मिखा बांलाकेगु निंतिं छ्यलेगु मू ज्वलं धयागु हे अजः खः । थ्व हाक्कुसे च्वनाः भचा थ्यास्स च्वनी । अजः च्वलापतिंचिया च्वकां कयाः मिखाय् उलेगु याइ । अजः उलकि मिखा चिग्वःसां तग्वः खनेदयाः बांलाइ । लिसेलिसें छुं नं बांमलाःगु मिखाल्वचं काचाक्क कइमखु धयागु विश्वास दु ।
अजः फयेगु
अजः फयेगु निंतिं माःगु ज्वलं खः ‘कस्तुरी’ इमू, लवं, व थीथी जडिबुटी । थ्व फुक्कं ज्वलं मलमल कापतय् तयाः इताः थें तुलाः तूचिकनय् प्याकाः ‘मोहनि पुसाय्’ (माकःचाय्) तयाः च्याकी । द्यःने मोहनि फये थें सलिखं त्वपुइ । थ्व इताः च्यानाच्वंगु दत्तले चिकं साया तुं च्वनेमाः । इताः च्यानाः फुतकि सलिखय् खाःगु हाकलय् घ्यः बाय् चिकनं वालाः ‘अजःसला’ बत्ताय् तयेगु चलन दु ।