चित्रकलाकार कृष्णबहादुर चित्रकारया जन्म ने.सं. १०३३ सिल्लाथ्वः एकादसि, सोमबारखुन्हु येँय् अबु तुलसि बहादुर चित्रकार व मां बुरुमाया चित्रकारया कोखं जूगु खः । च्वय्ब्वने सःम्ह वय्कलं राणाकालय् दरवारय् अङ्गलय् चित्र च्वयेगु, जुजुपिनिगु व्यक्तिगत चित्र च्वयेगु लिसें फोटोग्राफी आदि विषयय् ताःईतक ज्या यानादिल । वय्कः चित्रकारतय्गु नायः जुयाः नं ज्या यानादिल । परम्परागत चित्रकारी पेशाय् मदिक्क ७० दँतक ज्या यानादीम्ह वय्कलं पुंज्या, पौभाः च्वयेगु लिसें समसामयिक चित्रकलाय् लः रङ्ग, चिकं रङ्गया व्यक्तिचित्र, दृश्यचित्र, यक्व मूर्त चित्रकला, फोटोग्राफीया माध्यमं कलाकृतिया सिर्जना यानादीगु दु । वय्कःया ज्यायात कदर यासें २०५४ सालय् चन्द्र अमर सिरपाः द्यछाःगु खः । अथे हे पुं समाजं नं वय्कःयात सम्मान याःगु दु । वय्कःया स्वर्गारोहण ने.सं. १११९ यंलाथ्वः द्वादसि, बुधबारखुन्हु जूगु खः ।