नेपालभाषाया संकिपा ख्यलं लूम्ह स्वतन्त्र संसार महर्जन बहुप्रतिभां जाःम्ह कलाकार खः । अबु तेजबहादुर महर्जन व मां कान्छीमाया महर्जनया कोखं ने.सं. ११०३ सिल्लाथ्वः पुन्हि, सुक्रबारखुन्हु यल महानगरपालिका २१ वडा, ख्वनाय् वय्कःया जन्म जूगु खः ।
ने.सं. ११२६ दँय् वय्कःया मू भूमिकाय् न्हापांगु संकिपा ‘निफ्वः स्वां’ पिदंगु खः । अनंलि ‘जिपिं बदमाश मखु’, ‘इहिपाः’ संकिपाय् वय्कलं अभिनय यानादीगु खः । संकिपाया नायः जुयाः स्वकुपिनिगु नुगलय् बांलाःगु छाप त्वःतादीम्ह स्वतन्त्रं थीथी म्यूजिक भिडियोय् नं मोडल जुयाः म्हितादीगु दु । वय्कलं खुपु नेवाः म्ये व झिपुं मल्याक खस भाय्या म्यूजिक भिडियो म्हितादीगु दु । ‘ग्वाज्यःचा’ संकिपा निर्माण व निर्देशन, ‘अय् जि यःम्ह’, ‘हसना’, ‘पियाच्वना’ संकिपाया निर्देशन नं यानादीम्ह वय्कः छम्ह ग्राफिक्स् डिजाइनर अले संसार अनलाईन टेलिभिजन, संसार अनलाईन न्यूज डटकमया संचालक संचारकःमि नं खः । एम्स् इन्टरटेन्टमेन्टया पलिस्था नायः, संसार क्रियशन्स् नेपालया प्रमुख वय्कलं थीथी संघसंस्थाय् च्वनाः संकिपा, संगीत, म्यूजिक भिडियो ख्यःया विकासया निंतिं ज्या याना च्वनादीगु दु ।
वय्कःयात ज्यापु महागुथिपाखें संकिपाकःमि सम्मान द्यछाःगु दुसा लहना मिडियापाखें संकिपा ख्यलय् नापं संचार ख्यलय् योगदान यानादीगुलिं हंगु दु ।
‘ओ प्रिय लिफः स्वयाः’, ‘जात्राया हूलय् द्यः स्वः वनाः’, ‘रतन अति हे जि यःम्ह’, ‘जिके नं भतिचा माया दु छंगु लागि’, ‘छ मुसुं न्हिलाः स्वःसा जिगु’, ‘भिंद्यः गुथियागु मूसःगु अय्लाः माया’, ‘घण्टाघरया क्वय्’ थें ज्याःगु म्येय् सदां लुयाच्वनीम्ह वरिष्ठ म्येहालामि स्वयम्भूराज शाक्यया जन्म अबु बुद्धिराज शाक्य व मां नानीबेटी शाक्यया कोखं ने.सं. १०७७ दँय् हःखा त्वाः, यलय् जूगु खः । वय्कलं संगीत विषयय् इलाहावाद युनिभसिर्टिं डिप्लोमा यानादीगु ख । रेडियो नेपालया विशिष्ट श्रेणीया गायक वय्कलं गायन यात्रा वि.सं. २०२६ सालंनिसें न्ह्याकादीगु खः ।
सांस्कृतिक संस्थानय् सहायक गायन प्रवन्धक पदय् २५ दँ सेवा यानाः अवकाश कयादीम्ह वय्कलं रेडियो नेपाल आधुनिक संगीत सम्मेलन (२०३८)य् ल्यू सिरपा, रत्न रेकर्डिङ संस्थानया ग्वसालय् जूगु ‘प्रतिभाको खोजी’ (२०३८) य् न्हाप सिरपाः, रत्न रेकर्डिङ संस्थानया हे ग्वसालय् जूगु मध्यमाञ्चल क्षेत्रीय लोकगीत प्रतियोगिता (हैटौंडा २०४२) य् न्हाप सिरपाः, बागमती अञ्चलव्यापि नेपालभाषा गीत प्रतियोगिताय् ल्यू सिरपाः, यल अध्ययन मण्डल गोष्ठी नेपालभाषा गायन धेंधेंबल्लाः कासाय् ल्यू सिरपाः, पोखराय् जूगु भिडियो चलचित्र महोत्सव (२०४८)य् ‘शंका’ संकिपां सर्वोत्कृष्ट गायकया सिरपाः, सर्वोत्कृष्ट गायक (युगल गीत) – पेजथ्री पिपुल्स च्वाइस अवार्ड त्याकादीगु दु ।
वय्कलं न्हापांगु सार्क शिखर सम्मेलन (बंगलादेश – २०४२) य् नेपाःपाखें म्येहालामिकथं प्रतिनिधित्व यानादीगु खःसा सांगीतिक यात्राया हे झ्वलय् तिब्बत, श्रीलंका, साउदी अरेबिया, जापान, हङकङ, बैंकक, भारत, बंगलादेशय् थःगु प्रतिभा न्ह्यब्वया दीगु दु । वय्कःया लोकं ययेकूगु सृजना न्ह्यब्वयेगु निंतिं स्वयम्भूराज शाक्य एकल साँझ २०६१ नं जूगु खः । अथेहे आरोह सन्ध्या (स्वयम्भूराज शाक्य एकल गायन प्रस्तुति), नारायण गोपालको सम्झनामा….. (एकल साँझ) व “जुजु वेयर्स ओ प्रिय लिफः स्वयाः स्वयम्भूराज शाक्य एकल साँझ’ जूगु दु । वय्कः कोरोना संक्रमण जुयाः ने.सं. ११४१ चौलागाः त्रयोदसि, आइतबारखुन्हु ६४ दँया वैशय् थुगु संसारं बिनावन ।
म्येहालामि स्वस्ती महर्जनया जन्म किपूया मान त्वालय् ज्ञानबहादुर महर्जन नेवाः व शान्ति महर्जनया क्वखं वि.सं. २०४७ सालय् जूगु खः । वय्कलं हालादीगु ‘अन्ति पनाः’, ‘सलिं ज्वनाः’ म्ये तसकं लोकंह्वाः । इन्द्रेणी सांस्कृतिक समाज लिसे आवद्ध दुम्ह वय्कलं पेजथ्री नेपालभाषा पिपल्स च्वाइस अवार्ड ११४२ य् उत्कष्ट मिसा सःया अवार्ड त्याकादीगु दु ।