बा केशवनारायण भुजु व मां उमादेवी भुजुया कोखं ने.सं. १०७८ य् उमाकुञ्ज ख्वपय् साहित्यकार दिनेश भुजुया जन्म जूगु खः । वय्कःया पूवंगु नां दिनेशराज भुजु खः । वय्कः विज्ञानया विद्यार्थी खयाः नं थःगु मांभाय् नेपालभाषा लेखन पाखें नुगःक्वसाःम्ह व्यक्तित्व खः । थ्वहे कथं वय्कलं विज्ञान विषयया आपालं च्वसु नापं नेपालभाषाया चिनाखँ, प्याखं च्वयादीगु दु । नेपालभाषाय् वय्कःया न्हापांगु च्वसु लालीगुराँस ब्याक्कं ह्वयेगु न्हू कुलां (नसंचा, नेसं. १०८९) नांगु चिनाखँ खः । थःगु साहित्यिक पलाः चिनाखँपाखें न्ह्याकादीगु खःसां वय्कःयात नेपालभाषाया साहित्य ख्यलय् छम्ह छधाः प्याखंच्वमि कथं म्हसीकेगु याः । अझ छधाः प्याखं ख्यलय् नं वय्कःयात प्रगतिवादया सः व आधुनिक बिचाः धाःयात समन्वय यानाः प्याखं च्वइम्ह आधुनिक नाटककार कथं म्हसीकेगु याः ।
नाटककार दिनेश भुजु शोषित, पीडित जनताया पं लिनाः उमिगु हकहीतया निंतिं थौंया राजनैतिक, सामाजिक, आर्थिक, क्षेत्रय् ब्वलनाच्वंगु विकृति विसंगति अन्याः अत्याःया विरुद्धय् प्रतिकार यायेगु सन्देश बियादीम्ह प्रगतिवादी प्याखं च्वमि खः । वय्कःया ने.सं. ११०३ य् बायावंगु लँपु नांगु छधाः प्याखं संग्रह पिदंगु दु, गुगु सफूयात च्वासापासां ने.सं. ११०४ य् श्रेष्ठ सिरपाः देछाःगु दु । भाजु दिनेश भुजुया भाय्हिलाःपाखे नं उतिकं हे ल्हाः च्वः । वय्कलं भाय्हिलाः च्वयादीगु प्याखं कथि जूम्ह मनू ने.सं. ११०९ य् पिदंगु दु । थौंकन्हय् वय्कः नेपालभाषा एकेडेमिया प्राज्ञ नं खः ।