म्येच्वमि नापं पत्रकार रेखा शाक्य (राजमति) अबु राजमान शाक्य व मां मञ्जु शाक्यया कोखं पाहांचःह्रेखुन्हु येँया इतुंबहालय् जन्म जूगु खः ।
वय्कलं च्वयादीगु म्येमुनाया न्हापांगु कृति ने.सं. ११२८ कछलागाः चःह्रेखुन्हु पिदंगु नेपालभाषाया सोलो एल्बमकथं ‘ध्वः छध्वः रेखाया’ सिडी पिदंगु खः । थुकी दुथ्याःगु व मेमेगु म्ये यानाः वय्कलं च्वयादीगु मुक्कं १६ पु म्ये पिदने धुंकूगु दु । अथेहे ‘गबलें गबलें छं जितः’, ‘अय्लाः अय्लाः’, ‘इतुम्बहाःया व म्ह्याय्मचा’, ‘ल्यू ल्यू न्ह्यः न्ह्यः वयाः’, ‘जिं ला छन्त ययेके धुन’, ‘ल्वःमंकाः चिलं गां झीगु’ म्येया म्यूजिक भिडियो पिदने धुंकूगु दु ।
वय्कःया डेब्यु एल्बमया ‘ध्वः छध्वः रेखाया’ म्येचाःया टाइटल म्येयात कालिका एफएमपाखें नेपालभाषाया दकलय् बांलाःगु म्येकथं भाषाभाषी गीत पुरस्कार २०६७ पाखें सम्मानित याःगु खः । अथेहे वय्कःयात ‘छुं छुं म्हगस अथें पू मवनेयः’ म्येया निंतिं नेशनल पावर न्यूज म्यूजिक अवार्ड २०१९ (वि.सं २०७६) दकलय् बांलाःगुु म्येया सिरपाः लःल्हाःगु खः । नेवाः पत्रकार राष्ट्रिय दबूपाखें नं च्याक्वःगुु दँमुंज्याया लसताय् वय्कःयात बाबुराजा ज्यापु फोटो पत्रकारिता सिरपाः लःल्हाःगु दु ।