सुब्बा रिद्धिबहादुरया काय् फत्तेबहादुर येँय् गणबहालय् सन् १९२८ स जन्म जूम्ह खः । भारत लखनउया किङ्ग जर्ज चिकित्सा कलेजपाखें डाक्टर ब्वने क्वचायेकाः वःम्ह थुम्ह भाजुं लिपा वेलायत वनाः उच्च शिक्षा हासिल यानादिल । नेपालय् स्वास्थ्य सेवाया ख्यलय् योजनावद्ध पलाः न्ह्याकेगुली महत्वपूर्ण पलाः न्ह्याकादीम्ह भाजु खः । थ्वय्कःयात नांजाःम्ह समाजसेवी व चिकित्सककथं मनूतय्सं म्हस्यू ।

थथे हे सर्वसाधरण लँजुवाःतय् त्यानुयाः झासु लनेत वा बहनी बासं च्वनेत लँय् सिथसं दयेकातःगु दइ फलेचात । थुज्वःगु फलेचाया वास्तु छतजाः जक जुइ । लुखा वा झ्याः दयाच्वनी मखु । थांचात धस्वाकाः लँपु सिबें निकु स्वकु तजायेक अले माथंवंक, अप्पां वा ल्वहँतं सियातःगु नापनापं गाक्कं जः व फय् वयेवने जीक चकंगु थाय्या ब्यवस्था यानातःगु दइ । फलेचा मनूत च्वनाः जात्रापात्रा स्वयेत नं उपयुक्त जुइ ।

सिँ प्वाः खनेत छ्यलीगु एक इञ्च स्वयां तब्यागु हंयात फाहं धाइ । फि, ब्या अप्वः दुगु सिँ प्वाः खनेत अःपु जुइगु हं ।

सवाः मसाये । अय्लाः काइबलय् लः तसकं क्वाकेगु याइमखु । लुमुलुमु धाल धायेव हे हिलेगु याइ । लः यक्व मक्वाःनिबलय् हिलेगु व यक्व क्वाकाः हिलेगुलिइ अय्लाःया सवाः पाइ । भचा ख्वाउँबलय् हे हिलाः बरु छकः अप्वः तःसां छुं पाइ मखु । लः ल्ह्यः म्हं चायेके धकाः क्वाक्क तयातल धायेव अय्लाः अप्वः हाःसां सवाः स्यनाः फ्यासु थें जुइ । मूसइगु नं म्ह्व जुइ ।

धातुया थल । म्हुतुप्वाः चकनी । हः दइ । ककु ती । अनं क्वय् भचाभचा तचाः जुइ । प्यं ग्वः मुं थें जुयाः दथुइ माथं वनी । प्वः हायेत थुकी लः तयाः जाकि हायाः बुकी ।