यल ईबाःबहीया न्ह्यःने च्वंगु गल्लिं दुने खुल्लागु थासय् ख्वाखःनः बाहाः (चक्रवर्ति महाविहार) अवस्थित दु । थुगु बहाःया बहाःछेँ लँ स्वयाः भचा तजाः । नितँ जाःगु थुगु बहाःछेँय् कलात्मक लुखा दु अले जवय् खवय् निपाः झ्याः दु । अथे हे जवं खवं सारिपुत्र मौदगल्यानया चित्र नं च्वयातःगु दु । लुखा कलात्मक जूसां फुसय् तोरण मदु । उकिया थायसय् पञ्चबुद्धपिनिगु चित्र च्वयातःगु दु । च्वय्या तल्लाय् स्वपाः झ्याः दु । अनसं झ्वःलिक त्वानाःसिँ तयाः पौ फयेकातःगु दु । सामान्य आँय्पा पौया दथुइ चिकीचाधंगु पुल पिकयाः गजू छुनातःगु दु । देगलय् बहाःद्यःकथं अक्षोभ्यया मूर्ति स्थापना यानातःगु दु ।
थुगु बहाःया स्थापनाकालया बारे जानकारी बीगु छुं अभिलेख मदु । संरक्षणया अभावं थुगु बहाः जीर्ण जुयावनाच्वंगु दु । धार्मिक क्रियाकलापया निरन्तरता बीत थन छम्ह जक आजु दु अले संघया दुजःतलिसे जानाः नित्यपुजा आदि ज्या न्ह्याकाच्वंगु दु ।