सनम कुमार श्रेष्ठ कलाकारिता ख्यलय्‌ छम्ह निर्देशक, कलाकार व मेकअप आर्टिष्ट जुयाः ज्या यानाच्वंम्ह खः । येँया वँतु त्वालय्‌ ने.सं. १०८० चिल्लागाः चःह्रे, सनिबारखुन्हु बूम्ह वय्‌कःया अबुया नां पहलमान श्रेष्ठ व मांया नां पार्बति श्रेष्ठ खः । वि.सं. २०४४ सालय्‌ पिदंगु नेवाः संकिपा “सिलु”इ म्हिताः कलाकारिता ख्यलय्‌ पलाः न्ह्याकादीम्ह वय्‌कः ‘न्हाय्‌कं’ संकिपाया च्वमि अले ‘लाय्‌ मदु पसः कलाः मदु ससः’, ‘मतिना ला अन हे दु’, ‘ख्याः बच्छि नी बच्छि’, ‘गज्याःगज्याःपिं मनूत दइ थन’ लिसेंया झिगूति नेवाः संकिपाया निर्देशन यानादीम्ह खः । संकिपा, प्याखं, म्यूजिक भिडियो लिसें कलाकारिताया थीथी विधाय्‌ ल्हाः न्ह्याकादीम्ह वय्‌कलं मेकअप, अभिनय, निर्देशन व च्वज्या नापं यानाः प्यसःगुलिं मल्याक संकिपाय्‌ ज्या यानादी धुंकूगु दु । पेजथ्री पिपुल्स च्वइस अवार्ड वि.सं. २०६६ व नेपालभाषा स्टार म्युजिक भिडियो अवार्ड २०७७ लगायतया सिरपाः त्याकादी धुंकूम्ह वय्‌कः थीथी सम्मानपाखें सम्मानित जुयादी धुंकूम्ह खः ।

सपनाश्री नेपाली संगीत ख्यलय्‌ छम्ह लोकंह्वाःम्ह म्येहालामि खः । थ्वय्‌कःया जन्म ने.सं. १०९१ (वि.सं. २०२८जेठ)य्‌ येँया महाबू (महाबौद्ध) त्वालय्‌ जूगु खः । थ्वय्‌कःया अबु मदन परियार.खः ।
नेवाःतय्‌ त्वालय्‌ जन्म जूम्ह व ब्वलंम्ह जुयाः थ्वय्‌कःयात नेवाः भाय्‌ ल्हायेत थाकु मजू । अथे जुयाः मचा इलंनिसें हे नेवाः दबुली थ्वय्‌कलं म्ये हालादीगु खः । थ्वय्‌कःया अबु छम्ह लोकंह्वाःम्ह संगीतया ज्ञाता जूगुलिं नं संगीत ख्यलय्‌ वयेत थाकु मजुल । थ्वय्‌कलं न्यादँति दुबलय्‌ ब्वनेकुथि वनेन्ह्यः हे रेडियो नेपालय्‌ मचाम्ये रेकर्ड यानादीगु खः । थ्वय्‌कलं थःगु ज्वः मदुगु सलं नेवाःभाय्‌या सलंसःपु म्ये हालादीगु दु । थ्वय्‌कलं हालादीगु म्ये फुक्क धै थें लोकंह्वाः । गथेकि स्वय्‌म्भुराज शाक्यलिसेंया ‘ओ प्रिय लिफः स्वयाः’, ‘थौं सुथय्‌ न्ह्यलं दनाः’, ‘सिरि सिरि फसं जितः’ । उकी मध्यय्‌ नं ‘स्वयेगु मन जुल रे’ म्ये ला नेवाः भाय्‌ मथूपिं गैर नेवाःतय्‌त नं उतिकं हे यःगु म्ये खः । लोक, आधुनिक, भजन फुक्क कथंया म्ये हालादीम्ह थ्वय्‌कलं आपालं म्येचालय्‌ थःगु सलं छाय्‌पिया दीगु दु  ।
थ्वय्‌कः मचाल्यासेबलय्‌ हालादीगु आपालं नेवाः लोक म्येत दु । थ्वय्‌कःया म्ये दुथ्याःगु न्हापांगु म्येचाः ‘नेपालभाषा लोक म्ये १’ खः । थ्वय्‌कःया सलय्‌ स्वपु म्ये दुथ्याःगु थुगु म्येचाः ने.सं. ११०४ स पिदंगु खः । नेपालभाषाया आपालं म्येचालय्‌ थ्वय्‌कःया म्येत दुथ्याना च्वंगु दु । थ्वय्‌कलं नेपालभाषाया तसकं लोकंह्वाःगु म्येहना प्याखं ‘निमन्त्रणा’ य्‌ नं म्ये हालादीगु खः ।
