ने.सं. १०९३ य् जन्म जूम्ह दिव्या बज्राचार्य नेपालभाषाया बाखं तथा उपन्यास विधाय् च्वसा न्ह्याकूम्ह छम्ह न्हू प्रतिभा खः । थ्वय्कः मां मोतिमाया व बा महन्तबज्र बज्राचार्यया म्ह्याय् मय्जु खः । थ्वय्कःया च्वसा चिनाखँ व हाइकु विधाय् नं न्ह्याःगु दु । थ्वय्कःया बाखं उपन्यासया विषय मूलभूत मिसापिंत जुइगु लैंगिक विभेद, यौन शोषण जूगु दु । अथेहे मिसापिंत जुइगु हिंसा, अन्याय, अत्याचारया विरोधय् मिसा पात्रतपाखें सः थ्वयेकेगु, प्रतिकार याकेगु थ्वय्कःया बाखं, चीबाखंया विशेषता खः । त्रास शीर्षकया बाखं धेंधेंबल्ला कासाय् थ्वय्कः मिसा च्वमिपाखे उत्कृष्ट जुयादीगु खः । थ्वय्कलं नेपालभाषा साहित्य धुकुतिइ मय्जु (ने.सं. ११४१) नांगु उपन्यास दुतिना दीधुंकूगु दु ।