गुणवाक्य विहारया भचा उत्तरय् पाचोया लं खनेदुगु चीधंगु बहाः हे हेरसुवर्ण विहार खः । विहारया क्वाःपाःछेँया खवय् च्वंगु ने.सं. ९८३ या ल्वहंपतिइ चपाचो दथुइ बहालया दानपति चतुरवीरं थुगु विहार स्थापना याःगु खँ उल्लेख जुयाच्वंगुलिं थुगु बहाः थिमिया दकलय् न्हूगु बहाः खः धायेफु । उकिं हेरसुवर्ण विहारयात न्हूबहाः धायेगु याना वयाच्वंगु खः ।
भौतिक संरचना प्रायः नष्ट जुयधुंकूगु थुगु बहाःया दथुइ जलहरि सहितया प्रस्तर चैत्य दु । पश्चिम पाखेया क्वाःपाः छेँय् दुने पूर्वाभिमुख पदमपाणी लोकेश्वर (बोधिसत्व)या न्हू मूर्ति स्थापना यानातःगु दु । क्वाःपाः छेँया जःखःया फुक्कं लागा मेमेगु जातिं छ्यला वयाच्वंगु दु । विहारय् दयेमाःगु, जुइमाःगु छुं हे ज्या जूगु खनेमदु ।