मचाल्यासेया इलय्‌ उत्तमलाल श्रेष्ठं च्वयादीगु व द्वारिकालाल जोशिं लसय्‌ हनादीगु ‘सागर भरी जून तारा, जूनभित्र तिमी’ हालेवं संगीत ख्यलय्‌ लोकंह्वाःम्ह खः । थ्वय्‌कलं मेगु म्ये ‘हेरेको तिमीलाई आँखाले होईन’ हालेधुंकाः छम्ह बांलाःम्ह म्येहालामिकथं संगीत ख्यलय्‌ झन् बय्‌बय्‌ जुल । थ्वय्‌कलं नेवाः, खस, भोजपुरी भाषाय्‌ नं म्ये हालादीगु दु । आपालं संकिपाय्‌ नं म्ये हालादीगु दु । संकिपाया म्ये हालेगु झ्वलय्‌ हे थ्वय्‌कःया नां सपना परियारं सपनाश्री जूवंगु खः । गुगु नां नेपाःया संगीत ख्यलय्‌ ल्वःमनी मखुगु नां जुयाब्यूगु दु ।
थ्वय्‌कलं थीथी बिधाय्‌ निद्वलं मल्याक म्ये हालादी धुंकल । मचाबलय्‌ निसें हे म्ये हालाः थीथी मानसम्मान पदविं छाय्‌पी धुंकूम्ह थ्वय्‌कः थौंकन्हय्‌ न्यूयोर्कय्‌ च्वनादी । थ्वय्‌कलं बिमल बुढाथोकीनाप निब्याहाः यानादीगु खः । थ्वय्‌कःया स्वम्ह म्ह्याय्‌पिं दु । विदेशय्‌ च्वनाः नं संगीत साधनारत जुया च्वनादीम्ह थ्वय्‌कलं थःगु यइपुगु सलं म्ये हालाः हे थःगु व मस्तय्‌गु भविष्यया निंतिंं न्ह्यज्याना च्वनादीगु दु ।

सा स्वर निसें नि स्वरतक न्हय्गू स्वरया छगू पुचःयात सप्तक धाइ । छगू सप्तकदुने प्यंगू कोमल स्वर व छगू तीव्र स्वर नं दइ । छुं नं संगीत रचनाय् सामान्यतया स्वंगू सप्तकदुने लानाच्वंगु दइ । स्वंगू सप्तक धयागु तार सप्तक, मध्य सप्तक व मन्द्र सप्तक खः । दसुया निंतिं हार्बिनया दथुइच्वंगु मध्य सप्तक खः । मध्य सप्तकया स्वरया आखलय् छुं नं चिं दइ मखु । जवय् च्वंगु तार सप्तक खः । तार सप्तकया स्वरया आखःया च्वय् सिन्हःफुति दइ । मध्य सप्तकया खवय् च्वंगु मन्द्र सप्तक खः । थुकी स्वरया क्वय् सिन्हःफुति दइ ।
गथे कि –
पÞ धÞ निÞ सा रे ग म प ध नि सां रें गं मं

कीर्तिपुण्य वज्रधातुचैत्य महाविहारया पुरुषमुनि व रविप्रभा बज्राचार्यया कोखं ने.सं. १०२८ दिल्लाथ्वः गुरुपुन्हिकुन्हु येँ, लगंबहालय्‌ सप्तमुनि बज्राचार्य (भाइकाजी गुरुजु)या जन्म जूगु खः । वसप्वलं
तःछेँबहाःया बुद्धदर्शनहर्ष बज्राचार्ययापाखें बौद्ध कर्मकाण्डया नापं चचामे व नृत्य एवं मेमेगु नं कुशलतापूर्वक प्रशिक्षण कयाबिज्यात । थम्हं सयेकागु चचामे व नृत्य बौद्ध परम्परागत रुपं पुजा जुइथाय्‌ चैत्य जीर्णोद्धार, अहोरात्री होम, पञ्चताल आधारय्‌ मुद्रापुजा नं छ्यलाबिज्यात ।
