डंगोल व कमल परियार खः । थुकी म्ये हालादीपिं रचना जि.सी., लोचन भट्टराई, रमना श्रेष्ठ, मथुरा प्रधान, संजय खड्गी, शशिकला कटुवाल, अञ्जु पन्त व सानुमैंया ताम्राकार खः ।

निचाः म्येचाःया मुना म्ये
संकिपा ‘न्हिलाः न्हिलाः हुँ’ व ‘लूजः’ निचाः म्येचाःया म्येत दुथ्याकाः ने.सं.११२२ स पिदंगु म्येचाः ‘बच्छि बच्छि’ खः । ‘न्हिलाः न्हिलाः हुँ’ नेपालभाषाया भिडियो संकिपा खःसा ‘लूजः’ दबुली हालातःगु लोकंह्वाःगु म्ये मुना खः । फुक्क म्ये लसय्‌ हनादीम्ह गोबिन्द ह्यूमत खःसा च्वयादीपिं गोबिन्द ह्यूमत, बद्री बेदना, बिजयमान मानन्धर खः । हालादीपिं बि.आर.संगम, संगीता शाक्य, शान्ता शाक्य, बिजयमान सिं तुलाधर, राजकुमार, सरिता, गोबिन्द ह्यूमतपिं खः ।

दोहोरी म्येमुना
ताहाः दोहोरी म्येया मुना ने.सं.११२३ स पिदंगु म्येचाः ‘जिन्दगी ब्यूम्ह द्यः’ खः । सक्वयाम्ह संगीतकार विष्णु सक्वं थःगु संगीतय्‌ पिथना दीगु थुगु म्येचालय्‌ मुक्कं निपु दोहोरी ताहाःम्ये दुथ्याः ।
छपु म्ये थ्व जोबन छंगु लागिं खः वय्‌कलं च्वयादीगु खःसा मेगु म्ये जिन्दगी ब्यूम्ह द्यः जनकवि दुर्गालाल श्रेष्ठं च्वयादीगु खः । थुपिं म्ये हालादीपिं खः– मदनकृष्ण श्रेष्ठ, ज्ञानु राणा, पवित्र कसाः, श्रीकृष्ण श्रेष्ठ, श्रृजना श्रेष्ठ, रोशना तुलाधर, शान्ति नेपाली व शोभा ज्यापुनीपिं खः ।
थुगु म्येचालय्‌ दुथ्याःगु म्येत ः

गन गन वनाः लुइका हे त्वःता जिं,
छ्वैहल द्यवं छन्त ला जिगु लागिं,
जिन्दगी ब्यूम्ह द्यः का रे छन्त ल्वःम्ह व हे धयाब्यु

जिगु छेँ ला नेपाःदेय्‌ सक्व देय्‌या दथुइ लाः,
छंगु जि ला रतन छंगु मनय्‌ जि तन
थ्व जोबन छंगु लागिं खः

हिन्दी संकिपा म्येया लसय्‌
पुलां हिन्दी संकिपाया लोकंह्वाःगु म्येया लसय्‌ मुनाः ने.सं.११२४ स पिदंगु म्येचाः ‘नेवाः बलिउड’ खः । बांबांलाःगु पुलां हिन्दी संकिपाया म्येया लसय्‌ हालातःगु थुगु म्ये तसकं लोकंह्वाः । थुकी दुथ्याःगु दिल अपना और प्रीत पराया, मेरे सनमया लसय्‌ स्वपु म्ये दुर्गालाल श्रेष्ठं, सोलहवाँ साल, संगमया लसय्‌ लाभरत्न तुलाधरं, हरे राम हरे कृष्ण, आराधनाया निपु म्ये निर्मल तुलाधरं, यारानाया छपू म्ये सुरेश किरणं, चाइना टाउनया छपु म्ये मध्यान्ह रत्न कसालं, बीस साल बादया छपु म्ये विराज राजोपाध्यायं, प्रेम नगरया छपु म्ये रमेशकाजी स्थापितं च्वयादीगु खः । थुगु म्येचाः आनन्द तुलाधर, सुनिलरत्न तुलाधर, भूषणहरि श्रेष्ठ व अनिलरत्न तुलाधरपिन्सं पिथनादीगु खः ।

दापा म्ये
दापाया म्ये मुनाः ने.सं.११२४ स पिदंगु म्येचाः ‘थँहितिया थान दापा म्ये’ खः । थुगु म्येचाः केन्द्रीय मानन्धर संघया लुँबुन्हिया लसताय्‌ थँहिति मानन्धर गुथिं पिथंगु खः । थुकी थीथी खुपु रागय्‌ दापा म्ये दुथ्याः ।

