उस्ताद गोविन्दलाल नेपाली रंजितया जन्म पाल्पा तानसेनय् वि.सं. १९७१ स जूगु खः । वय्कःया अबुजु नं संगीत साधक खः । अबुया हःपालं हे संगीतय् लगे जुयादीगु खः । वय्कःया गुरुपिं उस्ताद यज्ञराज शर्मा व भारतया जयपुर निवासी खेमचन्द्र प्रकाश खः । २००८ सालनिसें वय्कः रेडियो नेपालया लाइभ म्यूजिकया डाइरेक्टर जुयाः सेवा यानादिल । ‘ख्व जक ख्वख्वं ख्वबि…’ वय्कःया लोकंह्वाःगु नेवाः म्ये खः । रेडियो नेपालं सुथ न्हापां प्रशारण जुइगु शंखध्वनीया सृजना नं वय्कलं यानादीगु खः । थुकियात नेपालय् दकलय् न्हापांया फ्युजन संगीत अर्थात सम्मिश्रण संगीत धकाः नालातःगु दु । २०४३ सालय् वय्कः मदुगु खः ।