येँ, मखंत्वाःया हरिगोपाल भाजुया जन्म सन १९४५ स जूगु खः । त्रिविविपाखे सन् १९६७ स गणित बिषयस स्नातकोत्तर उपाधि कयादीम्ह थ्वय्कः विशेषत नेपालय् कम्प्यूटर प्रविधियात कयाः प्रचार प्रसार यायेगुया नापनापं थुकिया न्ह्यलुवाः प्रशिक्षककथं ज्या यानावंम्ह खः ।

येँ, ओमबहाःया भाजु चन्द्रमान व धिरजमायाया काय्मचाया जन्म सन १९३७ स जूगु खः । सन् १९६३ स जल विद्युत सम्बन्धय् स्नातकोत्तर शिक्षा ब्वनावःम्ह थ्वय्कः सोभियत संघ, मास्को उर्जा प्रतिष्ठानपाखें विद्यावारिधि यानादीगु खः । वय्कः नेपाःया आपालं महत्वपूर्ण जलविद्युत परियोजना निर्माता भाजुं राष्ट्रिय उर्जा शक्ति ख्यलय् गुकथंया क्षमता दु धकाः ध्वाथुइकेगुली ज्वः मदुगु भूमिका म्हितावंम्ह खः ।

येँया रामशरण श्रेष्ठ भाजुया काय्मचा हरिशरणया म्हसीका खः– झङ्गः–पंक्षीसम्बन्ध विशेषज्ञ । सन् १९३७ स येँ, क्षत्रपाटी त्वालय् जन्म जूम्ह थ्वय्कः स्कूलस्तरया जक शिक्षा हासिल यानातःम्ह खः । झङ्गः–पंक्षी सम्बन्धय् थ्वय्कःया ज्ञान अतिकं च्वन्ह्याः । झङ्गःतय् सम्बन्धय् अध्ययनया ख्यलय् थ्वय्कः न्ह्यलुवाः खः । वय्कलं नेपाःदुनेया ८६० जातया झङ्गःतय् सम्बन्धय् अध्ययन यानातःगु दु । थः याकःचिया कुतलं देय् न्यंकया थी थी थासय् वनाः मुंकातःगु ५७५ झङ्गःत त्रिभुवन विश्वविद्यालयया संग्रहालययात दान बियादीगु खः ।

वय्कः काष्ठकलाया छम्ह ज्वः मदुम्ह कलाकार खः । वय्कःया जन्म ने.सं. १०३९ स यलया जोम्बहाः, इखालखु त्वालय् जूगु खः । वय्कःया अबुजु सुखानन्द शिल्पकार खःसा वय्कःया बाज्या स्व. बेखाराज शिल्पकारया हःपालं वय्कलं ने.सं. १०५१ स काष्ठकला ख्यलय् ज्या न्ह्याकादीगु खः । वय्कलं सीया कलात्मक झ्याः, लुखाः व थी थी सीया मूर्ति दयेका दी । कला ब्वज्या— १) ललितपुर आदर्श कला प्रदर्शनी २) राष्ट्रिय कला प्रदर्शनी । न्ह्यथने बहःगु कलाकृति— १) नेपाल राष्ट्र बैंक केन्द्रीय कार्यालयया मूलुखाया कलात्मक तोरण निर्माण, २) होटल सोल्टीया तिकिझ्याः निर्माण ३) नारायणहिति राजदरवारया मूलुखाय् बुत्ता तयेगु ज्या । सिरपाः— आ.क.द्वितिय पुरस्कार (२००८)

