ईन्द्रायणी फिल्मस्पाखें ने.सं.११२९ दँय् निर्माण जूगु थुगु संकिपाः निर्देशक राजु स्यस्यः खः । थुकी बाखं सुरेन्द्र तुलाधर अले छायाँकार विनोद डंगोल खःसा कलाकारकथं भिन्तुना जोशी, राजु महर्जन, राजेन्द्रमान शाक्य, मञ्जु श्रेष्ठ, सुरेन्द्र तुलाधर, अमृतचन्द्र श्रेष्ठ, श्यामसुन्दर शिल्पकार, अर्णेश्वरी शिल्पकार दुथ्याः । संकिपाय् याकः म्ह्याय्या इहिपाः जुइवं छेँय् खनेदइगु सुन्यता व इहिपाः जुयाःवंगु छेँय् जुइगु व्यवहारया बाखं ब्वयातःगु दु ।
याकःचां जक च्वमेलु ब्वहलय् थनाः दनीगु माः । छम्ह बल्लाःम्ह मचां च्वमेलुयात निखे ब्वहलय् चुइकाः थनी । च्वमेलुं ब्वहलय् दनाः धुँन्या हीकी । थ्व माः तनीबलय् छथाय् जक च्वनी मखु । द्यःयाथाय् जूसा द्यः चाःहिली । मेथाय् जूसा थःपिनिगु लँपुकथं चाःहिलेगु याइ । चाःहिलीबलय् च्वमेलुं ब्वहलय् दनाः धुँन्या धंकाः ज्वनातइ । चाःहिकी धाःसा मखु । चाःहिले गात धायेव हानं छकः धुँन्या हीकाः क्वहांवइ । च्वमेलु क्वहां वल धायेव ब्वहलय् तःम्हेसिनं नं धुँन्या हीकेगु याइ ।
याक्वय् काकाः उकिइ दुगु सुका थें चीपुगु तार ल्हातं सालाः मेगु ल्हाःया पतिंचां थाइगु थ्व बाजंयात याक्वमुको, याकुपिंचा व याकुचा बभू नं धाइ । नेवाःतय् थीथी जात्रा पर्व व प्याखनय् थ्व बाजं थाइगु चलन दु । थ्व बाजं थ्यंमथ्यं १८ सेमि हाकः व १४ सेमि ब्या दुगु छिपय् यानातःगु भ्वकाचा दथु फुस्लुं यानाः बाय् पंत्वाःया छखेया गौ ध्यनाः मेखे च्वलय्चिया छ्यंगुलिं भुनाः सुका थें चीपुगु तार छ्यंगूया दथुइ ह्वतं दुछ्वयाः सिंकाय् थाकाः दयेकीगु खः । थौंकन्हय् थ्व बाजं उलि छ्यलाबुलाय् मदु ।