नेवाःतय् नं न्हापांनिसें दोहोरी म्ये हालेगु चलन दु । निम्ह बाय् निपुचः दथुइ न्ह्यसःलिसः वा जवाःसवाःकथं हालीगु थज्याःगु म्ये अप्वः यानाः बुँइ, गुँइ घाँय् लःवनीबले हालेगु याइगु खः । थःगु जवाःसवाः वा न्ह्यसःलिसः न्ह्यागु जूसां लिपा अनुप्राश छगू हे कथं लय्बद्ध जुयाच्वनी थज्याःगु म्ये ।
थुकथं हालीगु म्ये हालीपिं लिसें न्यनीपिन्त नं उतिकं यैपुस्से च्वनी । थज्याःगु म्ये स्वनिगःया पश्चिम लागापाखे खनेदु । थजाःगु म्येया लसय् दुगु व म्येचालय् दुथ्याना च्वंगु कथं न्हापांगु म्ये ‘दयाधर्म दुम्ह खःसा झ्यालं छकः स्वः वा’ खः । थ्व म्ये मुना हालादीम्ह अमरराज शर्मा खः । रामकृष्ण दुवालं मुनादीगु किपुली हालीगु थजाःगु म्ये खः –
किपूया देव ध्वाखा यलया यल ध्वाखा
ख्वपया लुँया ध्वाखा स्वल वने नु यो
हिसिदुम्ह माया मदु ला