बिसं १९९४ दँय् आल्क्वय् अबु आनन्दज्योति वज्राचार्य व मां चिनिमाया बज्राचार्यया कोखं जन्म जूम्ह कान्छा गुरुजु ‘अकेला’ छम्ह अतिकं सक्रियम्ह कलाकार खः । वय्कः उगु इलय् खःप्याखं व थीथी संस्थां ग्वसाः ग्वइगु सांस्कृतिक ज्याझ्वलय् म्ये हालाः व थःगु संगीतं जायेकाः मेमेपिं कलाकारतय्त हाय्के बियाः ज्वः मदुगु प्रतिभा न्ह्यब्वया च्वंम्ह छम्ह होनहार कलाकार खः । थ्वय्कःया योगरत्न शाक्यं च्वयादीगु, थम्हं हे लय् चिनादीगु व सूरजवीर बज्राचार्यं हालादीगु ‘बर्से जु बर्सात सुपाँय् छ, घनघोरं छ बर्से जु’ बोलया म्ये लोकं ह्वाः ।
थ्वय्कलं ब्वाला क्लबया ग्वसालय् लय्लय्पत्तिकं त्वाःत्वालय् ने.सं. ११०० दँया दुने जूगु यल नेपालभाषा साहित्य संगीत मुंज्याय् सःपाखे न्हाप सिरपाः त्याकादीगु दु । थ्वय्कः बि.सं. २०६३ दँय् मन्त ।
स्व. कान्छा शाक्यया उप नां कान्छा खः । वय्कः धातु मूर्तिकलाया कतांज्याय् छम्ह ज्वः मदुम्ह कलाकार खः । वय्कः ने.सं. १०४८ जेष्ठय् येँ, इतुम्बहालय् जन्म जूगु खः । वय्कःया अबुजु स्व. दानरत्न शाक्य खःसा दाजुु स्व. मोतीकाजी शाक्यया प्रेरणाकथं ने.सं. १०६८ स कलाकारिता ख्यलय् ज्या न्ह्याकादीगु खः । वय्कःया कलाया बिषेशता धयागु लुँ, वहः, सिजः, लीया मूर्तिइ कतां कियेगु व थी थी कासाया निंतिं सिल्ड, मेडल दयेकेगु खः । कला ब्वज्या— नेपाल हस्तकला प्रदर्शनी । न्ह्यथने बहःगु कृति— १) श्री ५ वीरेन्द्र व रानी ऐश्वर्यया वहःया थःकयाः फ्रेम तस्वीर निर्माण । २) थी थी लु लुइकाः तस्वीर फ्रेम निर्माण । आइ.जि.पि. फुटवल खेलया शिल्ड निर्माण ।
बौ जितबहादुर बज्राचार्य व मां हेरामाया बज्राचार्यया कोखं वि.सं. १९७२ माघय् येँया त्यौड त्वाः, तुं बहालय् चर्यागुरु कान्छाबुद्ध बज्राचार्यया जन्म जूगु खः । चर्या नृत्य व संगीत क्षेत्रय् जीवन पानादीम्ह वय्कः वि.सं. २००९ सालय् सांस्कृतिक संस्थान नाचघरय् नृत्य निर्देशक जुयादीगु खः । अनं लिपा वि.सं. २०२६ सालय् नेपाल प्रज्ञा प्रतिष्ठानय् नृत्य निर्देशक जुयादिल । थ्वयां न्ह्यः वय्कलं वि.सं. २००८ सालय् रेडियो नेपालय् ज्या यानादीगु खः । वय्कलं नाराहिटी राजदरवार व सैनिक क्याम्पाय् नं प्याखं व संगीत स्यनादीगु दु ।
वय्कलं ज्ञानमाला भजनय् नं आपालं संगीत सिर्जना यानादीगु खः । छगू इलय् लोप जुया वनेत्यंगु चर्या प्याखंयात पिने जनमानसय् हयाः देश व विदेशय् तकं क्यनेत ताःलाःम्ह वय्कःयात थीथी पदक, सम्मान व कदरपत्र लःल्हाःगु दु । शुभराज्याभिषेक पदक (वि.सं. २०३१), इन्द्रराज्यलक्ष्मी पुरस्कार (वि.सं. २०४६), सांस्कृतिक संस्थान ८ औं राष्ट्रिय सांस्कृतिक महोत्सव कदरपत्र (वि.सं. २०४६), साधना सम्मान (वि.सं.२०५२), रेडियो नेपाल सम्मान आदिपाखें वय्कःयात सम्मानित यायेधुंकूगु दु । जीवंकाःछि चर्या नृत्य व संगीतय् ज्या यानादीम्ह वय्कः वि.सं.२०५६ असोज १५ गते ८५ दँया वैशय् स्वर्गवास जुयादिल ।