वय्कः धातु मूर्तिकलाय् ज्वः मदुम्ह कलाकार खः । वय्कः ने.सं.१०६१ बैसाखय् यल, लुँहितिइ जन्म जूगु खः । वय्कःया अबुजु जोगिलाल शाक्य खःसा वय्कः थम्हं हे कलाया सृजना यानाः ने.सं. १०८० दँय् धातु कलाकारिताया ख्यलय् पलाः न्ह्याकादीगु खः । वय्कःया मौलिक कलाया बिषेशता धइगु जापानिज् शैलीया सीया मूर्ति दयेकाः चां भुनाः ढाले यायेगु व तयार यायेगु खः । ब्वज्या—मंगल बजाः कला प्रदर्शनी । सिरपाः— वहःया बुद्धया तक्मा (द्वितिय पुरस्कार) न्ह्यथने बहःगु कृति— १) मंगलबजार बुद्ध पार्कय् दुगु ३६ इञ्चया बुद्ध २) पोखराय् दुगु धार्मिक गुरु फुजीया इनापय् ७ फुटया बुद्ध मूर्ति निर्माण । ३) जापानया निंतिं फुजी गुरुया इनापय् ९ फुटया बुद्ध मूर्ति निर्माण ।

चित्रकलाकार जगदिश चित्रकारया जन्म वि.सं. २००३ चैत्रय् येँया केल– त्वालय् अबु अमर चित्रकार व मां चन्द्रदेवी चित्रकारया कोखं जूगु खः । अर्थशास्त्र, जननीति तथा प्रशासनय् एम.ए. यानादीम्ह वय्कः त्रि.वि.इ अनुसन्धान अधिकृत जुयाः सेवा यानादिल । वय्कः नेपालभाषा साहित्यय् उपन्यासकारकथं नांजाः । वय्कलं न्हापांगु चित्र सन् १८७७ य् च्वयादीगु खः । वय्कलं सन् १९८४ इ कन्टेम्पोररी मोभमेन्ट इन नेपालिज आर्टस् व आर्टस अफ एशिया (हङकङ) सपूm च्वयादीगु दु । वय्कलं न्याक्वः तक याकः चित्रकला ब्वज्या यानादीगु दु । वय्कलं नाफां ग्वसाः ग्वःगु चित्रकलाय् न्हाप सिरपाः नं त्याकादीगु दु ।

पोखराया माणिकलाल व सिन्धुदेवीया काय्मचा जगदिशलालया जन्म सन १९४५ स जूगु खः । वय्कः भारतया अमृतसरया विश्वविद्यालयपाखें चिकित्साशास्त्रय् स्नातक याना वयेधुंकाः सन १९७७ स वेलायतया एडनवर्ग विश्वविद्यालयपाखें एफआरसीएस उपाधि कायेत ताःलाःगु खः । नेपाःया मूत्र विज्ञान व चिकित्सा ख्यलय् थ्वय्कः अतिकं नांजाः । यलया बि एण्ड बि अस्पताल थ्वय्कलं हे पलिस्था यानादीगु खः ।

यलया अबु शिवमान व मां सागरलक्ष्मीया काय् मचा जगनाथया जन्म सन १९४९ स जूगु खः । सौर्य उर्जा विशेषज्ञ थ्वय्कलं नेपालय् वैकल्पिक उर्जा बिकासया ख्यलय् न्ह्यथने बहःगु ज्या यानादीगु दु ।

सन १९४४ स जनकपुरय् जन्म जूम्ह जनकलाल भाजु सोभियत संघं सन १९६८ स जलविद्युत बिषयस स्नातक अले सन १९७८ स विद्यावारिधि क्वचायेकादीम्ह खः । विशेष यानाः जलश्रोतया वहु उपयोग प्रविधिया ज्ञाता थ्वय्कः नेपाःया जलश्रोतयात कयाः दुग्यंक अध्ययन यानादीम्ह छम्ह विशेषज्ञ खः ।

येँ, वँतुया भाजु खड्गमान मल्लया म्ह्याय् जयश्री वेलायत सिफिल्ड विश्वविद्यालयपाखें भौतिकशास्त्र विधाय् उच्च शिक्षा हासिल यानाःझाःम्ह ब्यक्ति खः । नेपालय् भौतिकशास्त्र विज्ञानया ख्यलय् आधारभूत ज्या यानावंम्ह थुम्ह मय्जुया कुतलय् नेपालय् दक्कलय् न्हापां भौतिकशास्त्र अध्ययनया प्रयोगशाला स्वनेगु ज्या जूगु खः ।

