मां रत्नकुमारी व अबु हिरारत्न बज्राचार्यया तःधिकःम्ह काय्या रुपय् ने.सं. १०५० कौलागाः दुतिया, बसुबारखुन्हु रत्नकीर्ति महाविहार, मखंबहालय् वय्कःया जन्म जूगु खः । सामान्य शिक्षा कयाः सरकारी जागिर नयाच्वंम्ह थ्वय्कःया मू लजगाः धयागु बज्रयानी परम्पराकथं जजमानि पुजाआजा हे जुल । थ्वय्कः ११ दँ दुबलय्निसें वज्रयानीया मूवंगु पुजा छत्रिसात्मक, सिन्दूरात्मक चक्रपुजा आदि सम्बन्धी द्यःपिं जुयाः चर्यानृत्य यानाः थःगु नृत्यकला ब्वयादीगु जुल । थ्वय्कः बज्रयानी परम्परागत दीक्षा व चर्यामेया नं गुरु खः । रत्नकीर्ति महाविहारया तुतःगुथि अन्तर्गतया क्वताखिं (पञ्चताल बाजा) बाजाया छम्ह गुरु नं खः । थ्वय्कःया नेतृत्वय् विहारय् गुंला लच्छियंकं व इलय् ब्यलय् तुतः (स्तोत्रपाठ)या ज्याय् नेतृत्व यानादी । वय्कःया सःया थें ज्याःगु मिथास झिंच्यागू विहारय् सुयां नं मदु धाइ ।
मणिसिंह महाविहार संरक्षण तथा सुधार समितिया ग्वसालय् चर्या गीत स्यनेगु ज्याय् प्रशिक्षक जुयाः प्रशिक्षित यानाबिज्यात । वय्कलं चर्यामे स्यनेज्याया निंतिं थीथी सम्मान व कदरपत्र कयादीगु दु । २०५१ सालय् महासम्बर चक्रपुजाय् सम्मानित जुयादिलसा वि.सं. २०५३ सालं बज्राचार्य संरक्षण गुथिपाखें चर्यागीत प्रशिक्षणया ज्या ताःलाका दीगुलिं वहःया चुल्या न्ह्याकाः सम्मानित यात । वि.सं. २०५६ सालय् मणिसिंह महाविहारय् जूगु चर्यागीत प्रशिक्षण पूवंकूगुलिं वहःया बेतालि, चुल्या, दोसल्ला लःल्हानाः हनेज्या जुल ।