पौभाः, चित्रकलाकार ज्ञानकर बज्राचार्यया जन्म वि.सं. २०११ असारय् ख्वपया साक्वथा त्वालय् अबु बेलवज्र वज्राचार्य व मां पूर्णप्रभा वज्राचार्यया कोखं जूगु खः । झिगू तगिंतक ब्वनादीम्ह वय्कःयात व्यावसायिक चित्रकारकथं म्हसीके फु । वय्कलं पासुका प्रकाशनय् थःगु न्हापांगु कला पिथना दीगु खः । वय्कलं ५०० पाः स्वयां अप्वः चित्र च्वयादीगु दु । वय्कलं थ्यासफुतिइ २१४ म्ह गनेद्यः च्वयादीगु दु । वय्कलं थी थी द्यःपिनिगु पौभाः नं च्वयादीगु दु ।

स्व. ज्ञानरत्न शाक्यया उपनां ज्ञान खः । माज्याया ख्यलय् छम्ह ज्वः मदुम्ह कलाकार वय्कः ने.सं. १०४३ फागुनं येँ पाक्व, न्हूसतकय् जन्म जूगु खः । वय्कःया अबुजु स्व. महारत्न शाक्य खःसा वय्कलं स्वअध्ययण यानाः कलाकारिता ख्यलय्् ने.सं. १०४३ स ज्या न्ह्याकादीगु खः । वय्कःया कलाया बिषेशता धैगु माज्याय् वहःया थी थी परम्परागत बस्तु निर्माण खः । न्ह्यथने बहःगु कृति— पद्मकन्या क्याम्पस परिसरय् दुगु पशुपति मन्दिर निमार्ण ।

येँ, झ्वःछेँया बुद्धरत्न व ज्ञानदेवीया काय्मचा ज्ञानी रत्नया जन्म सन् १९४६ स जूगु खः । पूर्व युगोस्लाभियाया लुभलाना विश्वविद्यालयपाखें सन १९७५ स उर्जा विषययात कयाः स्नातकोत्तर उपाधि हासिल यानादीम्ह थ्वय्कः नेपालय् वैकल्पिक उर्जाया सम्बन्धय् ज्ञान प्रसार प्रचार याःम्ह मनू मध्यय् छम्ह खः ।