सित्यालय् पलाः तयाः दने । कुत्याति हाकःगु त्याच्चा चिंगु सिँ बाकुतिइ च्वय् तुति तये छिंक घात कयाः च्वय्पाखे छत्वाःचा भेसें लुइकाः छानातइ । क्वय् पाचुका तइ । सिँ याउँगु व बल्लाःगु जातया जुइ । घात कयातःथाय् पालि दिकाः निपां तुतिइ त्वान्नाःया पिनेपाखे सिँ लाकाः पत्ति बालां क्वातुक ची । दनेत बः कयाः दनी । दने धुनधायेव पलाः छिनांतुं च्वनेगु याइ । धुँन्या हीकेत नं पलाः छिछ्युं हे हीकी । दनाच्वने माल धायेव धुँन्या तुतां चुइगु याइ ।
धुँन्या स्यनीबलय् स्यनीगु छगू माः । सिँ तुतिं चुयाः निम्ह मस्त जँ जँ ल्वाकाः दनी । इमि जवंखवं मेपिं निम्ह मस्त च्वनाः भर बीकाः च्वमेलु च्वय् वनाः सिँ तुतिं चूपिं निम्हसिगु ब्वहलय् निपातुतिं चुयाः धुँन्या हीकी । धुँन्या हीकीबलय् प्यम्हसिनं छ्यं क्वछुकी । च्वमेलु क्वहां वल धायेव प्यम्हसिनं नं पालंपाः धुँन्या हीकी । थुबलय् सिँ तुतिं चूपिन्त म्हं छपु छपु धुँन्या बी । भचा भचा पाक च्वनाः निम्हसिनं धुँन्या हीकी । च्वमेलु च्वय् क्वय् जुइत मेपिन्सं ग्वाहालि याइ ।
माः तनेत दयेकीगु खः । स्वकु स्वकुति पाकाः प्यकुनय् प्यंगः स्वकु प्यकुति हाकःगु थां थनी । थामय् निच्वतय्सं क्वलाछिति क्वय् दुनेपाखे साःह्वः खनातइ । च्वय्या च्वतय् खाँस कयातइ । थुकी प्यखें चिकीचाग्वःगु निनाः प्यंगः दिकाः चुकू तयाः छधी जुइकाः सिपौ लानाः खः दयेकी ।
थामं थांया प्यंगुलिं कवलय् साःह्वतय् साः दुतछ्वयाः क्वं च्वय् क्रस यानाः कवलं निगः निगः सिँ च्वकी । थथे च्वकागु दक्वं सिँ दथुइ खाँस कयाः ल्वाकाः चुकू तइ । च्वकाय् गजू थें दुगु थां छगः दथुइ थनाः सिपौया च्वय् खनेदयेकी । खः दयेत सिँ छगः धंकाः सिपौ लानाः पथं च्वका चिनाः जक नं दयेकेगु याः ।
सिंहया स्वरुप वयेक च्वनाः दनीगु माः । मस्त निम्ह पुलिं चुयाः घ्वंस्यानाः च्वनी । इपिं निम्हेसिया दथुइ च्वनाः निपा तुतिं निम्हेसित कताकाः छम्ह मेम्ह दनी ।
भचा पुतुं च्वनाः च्वमेलुयात निखे ब्वहलय् न्हुइकाः हानं बुलुहुं दनी । वयागु ब्वहलय् दनाः च्वमेलुं धुँन्या हीकाः थुगु माः तनी । च्वमेलु क्वकायेत हानं छकः पुतुुं च्वनी । च्वमेलु क्वय् वये धुंकल धायेव स्वम्हसिनं पालंपाः न्ह्यातले धुँन्या हीकेगु याइ ।