यल क्वालखु त्वाःया प्यकालं पश्चिमपाखे स्वयाः वनेबलय् जवपाखे द्वारिका बहाः (द्वारिका विहार) दु । द्वारिका बहाः क्वाःबहाःया लिउनेपाखे क्वाःबहाःयात थिइक हे दयेकातःगु दु । थ्व बहाः मिच्छु बहाःया जवपाखे लानाच्वंगु दु । थ्व बहाः क्वाःबहाःया मू कचा बहाः मध्ये छगू खः । थ्व बहाः थनया बैद्यतय्गु बहाः जूगुलिं बैद्यबहाः नं धायेगु याना वयाच्वंगु दु । थुगु बहाःया मूलुखा कलात्मकढंगं दयेकातःगु दु । मूलुखाया थखलुइ त्रिरत्नया मूर्ति अंकित यानातःगु दु ।
मूलुखा फुसय् दथुइ वैरोचन, जवय् अमिताभ व खवय् अमोघसिद्धि तथागतपिनिगु मूर्ति अंकित सिँया तोलं छगू नं तयातःगु दु । मूलुखां च्वय् त्रिखाझ्याः छपाः नं छुनातःगु दु । थुगु बहाःया द्यःछेँय् पश्चिम स्वकाः ल्वहंयाम्ह अमिताभ बुद्ध छम्ह स्थापना यानातःगु दु । थुकिं न्ह्यःने चैत्य छगः नं स्वनातःगु दु । द्वारिका बहाःया बारे छुं नं प्रमाण मदुगु जुयाः थुकिया बारे छुं नं खँ मसीधुंकल । थन च्वंपिनि नं न्याम्ह आजुया व्यवस्था यानाः वन्दे लुइगु ज्या जुयाच्वंगु दु ।
संघयापिनि पालंपाः द्यःपाः फयेगु याना वयाच्वंगु दु । थन नित्यपुजा, आरती नापं धञ्जल्याःकुन्हु बहाःद्यःया व कात्तिपुन्हिकुन्हु चैत्यया बुसाधं याना वयाच्वंगु दु ।