येँया सोह्रखुट्टे फल्चा लिक्कसं पकनाज्वलय् प्वकइनाय्द्यः दु । विनायकं नेपालभाषाय् इनाय् खँग्वः व्यूत्पन्न जूगु खः । इनाय् धयाम्ह गणेद्यः खः । प्वक बांलाकीम्ह इनाय् जूगुलिं प्वकइनाय् धाःगु खः । थुम्ह गणेद्यःयात पोमना गणद्यः व सिद्धि गणेश नं धायेगु याः । ल्वहंयाम्ह प्यका ल्हाः दुम्ह थुम्ह गणेद्यः नितँजाःगु आँय्पा पौ दुगु देगः, लुँगजू व पताः छानातःगु देगलय् उत्तर स्वयाः बिज्यानाच्वंगु दु । थुम्ह गणेद्यःया च्वसंक्वंचाद्यः नं दु । छतँजाःगु देगलय् पूर्वाभिमुख ल्वहंयागु कलशयात अन्नपूर्ण व प्वकद्यः नं धायेगु याः। प्वकइनाय्द्यः व क्वंचाद्यःया स्वापू दु । अथे हे थःथम्हं उत्पत्ति जूम्ह थुम्ह गणेद्यःया गुरु गोरखनाथ व जुजु गुणकामदेव लिसे स्वापू दु धाइ । पकनाजोलय् च्वंपिनि थान गणेद्यःकथं पुज्याइम्ह थुम्ह गणेद्यःया लड्डु छायेत धकाः भाकल यातकि तंगु वस्तु लुइ धयागु जनविश्वास दु ।
नेवाः तजिलजि कथं तःजिगु भ्वय्, ज्याःजंक्व, इहिपा कय्तापुजा आदि भ्वजय् थ्वँ, अय्लाः थुइत, कायेत किसलि तयाः गणेद्यः व क्वंचाद्यः पुज्यानाः क्वंचाद्यःया जल छेँय् यंकाः अय्लाः, थ्वँ थुइगु याइ । अथे हे थ्वँ वँयाः, अय्लाः कयाः द्यः भाग छखे तयातइ । भ्वय् नकेज्या सिधयेवं उगु अय्लाः, गणेद्यःयात छानाः द्यः पुज्याइ । गुम्ह गुम्हसिनं किसलि द्यःयात थीकाः अय्लाः थ्वँ थुयाः भ्वय् लिपा छाःवइपिं नं दु । अथेहे ख्वपय् ब्रम्हायणी पीगमय् वनेथाय् च्वंम्ह द्यः लांगणेद्यः पुज्यानाः प्वक त्यनाः थ्वँ अय्लाः थुइ । थ्वँ, अय्लाः स्यनेत्यंगु सीदत धाःसा महाकाली पीगमय् च्वंम्ह गणेद्यःयाथाय् तंम्वयाः ‘का त्वँ’ धकाः द्यः पूजा यानाः द्यःयात अय्लाः थ्वँ त्वंकल धायेवं अय्लाः थ्वँ बांलाइ धयागु जनविश्वास दु ।
प्वकइनायाथाय् इहिपाबलय् वंजला वयेगु चलन दु । विशेष यानाः न्हय्सः साय्मितय् इहिपा याइबलय् पकनापुजा धकाः मिसा मिजनं गणेद्यः पुज्यानाः मिसायात सिन्चा फायेकी ।
क्वंचाद्यःयाथाय् वनाः द्यः पुज्यानाः मिसामिजं जानाः क्वंचाद्यः चाःहीकेमाः । क्वंचाद्यः चाःहीके फत धाःसा याकनं काय बुइ धाइ । म्ह्याय् भिनामस्त, दाजुकिजा, फुकीतय्त सःताः भ्वय् नयेगु चलन दु । थथे हे यल व किपूयापिं क्वय्ना पुजा धकाः क्वय्ना गणेद्यःयाथाय् न्हूपिं तिपूत यंकाः गणेद्यःया दर्शन याकाः जक दिगुद्यः दर्शन याकीगु चलन दु । थुकथं गणेद्यःयात पुज्यायेगु धयागु फुक्क ज्या पूवंकाः मनोकांक्षा पूरा यायेगु खः धाइ ।