न्हापा न्हापा तस्वाःगु भट्टाय् सु, सिँ व पत्थर कोइला छ्यलाः अप्पा उइगु खः । तर आः धाःसा अगलय् सिँ दुयाः न्ह्यःने ल्यूने आधुनिक फ्यान चाःहीकाः म्हो सिँ जक छ्यलाः छक्वलं यक्व अप्पा बुकेगु याइ। भट्टा गालय् वा तँलासय् तयाः अप्पा पँपँ चिनी । उकियात मिप्वाः तयाः मि पिहां वने जीगु कथं पँचिनी । भट्टाया न्ह्यःनं मि तयाः सिँ दुइ न्ह्यव द्यःने राय्फिस वा अप्पा चुं फायेकी । गनं गनं मिं मथीगु छताजिया फांगा छ्यलेगु चलन दु । उकियात नं प्रयोगय् हयेगु चलन वःगु दु । कुँ वनीगु प्वाः प्वाः तयाः थ्व नौ फायेकेगु ज्या क्वचायेवं अप्पा भट्टाय् मि तइ । न्ह्यःने मि तयेगु प्वाः तःप्वाः जुइ ।
भट्टाया साइज स्वयाः निन्हु प्यन्हुतक सिँ दुया च्वनेमाः । थ्व इलय् हे फाइन चले यानाः न्ह्यःनं भट्टायागु प्वाः पतिकं मि थ्यंकेगु कुतः जुयाच्वनी । अथे हे ल्यूनं मि वा कुँ सालीगु कथं मेगु मेसीन छ्यलाः याकनं मि न्यंकेत स्वइ । फुक्कं अप्पाय् मि न्यनावंगु सीदयेवं मि दुह्वायेगु बन्द याइ ।
च्यान्हुनिसें झिन्हुतक अथें मि मदुसें अप्पा ख्वाउँकेत तयातइ । मि सीगु संकेत दयाःलिं नं प्यन्हु न्यान्हुतक छुं मयासें तइ । वयां लिपा द्यःनेच्वंगु फायेकातःगु धू, राय्फिस वा फांगा चिकाछ्वइ । अप्पा ख्वाउँगु व बूगु खनेदयेवं छसिकथं अगलं अप्पा यंकाः सुरक्षित थासय् पँतने यंकी । थ्व दाछि अप्पा उयेगु प्रक्रिया खः । डाय्स वा फर्मां अप्पा पिकायेगुनिसें भट्टां दाछि अप्पा बुकाः लिकायेगु ईतक पाय्छि नीच्यान्हुनिसें लच्छितक ई काइ ।
ह्यंग्वाः, चाह्यंग्वाः च्याकाः नसात्वँसा बुकेगु थाय् ।