थ्व बहाः बिकमाःबहाःया कचा बहाःकथं कयातःगु दु । जोरगणेशं भचा च्वय् वनाः जवपाखे गल्ली दुने थ्व त्वाःछेँ क्यबबहाः दु । थ्व बहाःयात संस्कृत भासं अमितकान्ति महाविहार धयातःगु दु । थ्व बहाः गुबलय् दयेकल धयागु छुं दसु मदुसां क्वाःपाःद्यःया तोरणय् ने.सं. १०४२ पाखे जिर्णोद्धार याःबलय्या तिथि धाःसा तयातःगु दु । बहाःया क्वाःपाःद्य पश्चिमाभिमुख अमिताभ बुद्ध खः । क्वाःपाःद्ययात स्वयम्भू चैत्यया प्रतिककथं दयेकाः उकिया क्वय् पलिस्था यानातल । तोरणय् महाअमिताभ व जवंखवं भैरव कियातःगु खनेदु । छ्यलिइ क्वाःपाःद्य दुसां च्वय्या तँय् धाःसा मनू च्वनेजिइक दयेकातल । क्वाःपाःद्यःया लुखा पिनेसं चीधिकःपिं सिंह निम्ह, मन्दःपाः स्वपाः झ्वलिं तयातःगु दु । बहालय् दथुइलाक चिभाःद्यः छग दुसा क्वाःपाःद्यः व चिभाःद्य दथुइ चिपाःगु, तःपागु मन्दःपाः, यज्ञगाः व झ्वलाक्क न्यागाः ल्वहंया पिण्डगाः नं दु ।