वय्कः प्रस्तर मूर्तिकलाया छम्ह ज्वः मदुम्ह कलाकार खः । वय्कःया जन्म ने.सं. १०५४ सिल्लाथ्वः दुतिया, बुधबारकुन्हु यलया लुँहितिइ जूगु खः । वय्कलं अबुजु बुद्धिराज शाक्यया प्रेरणाकथं ने.सं. १०६७ दँय् प्रस्तरकलाकारिताया ख्यलय् ज्या न्ह्याकादीगु खः । वय्कःया कलाया बिषेशता धयागु प्रस्तरया थीथी चैत्य, ल्वहंहिति, सिंह व थी थी द्यःत निर्माण यायेगु खः ।
कला ब्वज्या— १) नेपाल हस्तकला प्रदर्शनी २) दोस्रो राष्ट्रिय कला प्रदर्शनी । न्ह्यथने बहःगु कृति— फर्पिङ्ग गुम्बाया २१ फिटया प्रस्तरया चैत्य निर्माण २) भ्वँतय् सिलु महाद्यःया प्रस्तर मूर्ति निर्माण ३) नमोबुद्धय् महासत्वया प्रस्तरया प्रतिमा निर्माण ४) सामाजिक सेवा मन्दिरय् ल्वहंहिति निर्माण ५) नेपाल प्रज्ञाभवन, कमलादीइ मूलुखाय् निम्ह प्रस्तर सिंहया मूर्ति निर्माण ६) १४ अंचल खेलकुद परिषदया शाखा कार्यालयस १४ थान हनुमानया प्रस्तर मूर्ति निर्माण ७) शाही नेपाली सैनिकया हेडक्वाटरय् ३ फिटया दुर्गाया प्रस्तर मूर्ति निर्माण । त्रिशुलिइ पुलांम्ह श्री ५ मुमा वडामहारानीया प्रस्तरया प्रतिमा निर्माण । सिरपाः– प्रथम उद्यमी पुरस्कार ।

हर्षमुनि शाक्य मिश्रित धातु तयार यायेगु नापं जनावरया क्वँय् व न्यकूया कलात्मक वस्तुत दयेकेगुली ज्वःमदुम्ह कलाकार खः ।
वय्कःया उपनां नातिदाइ खः । वय्कःया जन्म ने.सं. १०५४ स येँया लगं त्वालय् जूगु खः । वय्कःया अबुजु महामुनि शाक्य खःसा वय्कलं स्व. तास्वेसिङ्ग क्वनचाउया हःपालं ने.सं. १०९५ दँय् मिश्रित धातु तयार यायेगु व जनावरया क्वँय्, न्यकूया कलात्मक वस्तुत दयेकेगु ज्याय् पलाः न्ह्याकादीगु खः । कला ब्वज्या— १) नेपाल हस्तकला प्रदर्शनी २) औद्योगिक प्रदर्शनी २०४१, ०४२, ०४३ न्ह्यथने बहःगु कृति— क्वँय्या कलात्मक वस्तुत । सिरपाः— १) औद्योगिक प्रदर्शनी, सान्त्वना पुरस्कार २०४१, ०४२ २) तृतिय पुरस्कार नेपाल हस्तकाला प्रदर्शनी ।

वय्कः जदाउ व स्फटिक वेलौरया कलाय् ज्वः मदुम्ह कलाकार खः । वय्कःया जन्म ने.सं. १०५४ स यलया क्वालखु त्वालय् जूगु खः । वय्कलं थः अबुजु स्व. दानबहादुर शाक्यया प्रेरणाकथं ने.सं. १०९८ दँय् जदाउ व स्फटिक वेलौरया कलात्मक वस्तुत निर्माणया ख्यलय् पलाः न्ह्याका दीगु खः । न्ह्यथने बहःगु कृति— बेलौरया थी थी मूर्ति, फुर्वा, श्रीयन्त्र व पात्र ।

वय्कः धातुकलाया छम्ह ज्वः मदुम्ह कलाकार खः । ने.सं. १०५३ दिल्लाय् यल, हःखा त्वालय् जन्म जूगु खः । वय्कःया अबुजु हर्षवीर शाक्य खःसा वय्कलं स्व. नातिकाजी शाक्यया हःपालं ने.सं. १०७० दँय् कलाकारिता ख्यलय् ज्या न्ह्याकादीगु खः । वय्कःया कलाया बिषेशता धयागु सिजः धातुया पाताय् नेपाः व तिव्वती शैलीया नगुमां (पात्रो) दयेकेगु ज्या खः । कला ब्वज्या— नेपाल हस्तकला प्रदर्शनी, भृकुटीमण्डप येँ । न्ह्यथने बहःगु कृति— बेलायतया महारानी एलिजावेथ द्वितिय व प्रिन्स फिलिपया नेपाल भ्रमणय् वहःया पाताय् पोट्रेट दयेकाः द्वहलपा ब्यूगु, थौंकन्हय् (ब्रिटीश मूजियम) ।