भाजु तुल्सीनारायाण श्रेष्ठया जन्म ने.सं.१०५९ आषाढशुक्ल ११ कुन्हु यलय् जूगु खः । वय्कःया मांया नां भूवनमाया श्रेष्ठ व बाःया नां डम्बरबहादुर श्रेष्ठ खः ।
त्रि.वि.विं एम.वि.वि.एस यानादीम्ह वय्कलं अप्वः यानाः स्वास्थ्यसम्बन्धि निबन्ध च्वयेगु यानादी । अथेहे प्याखं, चिबाखं व उपन्यास नं च्वयादी । वय्कःया न्हापांगु च्वसु विश्वभूमि न्हिपतिइ पिदंगु खः । वय्कःया पिदंगु कृति थुकथं खः – ग्वालि (दबू प्याखं, २०१७), शान्ति (चिबाखं, खसभाषं २०४८), देवी (उपन्यास, २०५०), प्रतिज्ञा (उपन्यास, ने.सं.११२९), मुनास्वां (स्वास्थ्य सम्बन्धी च्वसु मुना ने.सं.११४१) ।
डा. तुल्सीनारायण श्रेष्ठयात धर्मादित्य धर्माचार्य सिरपाः देछाये धुंकूगु दु । अथेहे वय्कःयात थीथी संघ संस्थापाखें सम्मानपत्र, प्रशंसापत्र व तकमा देछाःगु दु ।