भाषा स्यनेकने
विदेशी भाय्‌ स्यनेकनेया खँ मुनाः ने.सं.११२४ स पिदंगु म्येचाः ‘नेपालभाषा जापानी भाषा खँल्हाबल्हा टेप’ खः । थुगु भाय्‌ स्यने चाः जापानी नागरिक योशितेरु तेरानिशिं च्वयादीगु सपूmया लिधंसा कयाः यलया पासा ओबि पुचलं पिथंगु खः । थुकी उद्घोषणय्‌ जुन्को नाइतो व उदयरत्न बज्राचार्य अले विषयबस्तुइ सः बियादीपिं सुलिन्द्र शाक्य व साकिको बज्राचार्यपिं खः ।

न्हापांम्ह मिसा लय्‌चिनामि
पिदंगु म्येचाःया कथं लसय्‌ हनादीम्ह न्हापांम्ह मिसा उत्तरा मानन्धरया म्ये दुथ्याःगु म्येचाः ने.सं. ११०५ स पिदंगु ‘मांभाय्‌ म्ये पुचः’ खः । कृष्ण नेवालं पिथना दीगु थुगु म्येचालय्‌ मुक्कं झिपु म्ये दुथ्याः । थुगु म्येचालय्‌ उत्तरा मानन्धरलिसें म्ये हालादीपिं खः– जुजुकाजि रंजित, स्वर्ग नेवाः, राजन क्षेत्री, सपना परियार (सपनाश्री), दीप तुलाधर, दिलिप संगम, नबिनकाजि रंजित, बिष्णु महर्जन । उकी मध्यय्‌ निपु म्येय्‌ उत्तरा मानन्धरं लसय्‌ हनादीगु खः । थुकी न्हापांम्ह मिसा लय्‌चिनामि उत्तरा मानन्धरं लसय्‌ हनादीगु म्ये खः–
गन जुइ छ अय्‌ जि यःम्ह, म्हगसय्‌ वयाः क्यनीम्ह…….. च्वमि– लाभरत्न तुलाधर
न दिन दु जिगु न मतिना जिगु, न थ्व संसारय्‌ जितः म्वायेत लँपु दु …..च्वमि ः गौतम साय्‌मि
याकःमिसा सः, लय्‌ व च्वसाय्‌ म्ये
थःम्हं हे च्वयाः लसय्‌ हनाः म्ये हालादीम्ह बिना मानन्धरया म्ये दुथ्याःगु म्येचाः ने.सं. १११७ स पिदंगु म्येचाः ‘किपाः’ खः । थुकी झिपु म्ये दुथ्याका तःगु दु ।

दोलखा भाय्‌या म्ये
मुक्कं दोलखाया नेवाःभासं हालातःगु म्ये मुनाः ने.सं. ११२९ पाखे पिदंगु सिडीचाः ‘स्याउ दाइ’ खः । द्वाल्खा नेपालभाषा खलकं पिथंगु थुगु सिडीचालय्‌ मुक्कं भिंmछपु म्ये व छपु म्येया धून दुथ्याः । म्ये च्वयादीपिं त्रिलोचन बिहिन, बलराम श्रेष्ठ, जयराम श्रेष्ठ, मदनकृष्ण श्रेष्ठ, सुरेशचन्द्र प्रधान, दिपक स्वप्निल व आर.के. निर्मल खः ।
अथेहे म्ये हालादीपिं मदनकृष्ण श्रेष्ठ, स्वरुपराज आचार्य, बिनु मानन्धर, दिपक स्वप्निल श्रेष्ठ, रत्नशोभा महर्जन, रोमियो प्रधान, आभा आचार्य, सरस्वती मानन्धर, प्रयत्न श्रेष्ठ, रोशन चाकुबजि व नलिना चित्रकार खः । लसय्‌ हनादीपिं दिपक स्वप्निल श्रेष्ठ, त्रिलोचन बिहिन, मदनकृष्ण श्रेष्ठ, बलराम श्रेष्ठ, जयराम श्रेष्ठ, रोशन चाकुबजि, सुरेशचन्द्र प्रधान व अनिल तुलाधर खः ।
थुकी दुथ्याःगु म्येत थुकथं दु–
– थिपुल माँय ख्वाल स्वै दरसा जिउ
– भीमसीन देउय मन्दिरकु छन्त पियानच्वैनि
–राइतीय लोखु हायेनियाना करवा कु (स्वःलिसें स्वयेमगाः लसय्‌)
– द्वाल्खा उइहङ द्वाल्खामि पुङ काठमाण्डु पुर
– द्वाल्खाय भीमेश्वर स्याउ दाइ सुलिन सुलिन एरगि छन्त नापलाय रे हानन्
– थिपुल माँय ख्वाल स्वै दरसा जिउ
– गुल्प गुल्प याना छि भीमसनि देउय मन्दिरकु
– त्वाङ सोन होर ह छिन् हजि खारमा
– कालिन्चोकय चिमाल स्वना मजान ह्वयेन च्वना
– लोखु साकु बज बिये खँ बालकु नानिय–¥यापम्ये)
– गुनानु मसिउ पीर हाथियन
– जन मनपरइजु

