बौ केदार लाल श्रेष्ठ व मां जगना देवी श्रेष्ठया कोखं ने.सं. १०७३ कौलागाः आमै (लक्ष्मीपुजा), सुक्रबारखुन्हु येँया वंघः, नौमुगः गल्लिइ बूम्ह भाजु रेबन्त लाल श्रेष्ठ नेपालभाषाया लोकंह्वाःम्ह कलाकःमि खः । त्रिभुवन विश्वविद्यालयपाखें आइएतक अध्ययन यानादीम्ह भाजु श्रेष्ठ म्ये, प्याखं, नाटक व म्यूजिक भिडियोय् प्याखंम्वः जुयादी । समय्बजि, चाकुमाकु, कुचुकुचु आदि टेलिसिरियलया वय्कः छम्ह लोकंह्वाःम्ह प्याखंम्वः खः ।
कलाकःमि भाजु रेबन्त लाल श्रेष्ठ ने.सं. १०९५ निसें मुनासः संस्थापाखें यक्व ख्यालः म्हितादिलसा लिपा पलिस्था संस्थापाखें नं ख्यालः कासाय् ब्वति कयादिल । वय्कलं ‘द्वंकाः नं तये मज्यूगु पलाः’ नांया बाखं मुना सफू पिथना दीगु दु । भाजु श्रेष्ठयात न्याक्वःगु मुनासः ख्यालः कासाय् अभिनय हःपाः सिरपाः व न्याक्वःगु पलिस्था बांलाःम्ह ख्यालःम्वः सिरपालं छाय्पिया तःगु दु ।