नेवाः संकिपाया बाखं
नेवाः संकिपात बाखं मे, लोक मे, लोक बाखं, धार्मिक व पौराणिक बाखं, जातक व अवदान बाखं, ऐतिहासिक व्यक्तित्व व साहित्यिक कृतिया लिधंसा कयाः दयेकातःगु दु । ‘सिलु’ बाखंमेया लिधंसाय् दयेकूगु संकिपा खः । ‘राजमति’ न छपु लोकमेया लिधंसाय् दयेकूगु जुल । ऐतिहासिक ब्यक्तित्वया बाखंया लिधंसाय् ‘गुरुमापा’ व ‘जामनः गुभाजु’ संकिपा दयेकूगु खः । ‘चाण्डालिका’, ‘पटाचारा’, ‘कृषा गौतमी’ बौद्ध जातक बाखंया लिधंसाय् दयेकातःगु जुल । पुलां बाखंया लिधंसाय् ‘लुँयाम्ह झंगः’, ‘स्वय्नगु’ व ‘भिंतुना’ अले साहित्यिक कृति पाखें ‘चिपनिप’, ‘यांमिखा’, ‘पःखाः’ संकिपा दयेकातःगु खः । यलया मल्लकालिन काति प्याखंया दुने बाथः प्याखंया लिधंसाय् ‘यलय् बाथः’ संकिपा दयेकूगु दु ।