कपिलवस्तुस भगवान नांदंम्ह नाटककार ज्ञानकाजी मानन्धरं च्वयादीगु न्यागू लू दुगु पुधाः प्याखं खः । ने.सं ११२७ नेपालभाषा एकेडेमि पाखें पिदंगु थ्व प्याखं च्वमिया धापू कथं महाकवि चित्तधर हृदयया सुगत सौरभ महाकाव्यया लिधंसाय् च्वयादीगु प्याखं खः । न्यागू लुइ न्ह्यब्वयातःगु थ्व प्याखं सिद्धार्थ गौतमं बोधिज्ञान प्राप्त यानाः भगवान बुद्धया रुपय् भिक्षुगणसहित थःगु कपिलवस्तु राज्यय् बिज्याःगु घटनां निसें शुरु जूगु खः । थ्व प्याखनय् राजकुमार राहुलं थः अबु भगवान बुद्धयाके जिगु अंश बियादिसँ धकाः गुगु फ्वंवनीगु दृश्य ब्वयातःगु तसकं मार्मिक व हृदयस्पर्शी लु दु ।