चित्रकार चन्द्रमान सिंह मास्केया जन्म ने.सं. १०२० चिल्लाथ्वः खस्थि, बसुबारखुन्हु येँया वास्याःद्यः (बाङ्गेमुढा)य् अबु बुद्धिमान सिंह मास्के व मां पूर्णकुमारी मास्केया कोखं जूगु खः । चित्रकलाय् स्नातक यानादीम्ह वय्कलं निजामती सेवा, कला, सामाजिक सेवा व प्राध्यापन सेवा नं यानादीगु दु । वय्कलं मूर्ति लिसें वास्तुकला निर्माणया डिजाइन नं यानादीगु दु । वय्कलं दकलय् न्हापां १९८५ सालय् याकः चित्रकला ब्वज्या यानादिल । वय्कःया गद्दी बैठक, नारायणहिति राजदरवार, सिंहदरवार व ग्यालरी बैठकय् चित्रकला नांजाः ।
वय्कःया चित्रकला नेपाः, भारत, रूस, जर्मनी, स्वीट्जरल्याण्ड, यू.के., अमेरिका आदि देशय् बुद्धिजीवी व विशिष्ट व्यक्तितय्सं मुंकातःगु दु । वय्कःयात वि.सं. १९९३ य् त्रिभुवन रजत जयन्ती पदक, वि.सं. १९९४ य् नेपाली उद्योग प्रदर्शनी रजत पदक, वि. सं. २०१० य्, गोरखा दक्षिणबाहु चौथा, २०११ सलय् परोपकार संस्थां ग्वसाः ग्वःगु नेपाल राष्ट्रिय प्रदर्शनी रजत पदक, २०१३ व २०३१ सालय् शुभराज्याभिषेक पदक, २०२३ सालय् इन्द्रराज्यलक्ष्मी प्रज्ञा पुरस्कार, २०३० सालय् त्रिभुवन स्मारक समिति स्वर्ण पदक व २०३९ सालय् सोभियत संघ पदक द्यछाःगु दु । वय्कःयात साहित्यिक पत्रकार संघ– येँपाखें २०४० सालय् अभिनन्दन यानादीगु दु । वय्कः ने.सं. ११०४ दिल्लागाः पुन्हि, सनिबारखुन्हु स्वर्गारोहण जूगु खः ।
Leave a Reply