भाजु किरण साय्मिया पूवंगु नां किरण कुमार मानन्धर खः । वय्कःया मांया नां न्हुछेमाया मानन्धर व बाःया नां कृष्णदास मानन्धर खः । वय्कःया जन्म ने.सं.१०७६ श्रावण शुक्लपक्ष द्वादशी कुन्हु जूगु खः ।
परोपकार पत्रिकाय् बि.सं. २०२८ स पिदंगु परोपकार नांया कविता वय्कःया न्हापां प्रकाशित रचना खः । नेपालभाषाय् बिशेष यानाः म्येँ च्वयेगु व म्ये हालेगुलिइ वय्कः सक्रिय । वय्कलं कविता नं च्वयादी । वय्कलं च्वयादीगु म्ये थीथी पत्रपत्रिकाय् पिदना च्वं । वय्कः झी झी थ्वः कालिमाति पाखें प्रकाशित जुइगु तय्जु पत्रिकाया दुजः खः । अले झीझी थ्वः संस्थाया छ्यान्जे नं खः । वय्कः नेपालभाषा मंकाः खलः येँया ग्वाहालि पुचःया दुजः नं खः ।
वय्कः नेपालभाषा उत्थानया ज्याय् सक्रियम्ह अभियन्ता खः । बि.सं.२०४२ सालय् जूगु आम चुनावय् नेपालभाषा मंकाः खलःया नायः भाजु पद्मरत्न तुलाधरं पंचायतया दुने पंचायत विरोधी उम्मेदवार जुयाः बसन्तपुली बियादीगु कालजयी भाषणया रेकर्ड यानाः देय्न्यंक न्यंकादीम्ह व्यक्तित्व नं थ्वय्कः खः ।