NewaGyanKosh

बाखंमि लक्ष्मण राजवंशीया झिंखुपु बाखं मुनातःगु सफू खः— झसुकाः । नेपालभाषा एकेडेमिं ने.सं. ११२५ य् पिथंगु थ्व सफूया द्यवः किपा प्रेममान चित्रकारं च्वयादीगु खः । डा. सर्वोत्तम श्रेष्ठया ग्वाहालिं सफू पिथनेफुगु खँ बाखंमिं न्ह्यथनादीगु दु । नेपालभाषा एकेडेमिपाखें चान्सलर सत्यमोहन जोशीं थःगु मन्तुना तयादीगु दु । डा. पुष्पराज राजकर्णिकार व इन्द्र मालीं भूमिका च्वयादीगु दु । भिंतुनाया लिसः, गुज्वःगु ई, दे ला जिगु नं खः, मसां कुं भुनाच्वंगु दे, भ्यगः मैं, छिं स्वयाः, कंझाः, दिनाच्वंगु घडी, जिं छन्त ध्वं लाना, मतिनाया कु, ग्रहणं ज्वंम्ह तिमिला, लेहेँ पुयाच्वंम्ह तिमिला, हःताःया ख्यः, म्वयेद्याःगु ई, तःमुँज्या व समाजया गलः थुकीइ दुगु बाखं खः । इतिहास व वर्तमानय् थीथी पात्रतसें भोगे यायेमाःगु पीडाया चित्रण थुगु सफूया बाखनय् यानातःगु दु ।

झिंच्याफ्वः स्वां अपर्णा प्रधानं च्वयादीगु निबन्ध सफू खः । ने.सं. ११२५ य् पिहांवःगु थ्व सफूया पिकाक ईलोहं प्रकाशन खः । थ्व सफुलिइ सेमाजसेवाय् नांजाःम्ह दयावीरसिंह कंसाकारया जीवनी, साहित्यिक व राजनैतिक संघसंस्थाया परिचयात्मक च्वसु, कविता वा बाखं सफूया समालोचनात्मक च्वसू, मानवअधिकार, सामाजिक परिवेश व संस्कृतिसम्बन्धी यानाः झिंच्यापु च्वसु दुथ्यागु दु ।

झिंछम्ह भाषा सेवी ने.सं ११२२ य् साहित्यया मूलुखापाखें पिदंगु खुम्ह वरिष्ठ भाषा सेवीपिं —फणीद्ररत्न वज्राचार्य, छत्रबहादुर कायष्ठ, माणिकलाल श्रेष्ठ, जनकलाल वैद्य, सूर्यबहादुर पिवाः, रेवती रमाणान्द श्रेष्ठया लिसें न्याम्ह तत्कालिन मेयरपिनिगु जीवनी व योगदानयात संक्षिप्तरुपं च्वयातःगु सफू खः । थ्व सफूया च्वमि भाजु बद्री लाल श्रेष्ठ खः ।

ने.सं. १११५ चौला ल्हुतिपुन्हि कुन्हु नेपालभाषा परिषद्या लुखां पिदंगु थ्व झिपू ह्वनाखँ च्वखँ मुना सफूया च्वमि भाजु रेवति रमणानन्द श्रेष्ठ वैद्य खः । थ्व सफुलिइ च्वमिं झी नेवाःतय्‌गु सांस्कृतिक व उगु इलय्‌या मिसातय्‌गु फेशन, धार्मिक व सामाजिक ज्याखँ नाप स्वापू दुगु झिपु च्वखँ दुथ्याकादीगु दु ।

झी नेवाः छगू बःचाधंगु सफूचा खःसां थ्व सफुलिइ नेवाःतय्‌सं थःत बांलाक म्हसीकाः नेवाः पहः, नेवाः संस्कृति, नेवाः प्रतिभा, नेवाः कलाकौशल, नेवाः समाज व सभ्यतायात बांलाक थुइकेत बःबियातःगु दु । मंकाः पिथनाया लुखां पिदंगु थ्व सफूया च्वमि भाजु मल्ल के सुन्दर खः ।

नेपालभाषा विकास मण्डलपाखें पिदंगु झी बाखं मुना सफू झी पत्रिकाया बाखं विशेषांक खः । झी पत्रिका पिदनाः दच्छि लिपा ने.सं. १०७८ य् थुगु बाखं सफू पिदंगु खः । थुकिया सम्पादक मण्डलय् मोहन नारायण श्रेष्ठ, विष्णु बहादुर श्रेष्ठ, विष्णु हरि ‘परदेशी’, हेमवज्र बज्राचार्य दी । पुण्यरत्न वज्राचार्यया बाह्राख्याः, विष्णुहरि परदेशीया कांकांपिचा, परमानन्द बज्राचार्यया खुँ म्हसिल, सी.बी. रमणया कूताः, प्रेम बहादुर कसाःया गय् थें मस्यू, श्याम सुन्दर सैंजुया वने धुंकाः, पूर्ण पथिकया मानव, गम्भीरमान माय्केँया निम्ह मचा, विष्णु बहादुर श्रेष्ठया वसः, रे.र.न. स्यस्यःया निभाः व तीर्थलाल नःघःभनीया मती हे मवं नापं यानाः झिंछपु बाखं थुकी दु । थुकी पारिवारिक सामाजिक कथंया बाखं दु ।