येँय् सन् १९५२ स बूम्ह वय्कः मचाबलय् आखः ब्वनेगुली उलि सफल विद्यार्थी मखु । विश्वनिकेतन माध्यमिक विद्यालयपाखें प्रवेशिका क्वचायेकाः नेपालय् विज्ञान विषय कयाः ब्वनेगु याःम्ह मुकुन्द रंजितयात संयुक्तराज्य अमेरिका, क्यालफोर्निया विश्वविद्यालय, डाभिसपाखें सन् १९८४ स कृषि विज्ञानय् विद्यावारिधि यायेगु ह्वःताः चूलात । विशेषतः आलुया खेती यायेबलय् ब्वलनीगु ल्वय्या सम्बन्धय् दुग्यंगु अनुसन्धान यासें उकियात गुकथं वासः यायेगु धैगु विधिया विकास थ्वय्कलं यानादिल । लिपा ल्वय्नाप प्रतिरोध शक्ति दुगु आलु पुसा विकास यानादिल । गुगु नेपालय् जक मखु दक्षिण एसियाया ख्यलय् न्हापां खः । वय्कलं हरित अनुसन्धान व प्रविधि प्रयोगशाला चायेकाः थःगु कथंया वैज्ञानिक अनुसन्धान याना वयाच्वंगु दु ।
सुदूर पश्चिम डोटी सिलगढीया भाजु भूमिनारायण व मय्जु इन्दिराया काय्भाजु मुक्तिनारायण सन १९४५ स बूम्ह खः । सन् १९६६ स विज्ञान बिषयस स्नातकोत्तर क्वचायेके धुंकाः सन १९७७ स संयुक्तराज्य अमेरिकाया क्यालफोर्निया विश्वविद्यालयपाखें विद्यावारिधि उपाधि कयादीगु खः । विशेषतः जङ्गली जीव जन्तुतय्त उपचार यायेगु वासःया विकास अले वन्यक्षेत्रया पर्यावरण संरक्षणया ख्यलय् थ्वय्कः विशेषज्ञ खः । पश्चिम नेपालय् कस्तुरी मृग पालनयात न्ह्यज्याकूम्ह थ्वय्कः छम्ह न्ह्यलुवाः खः ।
यल, नागबहाःया भाजु बुद्धराजया काय्भाजु मुनिबहादुर सन् १९४२ स बूगु खः । भारतया कलकत्ताय् इलक्ट्रोनिक प्रविधि सम्बन्धय् डिप्लोमा ब्वनावःम्ह थ्वय्कलं सन् १९७३ स फ्रान्सय् वनाः माइक्रोप्रोसेसरया ख्यलय् विशेष अध्ययन यानादिल । थःगु कथंया डिजाइनय् वय्कलं नेपालय् दक्कलय् न्हापां माइक्रो कम्प्यूटरया विकास यानादिल । अथे हे दक्षिण एसियाय् दक्कलय् न्हापां देवनागरि आखःया कीबोर्डया नं विकास यायेत ताःलात । नापनापं खय् भासं खँ ल्हायेसःम्ह रोवोटया नं सफल परीक्षण यानादिल । वय्कः सन् १९८३ स नेपाल राष्ट्रिय विज्ञान तथा प्रविधि प्रतिष्ठानपाखें विज्ञान पुरस्कार कायेत नं ताःलात ।