चित्रकलाकार लक्ष्मण श्रेष्ठया जन्म इ.सं. १८३८ य् सिराहाय् जूगु खः । ललितकलाय् स्नातक यानादीम्ह वय्कलं फ्रान्सय् विशेष अध्ययन यानादीगु खः । वय्कः नाफाया दुजः नं खः। वय्कलं नेपाः, भारत, स्विट्जरल्याण्ड व फ्रान्स आदि देसय् तःक्वः हे याकः व मंकाः कला ब्वज्या यानादीगु दु । वय्कःया चित्रकला नेपाः, भारत, फ्रान्स, अमेरिका व जर्मनी आदि देसय् संग्रहित जुयाच्वंगु दु । वय्कलं सन १९६७ स अन्तर्राष्ट्रिय कला प्रदर्शनी न्यूयोर्कय् ‘प्रि द अनर’ सिरपाः, तेस्रो राष्ट्रिय कला प्रदर्शनी (नाफा) य् न्हाप सिरपाः त्याकादीगु दु । वय्कःयात गोरखा दक्षिणबाहु पदक नं द्यछाःगु दु ।
ख्वपया भाजु इन्द्रदास व ज्वालादेवीया काय् लक्षमण दास सन् १९३५ स बूगु खः । भारतया खडगपुरया विश्वविद्यालयपाखें स्नातक यानादीम्ह थ्वयकः सडक सर्भेक्षण व डिजाइनया विशेषज्ञ खः । येँ–जनकपुर राजमार्ग, भैंसे–रक्सौल, सिमरा–जनकपुर राजमार्गया डिजाइनया ज्याय् मू भूमिका म्हितादीम्ह इन्जिनियर खः ।
ख्वपया भाजु रामभक्त व मय्जु कृष्णमायाया काय् भाजु लक्ष्मीराम सन् १९४४ स बूम्ह खः । सन् १९६६ स पञ्जाव विश्वविद्यालयपाखें एमबिबिएस यानावःम्ह थ्वय्कः नेपाःया न्हापांगु पुस्ताया मिखा सम्बन्धि चिकित्सक खः । लिपा दिल्ली विश्वविद्यालयपाखें थ्व हे विधाय् उच्च शिक्षा क्वचायेका दिल । नेपालय् मिखाल्वय् नियन्त्रण यायेगु अभियानय् थ्वय्कःया महत्वपूर्ण भूमिका दु । वय्कलं तःदँ तक नेपाली सेनाय् च्वनाः सेवा यानादिल ।