जमल बहाःया द्यः जनबहाःद्यः खः । थुगु द्यःया न्हापाया नां यमलेश्वर खः । जनबहाद्यःया पलिस्था यक्षमल्लपाखें जूगु खः । थुम्ह द्यःयात सेतो मच्छेन्द्रनाथ, आर्यावलोकितेश्वर, अमोघपाश लोकेश्वर, करुणामय नं धाइ । द्यःया कपालय् अमिताभ बुद्धया मूर्ति दु । थुम्ह द्यःया जात्रा चैत्रशुक्ल अष्टमी, नवमी व दशमीकुन्हु ३२ ल्हाः ताःहाकःगु रथ दयेकाः याइ । चैत्रशुक्ल अष्टमीकुन्हु जनबहाया मू आगमं च्याम्ह पुजारीतय्सं कुबियाः थाय्मदु, कमलाछी जुकाः बाजं थानाः खतय् तयाः जमलय् हइ । अनं रथय् तयाः न्हापांगु दिनय् जमलं सालाः असनय् थ्यंकी । निन्हुया दिनय् असनं सालाः हनुमानध्वाखाया कालभैरव थ्यंकी । स्वन्हुया दिंकुन्हु हनुमानध्वाखां लगमय् थ्यंकाः मांसिमा स्वचाःहीकी । जनबहाद्यःयात जनबहाःया शाक्य व बज्राचार्य परिवारपिन्सं पालंपाः पाः च्वनाः पूजा यानाच्वंगु दु । जनबहाःद्यःया न्हवं पौषशुक्ल अष्टमीकुन्हु जुइ । न्हवं जुइगु दिंया छन्हुन्ह्यः चान्हय् भचाखुसिइ वनाः गुंगः घलय् लः तयाः उगु लखं लुनाः न्हवं याइ । न्हवं जनबहाःया मण्डपय् याइ । उकुन्हु कुमारीयात स्वकेहइ । घलं लुइधुंकाः क्वाःलखं सिली कन्हय्कुन्हु द्यःयात निभाः पाकी । गनेधुंकाः उम्ह द्यःयात लंपुलिं छाइ । पुन्हिकुन्हु द्यःगुरुजु, बेताजु नापं माःपिं मनूत च्वनाः दशकर्म विधि याइ । जनबहाःद्यःयात सीगु भय व सीधुंकाः सुखावतिइ यंकीम्ह द्यःकथं विश्वास यानाः परिवारय् सीपिं दुसा दछिया दुने द्यःया न्ह्यःने मतछ्वयेकेगु, लँुया देवा च्याकेगु याइ । मृत्यु भयपाखें रक्षा याइम्ह प्यम्ह मू लोकेश्वर मध्ये छम्ह कथं काइ ।
जन्मया चिंकथं नाला करुणामय, अन्न सयेकीम्ह द्यःया रुपय् बुंगया करुणामय, ल्वय् लंकाबीम्हकथं च्वबहाया करुणामय, सीगु भय मदयेकाबीम्हकथं जनबहाःद्यः करुणामययात कयातःगु दु । मनू सीबलय् सीम्ह मनूया नामं थुपिं प्यम्ह करुणामयया थाय् मत छ्वयेकः वनेगु चलन दु ।