मिखां मखंपिं सर्जक
यलयाम्ह उस्ताद गणेशलाल श्रेष्ठ छापाय्‌ दुकथं न्हापांम्ह मिखां मखंम्ह सर्जक खः । थ्वय्‌कलं संसारया न्ह्यागु बाजं नं थीकथं हे थायेफु धाइ ।
रेडियो नेपालय्‌ न्हिथं ज्याझ्वः न्ह्याके न्ह्यः थ्वयेकीगु बिहांचुलि धून थ्वय्‌कःया श्रृजना खः । थ्वय्‌कलं भिंmनिदँति दुबलय्‌ हे भारतय्‌ वनाः डिस्क रेकर्डय्‌ म्ये भरे याःगु खः । अनंलि सरोदवादक मोहनसुन्दर श्रेष्ठ सरोद वादनय्‌ नांदंंम्ह खः । अथे हे थन नरेन्द्र बाताजु नं लुमंके बहःजू । म्येहालामिपिं इश्वर अमात्य, अनिता महर्जन व राजभाइ डंगोलया याकः म्ये मुनाः म्येचाःत पिदंगु दुसा चिरिमाया महर्जन नं बुलुहुं संगीत ख्यलय्‌ झाःगु दु ।

भाय्‌हिला रुवाइ मुना
नेवाःभासं भाय्‌हिलाः रुवाइ मुना पिदंगु सिडी म्येचाः ‘सुलिं’ खः । थुगु सिडीचाः ने.सं. ११२१ पाखे श्रीमञ्जरी व निश्छलतां पिथना दीगु खः । भारतीय कवि हरिवंश राय बच्चनया अतिकं लोकंह्वाःगु रुवाई मुना सपूm ‘मधुशाला’यात जनकवि दुर्गालाल श्रेष्ठं नेवाःभासं भाय्‌हिलाः सपूm ‘सुलिं’ पिथना दीगु खः । उगु हे सफुती दुथ्याःगु रूवाइ मुनापाखें मुक्कं च्यापु म्येया मुना खः सुलिं । थुकी लसय्‌ हनादीम्ह संगीत प्रविण नरराज ढकाल खःसा लय्‌चिता (संगीत संयोजन) यानादीम्ह मदन परियार खः । रुवाई हालादीपिं खः नरराज ढकाल व प्रविणकुमार ताम्राकार । थुगु म्येचालय्‌ दुथ्याःगु रुवाईत
– त्वने प्याःचाया छेँय्‌ नं प्याहां वै सुलिमय्‌ थ्यंकाः त्वनेत मनू……सः नरराज ढकाल
– उलि हे जक बस त्वने दै अय्‌लाः ……सः नरराज ढकाल
– त्वँ हे मत्वँसें सुनां सुलिंया नामय्‌ हाकनं……सः नरराज ढकाल
– गुलि मतिना याये गुलि……सः नरराज ढकाल
– ल्हाः छ्वःसा गुगु न्ह्याये मदु तापाः व हे सलिं का यःगु जितः…..सः प्रविण ताम्राकार
– धुच्चापतिकं अय्‌लाः अय्‌लाः मूसः अय्‌लाः तैजक हुँ…..सः प्रविण ताम्राकार
– ल्हाती लायेन्ह्यः क्यनी सलिंचां मछाः मछाः थें पहः कयाः…..सः प्रविण ताम्राकार
– अन्तिम वस्तु तुलसी हः मखु जिगु म्हुतुसि बस् लायेब्यु सलिं…..सः प्रविण ताम्राकार