ललितकलाकःमि जीवरत्न शाक्यया जन्म ने.सं. १०४२ प्वहेलागाः चौथिखुन्हु येँया लगंत्वालय् अबु रत्नमान शाक्य व मां ज्ञानशोभा शाक्यया कोखं जूगु खः । जुजुरत्नकथं म्हस्यूम्ह जीवरत्न शाक्य कलाप्रवीण जुयादीगु दु । वय्कः मूर्तिकलाय् नं नांजाः । वय्कलं प्राध्यापन व कला क्षेत्रय् ताःई सेवादीगु दु । वय्कलं वि.सं २००२ सालय् दकलय् न्हापां लः रङ्ग छ्यलाः ख्वपया लाय्कूया चित्र च्वयादीगु खः । वय्कलं भगवान् शाक्यमुनि गौतम बुद्धया जीवनीया ३६ पाः चित्र च्वयादीगु दु, गुगु चित्रकला जापानया थी थी शहरय् ब्वज्या यानादीगु खः ।
वय्कःयात २०२३ सालय् जनपद सेवा पदक, २०१३ सालय् शुभ–राज्याभिषेक पदक द्यछाःगु खः । वय्कःयात दि शाक्य फाउण्डेशन, ललितकला संस्था, ललितकला समीक्षक समाज व वाटर कलर सोसाइटी आदि संस्थां नं सम्मान याःगु दु ।

स्व. जीवरत्न शाक्यया उपनां जुजुरत्न खः । वय्कः माज्याया ख्यलय् छम्ह ज्वः मदुम्ह कलाकार खः । वय्कः ने.सं. १०४३ प्वहेलाथ्वः तृतियाकुन्हु बौ स्व. रत्नमान शाक्य व मां इन्द्रमाया शाक्यया कोखं येँया मजिपातय् जन्म जूगु खः । वय्कलं स्व. कप्तान बालकृष्ण सम व चतुरत्न स्थापितया हःपालं चित्रकारिता व कलाकारिता ख्यलय् ज्या न्ह्याकादीगु खः । वय्कःया कलाया बिषेशता धैगु ल रंगया थी थी परम्परागत शैलीया पेन्टिङ्ग तयार यायेगु नापं थी थी द्यःतय्गु ख्वाःपाःत च्वयेगु, दयेकेगु व मूर्ति दयेकेगु खः । कला ब्वज्या– १) कला प्रदर्शनी– थाय् तवेला थौंकन्हय् नेपाल बैंक (१९९७) २) कला प्रदर्शनी (१९९७ व २०००) लैनचौर ३) घरेलु कला प्रदर्शनी ४) राष्ट्रिय कला प्रदर्शनी ५) नेपाल हस्तकला प्रदर्शनी । मान पदक तक्मा— १) दीर्घ सेवा पदक २) शुभराज्यभिषेक पदक । न्ह्यथने बहःगु कृति— सुरेन्द्र सम्शेरया दरवारय् अंगलय् किपा च्वज्या २) बुद्ध जीवनी नापं स्वापू दुगु ३५ पाः किपा च्वज्या ।

भाजु लक्ष्मीनारायण व मय्जु मोहनमायाया काय्मचा जुजुभाइ येँ, डिल्लीबजार त्वालय् सन् १९४४ स बूम्ह खः । संयुक्तराज्य अमेरिकाया वासिङ्गटन विश्वविद्यालयपाखें सन् १९७२ वनस्पति विज्ञानय् स्नातकोत्तर यानवःम्ह थ्वयकलं लिपा सन् १९८६ स संयुक्तराज्य अमेरिकाया इलिनोइ विश्वविद्यालयपाखें बूबःया बालिइ खनेदइगु बिषेश कथंया ल्वय्या सम्बन्धय् विद्यावारिधि उपाधि कयादीगु खः । वनस्पति शास्त्रया वय्कः नेपाःया नांदंम्ह वैज्ञानिक खः ।

पौभाः, चित्रकलाकार ज्ञानकर बज्राचार्यया जन्म वि.सं. २०११ असारय् ख्वपया साक्वथा त्वालय् अबु बेलवज्र वज्राचार्य व मां पूर्णप्रभा वज्राचार्यया कोखं जूगु खः । झिगू तगिंतक ब्वनादीम्ह वय्कःयात व्यावसायिक चित्रकारकथं म्हसीके फु । वय्कलं पासुका प्रकाशनय् थःगु न्हापांगु कला पिथना दीगु खः । वय्कलं ५०० पाः स्वयां अप्वः चित्र च्वयादीगु दु । वय्कलं थ्यासफुतिइ २१४ म्ह गनेद्यः च्वयादीगु दु । वय्कलं थी थी द्यःपिनिगु पौभाः नं च्वयादीगु दु ।