वि.सं. २०१३ सालं जुजु महेन्द्रं वसपोलया चर्यामे व नृत्यं प्रभावित जुयाः दरबारय्‌ सःतके हयाः मञ्जुश्री चर्यानृत्य हुइकाः स्वयाबिज्यात । २०२२ सालं त्रिविवि अन्तर्गत नृत्य शिक्षा विषय सैद्धान्तिक व व्यावहारिक पक्षया पाठ्यक्रम दयेकाः न्ह्यब्वया बिज्यात । थुकी पौराणिक, धार्मिक एवं शास्त्रीय नृत्य अन्तर्गत चर्यानृत्य दुसा थुकियात प्रमाणपत्र निसें डिग्री तकया पाठ्यक्रमय्‌ ब्वथलाः दयेकूगु जुयाच्वन ।
वि.सं. २०३३–३४ य्‌ सांस्कृतिक संस्थानय्‌ नृत्य प्रशिक्षक जुयाबिज्यातसा स्कूल, क्याम्पसय्‌ नं सैद्धान्तिक व प्रयोगात्मक चर्यामे, नृत्य एवं मेमेगु स्यनेगु ज्या यानाबिज्यात । ख ला वसप्वलं २०२१ सालय्‌ त्रिवर्षीय योजना अन्तर्गत नेपाल राजकीय प्रज्ञाप्रतिष्ठानय्‌ मुद्रा (नृत्य मुद्रा) अन्वेषक जुयाः स्वदँ व लिपा संस्कृति विभाग अन्तर्गत राष्ट्रिय नाचघरय्‌ (उगु संस्था लिपा सांस्कृतिक संस्थानय्‌ परिणत जुल) वि.सं. २०४५ साल तक चर्यानृत्य व मुया ज्या यानाबिज्यात ।
वसप्वलं संस्थानय्‌ मञ्जुश्री नृत्य क्यनाबिज्यात । थुबलय्‌ जुजु महेन्द्रं लय्‌तायाः नगद सिरपाः बिलसा थीथी क्याम्पस व स्कूलय्‌ ब्वति कयाः थःगु नृत्य व मेया प्रतिभा क्यनाः न्हाप, ल्यू, लियांल्यू सिरपाः नं कयाबिज्याःगु जुयाच्वन । २०१७ सालं पुरातत्व एवं संस्कृति विभागं ग्वसाः ग्वःगु अधिराज्यव्यापी नृत्य प्रतियोगिताय्‌ मञ्जुश्री नृत्यं न्हाप सिरपाः त्याकूगु जुयाच्वन ।

सप्तरत्न बज्राचार्य (भाजु गुर्जु) मां जोगप्रभा व अबु चर्यानृत्यया गुरु धर्मरत्न बज्राचार्यपाखें वि.सं. १९७२ चैत्र १८ गते रत्नकीर्ति महाविहार, मखंबहालय्‌ जन्म जूगु खः ।
साधारण शिक्षा कयाः थीथी सरकारी कार्यालयय्‌ ज्या यानाः अवकास कयादिल । वय्‌कलं थीथी तःधंगु व चीधंगु पुजा आजाय्‌ चचा म्ये हालेगु व नृत्य यायेगु नापं पैंताखिँ थायेगु व पुइगु कुलया ज्या यानाबिज्यात । शिराहुति, मांसाहुति, छत्तिससम्बर, सिंदुराभिषेक (रहस्य विधि पूजा आदिइ चर्या म्येव नृत्य एवं उपाध्याय व दिर्घाचार्य जुयाः ब्वति कयाबिज्याःगु जुल ।

अभिनयया ख्यलय्‌ पलाः न्ह्याकावया च्वनादीम्ह सबिन शाक्यया जन्म ने.सं. १०८८ दँय्‌ ङतय्‌ अबु बीरमान शाक्य व मां धनदेवी शाक्यया कोखं जूगु खः । सबिन शाक्यया धात्थेंगु नां रविन्द्र मान शाक्य खः । ‘हिजो आजका कुरा’ नांयागु टेलिसंकिपापाखें अभिनयय्‌ पलाः न्ह्याकादीम्ह सबिन शाक्यया ‘सुभाय्‌’ दकलय्‌ न्हापांगु नेवाः संकिपा खः । संकिपाया नापनापं आपालं ख्यालः व नाटकय्‌ अभिनय याना दीधुंकूम्ह सबिनया ‘तिमिला’, ‘पपू