यल लाय्कुलिं हःखा जुनाः तप्यंक वनाः चंकी सःक्वया लँ लिनाः भिन्छेबहाः मथ्यवं लँया सिथय् च्वंगु गणेद्यःया देगः लिउने दुहां वनेवं इन्द्रदेव संस्कारित जयमनोहरवर्ण महाविहार (सौबहाः)य् थ्यनी । थ्व बहाः नं यलया मू बहाः मध्ये छगू खः । थ्व बहाः शमशानभूमिइ निर्माण जुयाच्वंगु दु ।
थुगु बहालय् बहाःया दथुइ शमशान भूमिया रुपय् छकू थाय् त्वःतातःगु दु । थुगु बहालय् दुहां वनेगु थासय् चैत्य निगः दु । थ्व चैत्य न्ह्यःनेया लुखा हे सौबहाःया मूलुखा खः । थन जवंखवं ल्वहंया सिंह निम्ह दु । थनया फलय् तसकं पुलांगु क्वाःपाःद्यःया देगः छगः दु । थ्व देगः नितँजाः यानाः छतँ पौ तयातःगु दु । थुगु देगलं जवपाखे पुलांगु छेँ छखा नं दु । सौबहाःया क्वाःपाःद्यः फलय् वनेगु त्वाथःया जवंखवं ल्वहंया सिंह निम्ह, ध्वाँय् निपु तयातःगु दु । क्वाःपाःद्यःया मूलुखा जवंखवं सारिपुत्र मौदगल्यान भिक्षुपिं तयातःगु दु ।
थुगु बहाःया क्वाःपाःद्यःया रुपय् पश्चिमाभिमुख अक्षोभ्य बुद्ध दु । मूलुखाया च्वय् अक्षोभ्य मूल यानाः जवय् प्रज्ञापारमिता खवय् षड्क्षरी लोकेश्वरया मूर्ति दुगु लीया तोलं छगू दु । तोलनं च्वय् न्यापाः झ्याः व जःखः चिचिपाःगु झ्याः निपाः तयाः उकिया जवय् वैरोचन खवय् अमिताभ बुद्धया मूर्ति दु । थ्वयां च्वय् न्हय्म्ह बुद्धया मूर्ति दु । दकलय् च्वय् खुल्लागु स्वपाः झ्याः दु । आँय्पा पौ दुगु देगलय् खुगः त्वानाःसिँ तयातःगु दु ।
देगःया दकलय् च्वय् स्वंगः चैत्यया गजू छुनातःगु दु । बहाःद्यःया न्ह्यःने स्वंगः चैत्य, शमशान भूमि व धर्मधातुमण्डल छगः दु । सौबहाः इन्द्रदेव जुजुया पालय् दयेकूगु धयागु खँ प्रमाणकथं बहाः लिक्क हितिइ च्वंगु चैत्यय् अंकित ने.सं. १८७ व जःधुंलय् अंकित १८७ या लिच्छविकालीन अभिलेख खः । थनया पुलांगु प्रामाणिक अभिलेख ने.सं. २६२ या तमसुक ताडपत्र खः । मेगु सौबहालय् च्वंगु ने.सं. ६६६ या ताम्रपत्र व ने.सं. ३३८ या ललितपुरमया श्रीमत् इन्दिय संस्कारित श्री जयमनोहरवर्ण सफू ल्ह्यःगुया अभिलेख खः ।
थन न्याम्ह आजुपिं व थनया ६३ म्ह संघपिं मुनाः नित्यकर्म, न्हिकं, गुथि हनेगु, दशमी पुजा, बुसाधं, पञ्चदान, भोजन दान, संघ भोजन आदि थीथी ज्याझ्वः याना वयाच्वंगु दु । थन बहालय् मेथाय् गनं मदुगु कथंया महांकालया पुजा याइबलय् मनुष्य मांसया गुंगू थनेमाःगु परम्परा दु ।