मूर्तिकार, चित्रकार– अमर चित्रकारया जन्म वि.संं १९७८ य् येँया केलत्वालय् बौ बिन्दुलाल चित्रकार व मां चिनिमाया चित्रकारया कोखं जूगु खः । नेपाल राजकीय प्रज्ञा प्रतिष्ठानया प्राज्ञ दुजः (सन् १९७५–७९) जुयादीम्ह वय्कलं यक्व हे लोकंह्वाःगु चित्र च्वयादीगु दुसा वय्कलं दयेकादीगु देय्या विशिष्ट व्यक्तित्वपिनि शालिक देय्या थीथी थासय् तयातःगु दु । सिंहदरबार, पोखरा व देवीघाटय् च्वंगु जुजु पृथ्वीनारायण शाहया शालिक, डिल्लीबजारय् च्वंगु महाकवि लक्ष्मीप्रसाद देवकोटाया शालिक आदि वय्कलं दयेकादीगु खः । अथे हे वय्कलं थीथी राणा प्रधानमन्त्री लिसें विशिष्ट व्यक्तितय् तेल चित्र च्वयादीगु दु ।
वय्कःया दकलय् न्हापांगु कला प्रदर्शनी सन् १९६६ य् राष्ट्रिय कला प्रदर्शनी नाफाय् जूगु खः । थ्व लिपा देश विदेशय् वय्कःया यक्व हे कला प्रदर्शन जूगु दु । वय्कलं सन् १९६८ य् पर्यटन सम्बन्धी पोस्टर दयेकाः न्हाप सिरपाः त्याकादीगु खः । वय्कःयात त्रिशक्ति पट्ट द्वितीय, गोरखा दक्षिणबाहु (पाचौं, चौथौं व दोस्रो) पाखें विभूषित यायेधुंकूगु दुसा, जुजु महेन्द्र्र व वीरेन्द्र शुभराज्याभिषेक पदक, सार्क सम्मेलन पदकलिसें तःगू हे सिरपाः लःल्हायेधुंकूगु दु । वय्कःयात अन्तर्राष्ट्रिय मञ्च नेपालपाखें ‘वर्ष पुरुष’या सम्मान नं लःल्हाःगु दु ।
येँया थापाथली अबुजु विश्वेश्वर मान व विष्णुदेवीया पाखें दुम्ह काय्मचा खः– अमरेशमान । सन १९५६ स पटना विश्वविद्यालयपाखें विएस्सी उतिर्ण जुयाःलि संयुक्तराज्य अमेरिकाया उत्तर क्यालोरिना विश्वविद्यालयपाखें एमएस यानादीगु खः । बनस्पति विज्ञानया ज्ञाता अमरेशजुं राष्ट्रिय कृषि अनुसन्धान केन्द्रय् च्वनाः कृषि ब्यवस्थापन व कृषि नीतिया ख्यलय् ज्वः मदुगु तिबः बियावंगु खः ।
भाजु यज्ञबहादुर व कुमारी श्रेष्ठया काय्मचाकथं वय्कः अमीरबहादुर प्रधानया जन्म येँया फसिक्यबय् सन् १९३४ स जूगु खः । वय्कलं भारत, विश्व हिन्दू विश्वविद्यालयपाखें सन १९५५ स औषधी विज्ञानय् स्नातकोत्तर यानादीगु खः । लिपा सन् १९६६ स लण्डन विश्वविद्यालय, वेलायतपाखें विद्यावारिधि उपाधि कयादीगु जुल । नेपालय् विशेष यानाः वासः उत्पादनया उद्योग विकास यायेगुली थ्वय्कलं ज्वः मदुगु योगदान यानादीगु जुल । विशेष यानाः नेपाःया थःगु कथं जडीबुटीया विकास अले उकिया लिधंसाय् वासःया उद्योग न्ह्याकेगु ज्याय् न्ह्यलुवाःकथं ज्या यानादीगु खः । लिपा नेपाःया विज्ञानसम्बन्धी नीति दयेकेगुली नं अमीरबहादुरया उकथं हे न्ह्यथने बहःगु तिबः दुगु जुल । नेपाः सरकारया विज्ञान सम्बन्धि उच्चस्तरीय सल्लाहकार समितिया दुजः नं जुयादीम्ह वयकः ताःईतक शाही औषधी लिमिटेडया कार्यकारी निर्देशक जुयाः ज्या यानादिल । वय्कः रोनाष्ट अले रिकाष्ट थुज्वःगु वैज्ञानिक शोध संस्थाया नं दुजः जुयादीगु खः ।
अबु अजरमान व मां मोहनमायाया कोखं येँ, थँबहिली सन १९१८ स जन्म जूम्ह वय्कः विषयगत ल्याखं रसायनशास्त्रय् स्नातकोत्तर यानादीम्ह छम्ह विज्ञानविज्ञ खः– अमृतप्रसाद प्रधान । नेपालय् विज्ञान विषयया शिक्षा प्रसार प्रचार यायेगु तातुनाः जनस्तरं पब्लिक साइन्स कलेज स्वनेगुली न्ह्यलुवाः खः थ्वयकः । अथे हे न्हूपुस्तायापिन्त विज्ञान विषय अध्ययन यायेत वय्कलं छगू अभियान हे न्ह्याका दिल । सन १९६६ स युरोपया आल्पस पहाडी लागाय् जूगु हवाई दुर्घटनाय् लानाः थ्वय्कः मन्त । लिपा थ्वय्कलं विज्ञान शिक्षाया ख्यलय् यानावंगु तिबःया हनाबनाकथं पब्लिक साइन्स कलेजयात अमृत साइन्स क्याम्पसकथं नां हिलाबिल ।
नेपालय् गैरसरकारी स्तरय् विद्यार्थीपिनिगु सुविधाया निंतिं छात्रावास दयेकेगु ज्या नं अमृतप्रसादया ग्वसाःकथं धस्वाःगु खः ।
त्रि–चन्द्र कलेजय् रसायनशास्त्रया प्राध्यापक जुयादी धुंकूम्ह वय्कः छुं ई श्री ५ सरकार, उद्योग वाणिज्य विभागया उप–सचिवकथं नं सेवा यानादीगु जुल ।