मदुम्ह झंगः’, ‘न्यल्लब्यां’, ‘सत्य धरोधर्म’ व ‘तानांज्यः’ लिसेंया आपालं नेवाः संकिपा पिदनेधुंकूगु दु । प्रेमध्वज प्रधान स्मृति हास्य अभिनेता पुरस्कार, चौंथो एपिक नेपाल म्यूजिक अवार्ड सन् २०२२ य्‌ हास्य कलाकार व नेपालभाषा स्टार म्यूजिक भिडियो अवार्ड सन् २०२२ य्‌ सर्वश्रेष्ठ मोडलया सिरपाः नं त्याकादीगु दु । वय्‌कः नेपालभाषा संकिपा संघया कार्यसमिति दुजः नं खः ।

म्येहालामि सरिता शाहीया जन्म अबु पूर्णबहादुर शाही व मां नातिबेटी शाहीया कोखं ने.सं. १०९७ दिल्लाथ्वः चौथि, मंगलबारखुन्हु येँया कमलपुखुलिइ जूगु खः । वय्‌कलं वि.सं. २०५४ सालय्‌ राष्ट्रिय नाचघरपाखें थःगु कलायात्रा न्ह्याकादीगु खः । २०७१ सालय्‌ न्हापांगु नेवाः म्ये ‘सहः याये मफु’ रेकर्ड यानादीम्ह वय्‌कः २०७१ सालय्‌ पूmलबारी सम्मेलनया म्ये कासाय्‌ नेवाःम्येपाखें उत्कृष्ट जुयादीगु खः । २०७१ सालय्‌ हे रेडियो नेपालया आधुनिक म्ये कासाय्‌ नं लियांल्यू लाकादीगु खः । संगीतय्‌ स्नातक यानादीम्ह वय्‌कलं २०५६ सालय्‌ ‘ब्राइटर तिम्रो सुर मेरो गीत’य्‌ ब्वति कयाः उत्कृष्ट जुयादीगु खःसा २०५६ सालय्‌ पद्मकन्या कलेजया आधुनिक म्ये कासाय्‌ नं उत्कृष्ट जुयादीगु खः ।
२०७० सालय्‌ सफल एल्बमया ‘जुग बित्यो’ म्येपाखें बेष्ट फिमेल भोकलिष्ट, बक्स अफिस म्यूजिक भिडियो अवार्ड, पावर न्यूज अवार्ड, नेपाल म्यूजिक फेशन अवार्ड त्याकादी धुंकूगु दुसा कलानिधि इन्दिरा संगीत महाविद्यालयपाखें नगदसहित हना, ए.एम.एस नेशनल अनर २०७९ पाखें हना लःल्हाना कयादी धुंकूगु दु । सरीता शाहिंं नेपालभाषाया ८० पु व खस भाषाया १२० पु म्ये रेकर्ड यानादी धुंकूगु दु । कला न्ह्यब्वयेगु झ्वलय्‌ वय्‌कलं पोखरा, विराटनगर, बुटवल, राजस्थान, माउन्ट आबु, इजरायल, इंग्ल्याण्ड भ्रमण यानादीगु दु ।
वय्‌कलं नेपालभाषाया म्येमुना ‘मतिनाया चिखि’ पिथना दीगु दुसा ‘जोवनया रंग’ म्येमुनाय्‌ नं वय्‌कलं हालातःगु स्वपु म्ये दुथ्याना च्वंगु दु ।
‘वसन्त ऋतु’, ‘लाय्‌ मदु पसः कलाः मदु ससः’, ‘जामनः गुभाजु’, ‘लाखे भाजु’, ‘कृषा गौतमी’, ‘पटाचारा’, ‘कुमति’ थें जाःगु नेपालभाषाया संकिपाय्‌ नं वय्‌कलं म्ये हालादीगु दु ।

वस्ताद साईला (अष्टमान श्रेष्ठ) नेपाःया संगीत ख्यलय्‌ तसकं लोकंह्वाःम्ह व स्यल्लाःम्ह सर्जक खः । थ्वय्‌कःया जन्म येँया पशुपति देवपटनय्‌ ने.सं. १०१४ पाखे जूगु खः । थ्वय्‌कः अबु बखतमान श्रेष्ठ व मां गुहेश्वरी श्रेष्ठया साहिँलाम्ह काय्‌ जुयाः साईलाया नामं नांजाःगु खः ।
