झीगु नेवाःम्येया अन्वेषण यायेत तःम्ह हे विदेशीत नेपाः वःगु दु । तर सु सु गुबलय् वल धैगु सी मदु । उकी मध्यय् लण्डन युनिर्भसिटीया डा. बाक्या नां आपलं थासय् न्ह्यथना तःगु दु । २०१३ साल पाखे नेपाः वःम्ह बाक्या नां कविकेशरी चित्तधर ‘हृदय’जुं आपालं च्वसुइ न्ह्यथना तःगु खनेदु । थुबलय् हे लोकगायक लोकरत्न तुलाधरजुयात न्यय्पुं मल्याक म्ये हायेकाः भरे यानायंकूगु खःसा सकलानन्द बज्राचार्यया सलय् नं आपालं म्ये भरे याःगु खः । स्वनिगःया थासंथासय् वनाः म्ये हालामिपिं व भजन खलःया नं आपालं म्ये भरे यानायंकूगु खः ।
थ्व धुंकाः पद्मदेबी मानन्धर (पद्म कादम्बरी) या मचाबलय्या लुमन्तिकथं २०१०/११ पाखे छम्ह विदेशी मिसां म्ये हायेकाः भरे यानायंकूगु खः । वया नां मस्यूगु व थःगु देसय् लिहां वनेगु झ्वलय् हवाई दुर्घटनाय् रेकर्डत फुक्क नष्ट जुल । संगीतविद् देबेन भट्टाचार्यं २०३२ सालपाखें द्वारिकालाल जोशी, ईन्द्रलाल श्रेष्ठ, पञ्चनारायणपिन्त म्ये हायेकाः भरे यानायंकाः सिडीचाः पिथंगु दु ।