क्वःने पुइँया गोफः त्वालय् पलिस्था यानातःगु शाक्य बौद्ध विहार खः– यताः बहाः । थ्व बहाःया सर्वसंघ छगू हे परिवारया सदस्य खनेदु । थ्व बहाःयात कीर्तिपुण्य भूवनसुन्दर महाविहार धाइ । थ्व विहारया क्वाःपाःद्यः अक्षोभ्य बुद्ध खः । दथुइलाक्क अशोक चैत्य छगः बाहेक मेगु छुं नं थन पलिस्था यानातःगु मदु । बहाःया स्थापना बारे छुं न दसित मदु । पुलांगु धापूकथं शाक्यभिक्षु देव नरसिंहपाखें थ्व बहाः थापना याःगु खः । तर बुद्धिष्ट मोनाष्ट्री अफ नेपाल सफुलिइ थ्व बहाः इस्वी संबत् १७३६ पाखे शाक्यभिक्षु सुजंछुलिंं दयेकूगु धयातल । थ्व ई धयागु जुजु पृथ्वीनारायण शाहया ई खः ।
क्वाःपाःद्य दुने ने.सं. ६०८ पाखेया छगू शिलापत्र दु । थुकी विहार पलिस्था याःम्ह वा दाताया नां दु धयातःसां आखः ज्यलाः ब्वने मजिउगु अवस्थाय् थ्यने धुंकल । वि.सं. १९९० सालया भुखाचं थ्व विहारया क्वाःपाःछेँ दुना वंगुलिं लिपा विहारया मोहनमायां न्हापा गथे खः अथे जुइक दयेका बिल ।
थ्व विहारया क्वाःपाःद्यः अक्षोभ्य बुद्ध खः । दथुइ लाक्क तःग्वगु चैत्य छगः बाहेक मेगु छुं नं थन पलिस्था यानातःगु खनेमदु । थ्व बहाः लगंबहाःया हे छगू कचा बहाःकथं कयातःगु दु । उकिं थ्व बहाःया सर्वसंघयात लगंबहाःया थाकुलिपिंसं बरे छुइगु, तःतःधंगु ज्याखँ याये माःसा लगंबहाःया थाकुलिपिनिगु सल्लाहकथं यायेमाःगु पुलांगु चलन दु । तर लिपा वना लगंबहाःयापिंसं ई मब्यूगु वा अन्य कारणं याना थौंकन्हय् बहाःया हे मू थाकुलिं थ्व ज्या पूवंका वयाच्वंगु दु । विहारया सर्वसंघ तसकं चीधंगु व छगू हे परिवारया सदस्य खनेदु ।