मचाइलंनिसें संगीत यःम्ह थ्वय्‌कलं मचाल्याय्‌म्ह बलय्‌निसें हे दबुली म्ये हालेगु यानादीगु खः । थ्वय्‌कलं मचाल्याय्‌म्ह इलय्‌ हे कलकत्ताय्‌ वनाः पं. लक्ष्मीकान्त, उस्ताद सूर्य मिश्र, उस्ताद शिव व उस्ताद गुफर खाँपिंलिसें झिंखुदँतक संगीत ज्ञान कयादिल । लिसें अबले अन च्वनाः लजगाःलिसें मेपिन्त थःम्हं नं संगीत स्यनेगु यानादिल । भारतय्‌ झिंखुदँतक्क संगीत ज्ञान कायेधुंकाः लिपा नेपाः लिहां झाल । अले थ्वय्‌कलं थासंथासय्‌ वनाः थःगु प्रतिभा न्ह्यब्वयेगु यानादिल ।
लिपा पाल्पाय्‌ च्वंझाःबलय्‌ वय्‌कलं तानसेनया सानुमैंया श्रेष्ठलिसें यःत्यः जुयाः इहिपाः यानादिल । थ्वय्‌कःपिनि छम्ह म्ह्याय्‌ दयेधुंकाः कलातं त्वःतावन । लिपा बःचाधिकः जूबलय्‌ म्ह्याचं नं त्वःतावन । कलाः व म्ह्याय्‌ मदयेधुंकाः थ्वय्‌कःया जीवन निरस जूगु खः । लिपा फुकसिया सल्लाहं हानं ने.सं. १०५४ पाखे ख्वपयाम्ह बेलायतीदेबी कर्माचार्यलिसे इहिपाः यानादिल । थुम्ह कलाःपाखे छम्ह काय्‌ व प्यम्ह म्ह्याय्‌ दु । काय्‌ रत्नमान श्रेष्ठ नं नेवाःम्ये ख्यःया लोकंह्वाःम्ह सर्जक खः ।
निब्याहाः धुंकाः थ्वय्‌कः हानं संगीतय्‌ न्हापा थें हे सक्रिय जुयादिल । अले वय्‌कःपिं कलकत्ताय्‌ च्वंझाल । थुबलय्‌ हे वय्‌कःयात डिक्स रेकर्डय्‌ म्ये भरे यायेत ह्वःताः चूलात ।
ने.सं. १०५६ पाखे वय्‌कलं ग्रामोफोनय्‌ थःगु प्यपु म्ये रेकर्ड यानादिल । उकी मध्यय्‌ छपु म्ये ‘कालो ठेकी नारान काली काठको’ थुलि लोकंह्वात कि लोकं वय्‌कःयात ‘काली ठेकी साईला’ धकाः म्हसीकेगु नं यात । थ्व म्येया रेकर्ड चालं आपालं बजाः काःगु खः । झ्याउरे म्ये हालेगुली सुनां ध्वये मफुम्ह वय्‌कलं गजल भजनत मेपिनिगु लिसें थःम्हं हे म्ये च्वयाः नं रेकर्ड यानादीगु दु । थ्वय्‌कलं नेवाः संगीत ख्यःयात नं थपु यानादीगु दु । मचाइलय्‌ नेवाः म्ये भजन हाहां संगीत ख्यलय्‌ दुहां झाःम्ह थ्वय्‌कलं ग्रामोफोनय्‌ ग्वःपु म्ये हालादिल छुं ल्याःचाः मदु । आपालं दयेमाःगु खः तर नं वय्‌कःया सलय्‌ दुगु स्वपु म्ये– ‘छि बिना मदु जितः आज्ञा रे कृष्ण’, ‘स्थीर जुइमखु थःगु जोभन सदान रे’, ‘स्वव स्वव कृष्णजुया चाला’ जक झीगु न्ह्यःने खनेदु ।
कलकत्ताय्‌ च्वनाः थःगु प्रतिभां बय्‌बय्‌ जुइधुंकाः लिपा उत्तर प्रदेशया बलरामपुरय्‌ नं संगीत साधनालिसें खुदँतक लजगाः यानादीगु खः । अनं लिपा वय्‌कः हानं नेपाः झाल । जीवनया लिपांगु इलय्‌ विरक्त जुयाः संगीत ख्यलं तापाना च्वनादीम्ह थ्वय्‌कः ने.सं. १०७७ प्वहेलागाः त्रयोदसि, सोमबारखुन्हु थ्व संसारं तापाना दिल ।

