येँ, लगंया भाजु मोहनमान व मय्जु देवीलक्ष्मीया काय्मचा केशरमान सन् १९३६ स बूगु खः । संयुक्तराज्य अमेरिकाया मिचिगन विश्वविद्यालयपाखें सन् १९६२ स वनविज्ञान विधाय् स्नातकोत्तर क्वचायेकाः हानं १९७४ स साइरस् विश्वविद्यालयपाखें विद्यावारिधि क्वचायेकुगु खः । विशेष यानाः वन्यजन्तु अर्थशास्त्रया विज्ञ थ्वय्कलं राष्ट्रिय वन नीति, वन सर्भेक्षण, जलश्रोत ब्यवस्थापनया ख्यलय् अतिकं मूवंगु तिबः बियादिल । वय्कः ताःईतक सरकारी सेवाय् च्वनाः ज्या यानादिल ।
येँ, असंया भाजु ज्योतिरत्न व वेटीलक्ष्मीया म्ह्याय्मचा केशरीलक्ष्मी सन १९४२ स बूम्ह खः । स्वां–सिमाया रोग विज्ञान ख्यःया विशेषज्ञ थ्वय्कलं नेपालय् दक्कलय् न्हापां वनस्पतिया ल्वय् विश्लेषण याइगु प्रयोगशाला विकास यानादिल । नेपालय् म्हुकंचा (च्याउ)या खेति यायेगु विधि विकास यानाः थुकिया ब्यवसायीकरण यायेगुली आपालं भूमिका म्हितादिल । थ्वय्कः विज्ञानया ख्यलय् दक्कलय् न्हापां विद्यावारिधि उपाधि काःम्ह नेपाःमि मिसा खः । वय्कः नेपालय् मिसा वैज्ञानिकपिनिगु छगू सञ्जाल नीस्वनेगुली न्ह्यलुवाः नं खः ।
मरु, येँया भाजु जगनाथया काय्मचा केशवदास सन् १९४४ स बूम्ह खः । भारतया केरला विश्वविद्यालयपाखें एमबिबिएस क्वचायेकाः वःम्ह थुम्ह भाजु वेलायतया लण्डन विश्वविद्यालयपाखें चिकित्साशास्त्र ख्यलय् उच्च शिक्षा ब्वनावल । नेपालय् प्लास्टिक शल्य उपचारयात न्ह्याकेगुली थ्वय्कःया आपालं ल्हाः दु ।
विराटनगरया भाजु मदनराज व मय्जु कदमदेवीया काय्मचा केशवराज सन् १९४८ स बूगु खः । त्रिभुवन विश्वविद्यालयपाखें स्नातकोत्तर शिक्षा क्वचायेके धुंकाः जापानया टोकियो विश्वविद्यालयपाखें विज्ञान विधाय् उच्चशिक्षा ब्वनादिल । थ्वय्कः आयुर्वेदिक स्वां, सिमा व जडिबुटिया विशेषज्ञ खत । नापनापं चरण क्षेत्रया पर्यावरण सम्बन्धी विशेषज्ञ खः । आपालं न्हून्हूगु जडिबुटि व स्वां, सिमात मालाः नेपालय् दुगु वनस्पतिया सम्बन्धय् बिस्कं सपूm नं च्वयादीगु दु ।
चित्र कलाकार केशवलाल चित्रकारया जन्म वि.सं. १९८६ य् केलत्वालय् बौ विन्दुलाल चित्रकार व मां चिनिमाया चित्रकारया कोखं जूगु खः । वि.सं. २००९ सालय् लः रंगं जुजु त्रिभुवनया पोट्रेट दयेकादीम्ह वय्कः २०२४ सालय् ‘सबैका लागि खाद्य’या निंतिं कम्ममेरिटिभ मुद्रा डिजाइन, सरकारया मौद्रिक नापतौलया पोस्टर डिजाइन यानादीम्ह खः । वय्कलं ‘सबैका लागि खाद्य’ कम्ममेरिटिभ डिजाइन व नापतौल पोस्टर डिजाइनया निंतिं नगद सिरपाः त्याकादीगु दु । अथे हे चन्द्र अमर चित्रकला पुरस्कार (२०५९), मा. जीवरत्न शाक्य पुरस्कार (२०६०) नं त्याकादीगु दु । वय्कलं ने.सं.११२३ यंलागाः सप्तमि, बसुबारखुन्हु थःगु देह त्याग यानादीगु खः ।