ललितकलाकःमि दीपक कुमार जोशीया जन्म ने.सं. १०८३ बछलागाः दसमि, सनिबारखुन्हु येँय् अबु गणेशकुमार जोशी व मां श्यामकुमारी जोशीया कोखं जूगु खः । बी.ए. ब्वनादीम्ह वय्कलं नेपाल टेलिभिजनया तालिम सामग्री उत्पादन केन्द्रय् ताःई सेवा यानादिल । वय्कलं दकलय् न्हापां २०३३ सालय् लोकेश्वरया चित्र च्वयादीगु खः ।
वय्कलं लोगो दयेकेगु झ्वलय् नेपाल टेलिभिजन, नेपाल जापानिज भाषा इन्स्टिच्यूट, सिद्धार्थ वनस्थली इन्स्टिच्यूटया लोगो दयेकादीगु दु । वय्कलं नेवाः नगुमाः (क्यालेण्डर) पिथनेत बौद्ध धर्मया द्यःपिं, बुद्धजीवनी आदिया चित्र च्वयादीगु दु । वय्कलं २०५८ सालय् च्वयादीगु चक्रसम्भर मण्डला अमेरिकाया आकल्याण्ड म्यूजियमय् मुंकातःगु दु ।
वि. सं. २०६१ स च्वःगु बज्रयोगिनी व आर्यावलोकितेश्वर जापानया फुकुवाका आर्ट म्युजियमय् दु । वय्कलं चित्र जक मखु थी थी कला दयेकेगु स्यनेगु ज्याझ्वः ‘हेर, सिक र बनाऊ’ नेपाल टेलिभिजनय् न्ह्यब्वया दीगु दु । परम्परागत कला सम्वन्धी अमेरिका व जापानय् जूगु ब्वज्या व कार्यशाला गोष्ठी थःगु प्रस्तुति न्ह्यब्वया दीगु दु । वय्कलं २०३८ सालय् बौद्ध चित्रकला प्रतियोगिताय् न्हाप सिरपाः, वि.सं. २०४१ य् नेपाल टेलिभिजन लोगो प्रतियोगिताय् न्हाप सिरपाः, वि.सं. २०४१ य् युवा बौद्ध समूहया प्रतियोगिताय् ल्यू सिरपाः, वि.सं. २०४१ य् राष्ट्रिय युवा महोत्सव प्रतियोगिताय् न्हाप सिरपाः, वि. सं. २०४२ या २१ क्वःगु राष्ट्रिय कला प्रदर्शनी (नाफा)इ न्हाप, वि.सं. २०५६ य् ३० क्वःगु राष्ट्रिय कला प्रदर्शनी (नाफा)इ न्हाप सिरपाः त्याकादीगु दु ।

चित्रकलाकार दीर्घमान चित्रकारया जन्म वि.सं. १९३३ पुषय् येँय् जूगु खः । वय्कःया अबु लक्ष्मीलाल चित्रकार खः । साधारण च्वय् ब्वने सःम्ह वय्कलं फोटोग्राफी व चित्रकारिता यानादीगु दु । वय्कलं च्वयादीगु जीवनी चित्र माथवर सिंह थापा, बालनरसिंह थापा, भीमसेन थापा व जङ्गबहादुर राणाया चित्र राष्ट्रिय संग्रहालय छाउनीइ दु । वय्कलं च्वयादीगु तपाःगु शिकार म्हिताच्वंगु चित्र प्रतिनिधि सभाया ग्यालरी बैठकय् ब्वयातःगु दु । सम्राट एडवर्ड सप्तमया चित्र च्वयादीबलय् सम्राट लय्तायाः वय्कःयात १०६ पाउण्ड सिरपाः ब्यूबलय् वय्कलं कया मदी । वय्कः बि.सं २००७ भदौस स्वर्गारोहण जुयादिल ।