न्ह्यःने लाःपिं दुहां वने मज्यूगु, द्यःपिं थापना यानातःगु थाय्, तन्त्रमार्गीतय् गुप्तरुपं द्यः थापना यानातःगु छेँ वा थाय्यात आगंछेँ धाइ । व हे छेँय् च्वंम्ह द्यःयात आगंद्यः धाइ । थथे थःगु कुलायापिं बाहेक मेपिंसं स्वये मज्यूम्ह जक मखु, बियाछ्वयेधुंकूम्ह म्ह्याय्मस्तय्सं तक स्वये मज्यूम्ह द्यः आगंद्यःयात स्वेष्ठ देवता व इष्टदेवता नं धायेगु याः । मल्ल जुजुपिनि आगंद्यः तलेजु माजु धाइ । तन्त्रमार्गीतय् तन्त्र साधना यायेगु थाय् व द्यः आगंछेँ व आगंद्यः खः । थः आगंद्यःया खँ सुयातं कनेमत्यः धाइगुलिं सुनां नं थःगु आगंद्यःया खँ कनीमखु । अय्सां खँ ल्हाल्हां वनेबलय् गुम्हेसिनं त्वरं, खड्ग, तरवार, त्रिशूल, कलश आदि आगंद्यः नं धायेगु याः ।
तन्त्रया खँ ल्हायेबलय् आगम तन्त्र व निगम तन्त्र यानाः निथि तन्त्र खनेदु । नेवाः धकाः म्हसीका बियाच्वंगु आगम तन्त्र खः । गुम्ह गुम्हं नेवाःतय् दीक्षा मकायेकं आगमय् दुहां वनेमज्यू धाइ । द्यःया शक्ति व सिद्धि दुपिं तःतःधंपिं तान्त्रिकतय् थःथःगु आगमय् पञ्चमकारं पुजा याइ । ध्यानय् च्वनी, ज्ञान प्राप्त याइ ।
द्यःलिसे खँ ल्हाइ, ततःधंगु ग्रन्थ च्वइ, पुरुषार्थ याइ, फुकसिगु भिं याइ । देशय् ततःधंगु संकट वल धायेवं जुजुपिंसं थः आगंद्यः लिसे खँल्हाबल्हा याइ धाइ । मनूतय्सं संकट वल, भय दत धायेवं थः आगंद्यः लुमंकाः द्यः पुज्याइ । थथे यात धायेवं संकट तरे जुयाः भय नं फालावनी धाइ । दँय्दसं मोहनिबलय् आगमय् नःलास्वां पीकुन्हु नःला स्वनी । कूछिभ्वय् व स्याक्वत्याक्व कुन्हु थापं यायेगु धकाः थःपिंसं छ्यलेगु थीथी ज्याभः स्वनी । अथेहे तुं थापिं, खाय्क्वरिं व देछापाः, अन्ति, धौपति, सुकुन्दा तयाः माकःदलुखय् मोहनि सिन्हः फयाः द्यः पुज्याइ । चालंकुन्हु थँजिकथं स्वनातःगु भुइफसि दैत्य संहारया प्रतीक कथं पाली ।
आगंद्यः पुज्यानाः बौपाः वानाः थँजिकथं सिन्हः नं ती । गुम्हगुम्हेसिनं चथाःकुन्हु बहनी आगमय् स्वनाः द्यः पुज्याइपिं नं दु । गुम्हेसिनं मोहनिबलय् आगंद्यः पुज्याये न्ह्यः गणेद्यः व कुमारया रुपय् थः मस्तय्त पुज्यायेगु चलन नं दु। अथे हे थीथी नखःचखः, जन्मन्हि, बुसँखा, कय्तापुजा, इहिपाबलय् समय्बजि थनाः धाला छानाः द्यः पुज्याइ । ह्वंकेबलय्, ग्वय् सायेकेबलय् आगंद्यःयात ग्वय् फ्यानाः छायेगु याइ । थःगु खलकं थःगु थाय्, वंश तातुनाः सुख, ऐश्वर्य, धनधान्य जुयाः कीर्ति तये फयेमा, नापं मुक्ति जुइमा धकाः आगंद्यः पुज्याना वयाच्वंगु खनेदु ।