गायक सानुकाजी मानन्धरया जन्म २००६ सालय्‌ अबु बेखानारायण मानन्धर व मां लक्ष्मीदेवी मानन्धरया कोखं येँया पाक्वय्‌ जूगु खः । वय्‌कःया सांगीतिक पुचःया नां ‘चिम्पांजी’ खः । नेवाः म्ये व खस नेपाली निगुलिं ख्यलय्‌ वय्‌कःया दक्षता खनेदु । वय्‌कःया ‘मुखू’ नांगु नेवाः म्येचाः नं पिदंगु दु ।

म्येहालामि सानुबाबु महर्जन अबु मंगललाल महर्जन व मां आशामाया महर्जनया कोखं ने.सं. १०९१ प्वहेलागाः आमै, मंगलबारखुन्हु जन्म जूगु खः । म्ये च्वयेगु नापं संगीत तयेगु ज्या नं याना च्वनादीम्ह वय्‌कः मचांनिसें संगीतपाखे नुगः क्वसाःम्ह खः । वय्‌कःयात थुगु ख्यलय्‌ त्वाःत्वालय्‌ परम्परागत जुइगु संगीत प्रशिक्षणपाखें हःपाः चूलाःगु खः । महर्जनं च्यागू तगिमय्‌ ब्वना च्वनादीबलय्‌ स्कुलया ज्याझ्वलय्‌ लसकुस म्ये हालाः दबुलिइ म्ये हालेगु ज्या न्ह्याकादीगु खः । ‘जितः यःम्ह मयजु छ’ म्ये हालाः नेपालभाषा ख्यलय्‌ पिलूझाःम्ह म्येहालामि महर्जनया न्हापांगु म्येमुना ने.सं. १११८ दँय्‌ पिदंगु ‘जितः यःम्ह मय्‌जु’ खः । ने.सं. ११२६ दँय्‌ वय्‌कःया निगूगु म्येमुना ‘सिचु फय्‌’ पिदन । थुगु म्येमुनाया दुर्गालाल श्रेष्ठं च्वयादीगु ‘छ गन गन’ म्ये लोकं ययेकूगु म्ये खः । ने.सं. ११३१ दँय्‌ मेगु म्येमुना ‘गजब खः थ्व मतिना’ पिदन । वय्‌कलं नेपालभाषा व खस नेपाली भाय्‌या यानाः २०० पुति म्ये हाला दीधुंकूगु दु ।
वय्‌कःया उत्कृष्ट मिजंसःया निंतिं थःगु हे संगीतय्‌ हालातःगु ‘छ गन गन, जि गन गन’ म्येपाखें ने.सं. ११२६ दँय्‌ इमेज अवार्ड त्याकादीगु खःसा दिपा महर्जननाप हालादीगु ‘छंगु लागि हे जि’ म्येपाखें ज्वःम्ये विधाय्‌ पेजथ्री पिपुल्स च्वाइस अवार्ड (११३३) त्याकादीगु, ने.सं. ११४३ दँय्‌ लिटिल स्टार नेपालभाषा म्येकासाय्‌ दकलय्‌ बांलाःम्ह संगीत निर्देशक जुयादीगु खः । अथेहे ने.सं. ११३७ स ‘भिंगु कर्म’ म्येपाखें दकलय्‌ बांलाःगु मिजं सःया पेजथ्री अवार्ड नं त्याकादीगु दु ।
दान्यहिरा हःपाः सिरपाः नं त्याका दीधुंकूम्ह महर्जनं नेपाल फेसन म्यूजिक अवार्ड (२०२२)य्‌ सर्बोकृष्ट भाषाभाषी गीत गायन (नेपालभाषा)पाखे दकलय्‌ बांलाःगु मिजं सःया सिरपाः अले, दकलय्‌ बांलाःगु म्ये (नेपालभाषा) बिधाय्‌ नेशनल पावर न्यूज, म्यूजिक अवार्ड–२०१९ नं त्याकादीगु दु । अथेहे नेपाल म्यूजिक एण्ड फेसन अवार्ड –२०२२ या सर्वोकृष्ट गजल गायनया अवार्ड व नेशनल पावर न्यूज, म्यूजिक अवार्ड –२०२० या सर्वोत्कृष्ट गजल अवार्ड नं त्याकादीगु दु । ज्यापु समाजनाप आबद्ध वय्‌कः छम्ह संगीत प्रशिक्षक नं खः ।