यल लाय्कुलिं पश्चिम स्वयाः वनेबलय् महापाः व गाबहाःया दथुइ जवपाखेया गल्लीइ वनेबलय् थ्यनीगु तःग्वःगु चैत्यया न्ह्यःने रुद्रदेव गर्गगोत्रवर्म संस्कारित दत्तनाम महाविहार (दौबहाः) दु । बहाःया लुखाया जवंखवं ल्वहंया सिंह निम्ह दु । थ्व लुखां दुहां वनेवं जवपाखे धर्मगार छगू दयेकाः उकी अमोघपाश लोकेश्वर, आर्यतारा, भृकुटीतारा, महाबुद्ध भैषज्य तथागत स्वनातःगु दु । खवपाखे मज्जुश्री, गणेश, महांकालया मूर्ति दु ।
दौबहाःया देगः उत्तराभिमुख यानाः दयेकातःगु दु । देगःया भूमि तल्लाय् फलय् सिंह निम्ह दु । थनया मूलुखाय् ली पातां भुनातःगु दु । थुकिया जवंखवं ध्वाँय् निपु, सारिपुत्र, मौदगल्यान भिक्षुपिं व ल्वहंयापिं अमोघपाश लोकेश्वर व प्रेतसतर्पित लोकेश्वर दु । बहाःया छचाःलिं फः थकयातःगु दु ।
थुगु थासय् क्वाःपाःद्यःया न्ह्यःने अशोक चैत्य छगः, ल्यूने थनया देगुद्यः कथं चैत्य छगः जवंखवं मेगु स्वंगः चैत्य यानाः जम्मा न्यागः दु । अथे हे धर्मधातु मण्डल निगः दु । देगःया खवपाखे दिगि दु । थन बहालय् क्वाःपाःद्यःया देगः, दिगि छेँ बाहेक न्यंकनं थनया संघय् दुथ्याःपिनिगु वासस्थान खः । दौबहाःया निर्माणसम्बन्धी छुं नं ऐतिहासिक प्रमाण मदु । तर थन च्वंपिनिगु धापू कथं भास्करदेव वर्मया समकालय् हे थ्व निर्माण जूगु खः ।
अथे हे भास्करदेव वर्मा व रुद्रदेव गर्गगोत्रवर्म निम्ह दाजुकिजा खः । उपिं गौड देशं वःगु खः । भास्करदेवं हिरण्यवर्ण महाविहार दयेके धुंकाः वया हे किजा रूद्रदेवंं दत्तनाम महाविहार निर्माण याःगु खः । व हे रुद्रदेव दत्तनामया नामय् यक्व व्यवस्था यानाः लिपा न्याक्वः तक सम्यक न्यायेकावंगु जुयाः विहारया नां दत्तनाम विहार धायेगु यानाहल । लिपा दौबहाः जुल धयागु धापू दु । दौबहालय् पुलांगु अभिलेखया नामय् ने.सं. ७०८ या तोलं अभिलेख छगू जक दु । दौबहालय् दशस्थविर आजुपिं व सर्वसंघपिं नापं यानाः ३४ म्ह दुजःत दु ।
थन थुपिं दुजःत मुनाः संमस्तय्त वन्दे लुइत ग्वय्दां तयेगु, वन्दे, नायः, जेष्ठस्थविर चक्रेश्वर आदि लुइगु, आगमय् पुजा यायेगु, आचार्य थकालिकथं द्यःपाः फयेगु, , द्यः खेचायेकेगु, नामसंगीति ब्वनेगु, नित्य पुजा, आरति पुजा, लय्लय् पतिं दशमीपुजा, दँय्दसंआजु, अजिमा व विहारया बुसाधं व थीथी गुथि हना वयाच्वंगु दु ।