येँया तिनिख्यः लिक्क तेबहालय् नितँजाःगु देगलय् च्वय् उत्तर स्वयाः पाल्हाः द्यः बिज्यानाच्वंगु दु । हाकु ख्वाःम्ह पाल्हाःद्यःयात संकटा, पद्मान्तक, चण्डमहारोषण, महाचण्डरोषण, चण्डरोषण, संकटा आजु व अचला नं धायेगु याः । थुम्ह द्यवं प्यका ल्हातय् जवय् खड्ग व बज्र, खवय् पलेस्वां व रत्न ज्वनाः दनाच्वंगु दु । मुख्यगु निका ल्हातं शक्तियात (सम्भोगरत मुद्राय्) घय्पुनाच्वंगु दु । थुम्ह द्यः चक्रसम्बरया रुपय् खनेदु । वहःया थीथी तिसा व छ्यनय् किकिंपा नं तियातःगु दु । पर्दा तयातःगुलिं द्यवं खड्ग व पलेस्वां ज्वनाच्वंगु ल्हाः जक खनेदु । द्यःया जःखः पुलांगु पौभाः, खड्गजोगिनी, बज्रजोगिनी व अष्टमातृकाया धकिं, मूसिन्हः (मोहनि सिन्हः) ताकेय् यखानातःगु व वहःया चिपाःगु द्यःया पालि नं दु ।
किंवदन्ती कथं बुंगद्यःयात कामारुकामाक्षं कुरुवा (चक्रतीर्थ) लय् हःबलय् पाल्हाःद्यवं ल्यूल्यू वयेगु सांकेतिक इच्छा लखं च्वय् पाल्हाः ल्ह्वनाः क्यंगुलिं आचाःजु वन्धुदत्तं लिपा काः वयेगु वाचा यानावन । लिपा बुंगद्यःया फुक्क ज्या पूवंकेधुनेवं पाल्हाःद्यः काःवन धाइ । कुरुवालय् च्वंगु पाल्हाःयात पाल्हाःद्यःकथं पुज्याइ । १२ दँय् छक्वः बछलागा पञ्चमीकुन्हु कुरुवालय् पाल्हाःद्यः काःवनी । गुरुजुपिंसं थम्हेस्यां तुं पुजा ज्वलं, निगः कलश, धकिं पुलांगु लं ज्वनावनाः गुह्यपुजा यानाः चुइकी । गुरुजुपिंसं विधिपूर्वक तान्त्रिक पुजा यानाः द्यः साधना यानाः कलशय् तयाः, खतय् तयाः लिहां वयेगु झ्वलय् टौदह, क्वय्ना व क्वय्नाबसि नाग पुज्यानाः झःझः धायेक द्यः जात्रा यानाहयाः देगलय् बिज्याके न्ह्यव रहस्य विश्वशान्ति होम यानाः विधिपूर्वक द्यः पुज्याइ । द्यःया कलेवर हिलेगु धकाः द्यःयात लंपुं छाइ, निगः कलश द्यःया प्वाथय् प्रतिष्ठा याइ । थ्वहे लसताय् जुजुयात द्यःया प्रसाद कायेत देगलय् ब्वनी, लिसें थ्वहे लसताय् देय् भ्वय् नं नकी ।
पाल्हाः द्यवं राहुया दशां मुक्त याइगुलिं शनिवाःपतिकं द्यइके वइपिं म्वःम्वः दइ । थीथी नखःचखःबलय् द्यइके वनीगु लिसें जन्मन्हिबलय् दशा फायेकेत नं ख्वला व खड्गय् चि व चिकं, हाकु कापः, हाकु मुस्या तयाः द्यः पुज्याइ । शान्तिस्वस्ति यानाः दशा फायेकेत न्हिन्हि द्यःयात पाठ नं याकी । आयुआरोग्य, कार्यसिद्धि, मंगल कामना व भाकल यानाः न्यागः समय
बजि, खाय्, थ्वँ, ह्याउँथ्वँ, अय्लाः तयाः पात्र थनाः हँय्ख्येँय्, न्या, वहः, पालु छ्वय्ला तयाः सगं बियाः द्यः पुज्याइ । थ्वयात चापुजा नं धायेगु याः । गुम्हेसिनं समय्बजि, खाय्, थ्वँ वा अय्लाः तयाः स्वंगः पात्र नं थनेगु याः । दँय्दसं पोहेलागा अष्टमी व नवमीकुन्हु बुसादँ हनेगु झ्वलय् अष्टमीकुन्हु मतिगालय् होम यानाः बलि बी । नवमीकुन्हु गुह्यपुजा यायेगु झ्वलय् सर्वसंघया न्याम्ह थाकुलिं स्वनाः द्यः पुज्याइ । थुकुन्हु द्यःयाथाय् सुयातं दुकाइ मखु ।