मय्जु अर्चना शाक्यया जन्म ने.सं. १०९९ सिल्लागा त्रयोदशी कुन्हु पाल्पाय् जूगु खः । वय्कःया मांया नां मायादेवी शाक्य व बाःया नां छत्रराज शाक्य खः । वय्कलं बिशेष यानाः नेपालभाषाय् बाखं, उपन्यास व ख्यालि च्वयादी । वय्कःया न्हापां पिदंगु बाखं व न्हिलाख्वाःम्ह मनू खः । थ्व बाखं ने.सं ११३२ य् बाखं दबू पत्रिकाय् पिदंगु खः । वय्कःया खस् नेपाली भाषाय् संस्कृति व बुद्धधर्म बिषयय् अपालं च्वसू पिदंगु दु । स्वनिगलं पिनेयाम्ह नेपालभाषा च्वमि नारी हस्ताक्षर मय्जु अर्चना शाक्यया प्रकाशित कृति– ख्वबि व लायलामा (उपन्यास, ने.सं. ११४१) खः ।
प्राध्यापन पेशा यानादीम्ह वय्कलं मुक्तिनाथ एफ एम, तानसेन पाल्पां नेपालभाषं बुखँ ब्वनेगु नं यानादी । मय्जु अर्चना शाक्य पासा खलः पाल्पाया छ्यान्जे व मिसा साहित्यकार मुना, येँया दुजः नं जुयादी । वय्कः करुणा बौद्ध संघ, भिक्षु शाक्यानन्द स्मुति गुथि, विपश्यना ध्यान समूह, पाल्पा सम्पदा समूह, सम्पदा प्रतिष्ठानय् आवद्ध जुयादी । लुम्बिनी वाङ्गमय प्रतिष्ठान, लुम्बिनी प्रदेश पाखें मय्जु अर्चना शाक्ययात लुम्बिनी नेपाल भाषा रत्न सम्मान २०८० सम्मान याःगु जुल । अथेहे नारी साहित्य तथा सांस्कृतिक प्रतिष्ठान, बौद्ध महिला आजिवन दायक समिति, पासा खलः पाल्पा पाखें नं वय्कः सम्मानित जुयादीगु दु ।
अर्णेश्वरी शिल्पकार लोकंह्वाःम्ह कलाकार खः । वय्कः अबु ज्ञानमान श्रेष्ठ व मां केशरी श्रेष्ठया कोखं ने.सं. १०९३ चौलाथ्वः एकादसि, सुक्रबारखुन्हु ख्वपय् बूगु खः । ने.सं. १११० दँंनिसें संकिपा, ख्यालः, रेडियो नाटक, दबू प्याखं, म्यूजिक भिडियो लिसेंया ख्यलय् अभिनय यानावया च्वनादीम्ह खः । वय्कः ‘आयाँ क्वात’, ‘मिस्कट’, ‘भरियातन्त्र’, ‘छु माल ?’ लिसेंया झिगूति ख्यालकय् म्हितादीगु दु । अथे हे ‘झ्वकमनीम्ह’, ‘न्हिसुतु’, ‘तंबैंक’, ‘ख्वताबजि’, ‘डाय्ड सन् व मम्’ नापं यानाः झिंस्वगू टेलिप्याखनय् वय्कः म्हितादीगु दुसा ‘मिखा दुम्ह कां’, ‘जिगु मिखाया न्ह्यःने’, ‘तानांज्यः’, ‘पटाचारा’, ‘ट्याम्पु डाइभर’, ‘तुयूमति नापं यानाः सुइगूति संकिपा म्हिता दीधुंकूगु दु । ख्यालिगुलु गुथि व रामशेखर लुमन्ति दबूलिसे आवद्धम्ह वय्कलं ने.सं.१११४ य् पलिस्था ख्यालः कासा व नेपालभाषा साहित्य तःमुंज्याय् उत्कृष्ट कलाकारया सिरपाः त्याकादीगु दु । थुकिया लिसें मेगु तःगू सिरपाः व सम्मानपाखें सम्मानित जुयादीगु दु ।
व्यंग्य चित्रकार अविन्द्रमान श्रेष्ठ ‘अविन’या जन्म ने.सं. १०९२ चिल्लागाः चःह्रे, मंगलबारखुन्हु सामाखुसिइ अबु गोविन्दमान श्रेष्ठ व मां शारदा श्रेष्ठया कोखं जूगु खः । देय्या नांजाःम्ह कार्टुनिष्ट अविनं नेपालभाषाया न्हिपौ विश्वभूमि, सन्ध्या टाइम्स लगायत कान्तिपुर, गोरखापत्र, नेपाल टाइम्स, नेपाल जागरण, योंग हेराल्ड, कनेक्सन, नेपाल जागरण, हिमालय टाइम्स, राजधानी, दृष्टि आदि पत्रिकाय् थःगु कार्टुन कला न्ह्यब्वयाः देशय् खनेदयाच्वंगु थीथी विकृति, विसंगतियात व्यंग्य यानादीगु दु ।
वय्कलं वि.सं. २०५२ सालय् लोगो व मास्टरहेड धेंधेंबल्लाखय् न्हाप सिरपाः, वि.सं. २०५३ य् राष्ट्रिय मञ्चं याःगु व्यंग्यचित्र धेंधेंबल्लाखय् न्हाप सिरपाः, हास्यंब्यंग समाज नेपाल व नेपाल राजकीय प्रज्ञा प्रतिष्ठानं याःगु व्यंग्य चित्र धेंधेंबल्लाखय् ल्यू सिरपाः त्याकादीगु दु ।