यल मंगलबजारं नुगः लुँहिति मथ्यवं जवरिखे वनेवं गल्लि दुने गुजिबहाः दु । थुकियात दिव्यदिवाकर संस्कारित श्रीवैशवर्ण महाविहार नं धाइ । मूलुखाया दुने निखेरं निगू फल्चा दुथाय् दुने चकंगु बहाः दु । दुने उत्तर स्वःगु स्वतँजाःगु छतँ पौया देगः स्थापना यानातःगु दु । दुने अक्षोभ्य बुद्ध क्वाःपाःद्यः दु । देगःया जःखः निम्ह सिंह दु ।
कलात्मक मूलुखाया फुसय् मञ्जुश्री लिसे थीथी द्यःपिं दुगु तोरण दु । लुखाया जवय् खवय् सारिपुत्र व मौदगल्यानया मूर्ति दु । न्हापांगु तल्लाय् दथुइ न्यापाः झ्याः दु अले झ्याः फुसय् बज्रसत्व दुगु तोरण तयातःगु दु । वयां च्वय् पञ्चबुद्ध व तारापिनिगु मूर्ति दु । वयां नं च्वय् गुम्ह बोधिसत्वपिनिगु चित्र दु । वयां च्वय् स्वपाःझ्याः तयाः दथुइ दथुइ नामसंगीतिया मूर्ति तयातःगु दु । च्वय् पञ्चबुद्ध व महाबज्रसत्वया त्वानाःसिँ तयाः पौ दिकातःगु दु । पल्लिइ स्वंगः चैत्य आकारया गजू दु । अले गजूनिसें क्वय्् तक पताः ब्वयेकातःगु दु ।
क्वाःपाःद्यःया देगः न्ह्यःने यज्ञशाला, वज्र व स्वंगः चैत्य व तग्वःगु माने छगः स्थापना यानातःगु दु । दक्षिणपाखे दिगि दु, अन त्रैलोक्यविजय, हेवज्र नैरात्मा आदि द्यःपिं दुगु आगं दु । हानं उत्तर कुनय् च्वंगु लुखाय् नामसंगीति, गणेश व महांकाल दुगु तोरण तयातःगु दु । पूर्वपाखे च्वंगु लुखाय् मञ्जुश्री, प्रज्ञापारमिता व षडक्षरी लोकेश्वरया मूर्ति दुगु तोरण द । दुने छेलिइ अमोघपाश लोकेश्वर, पद्मपाणी लोकेश्वर व तारा स्थापना यानातःगु दु ।
अथे हे थन बहालय् चण्डमहारोषण, सरस्वती, विश्वकर्मा नासःद्यः, हेवज्रया मूर्ति दु । थुगु विहारय् महायान गुम्बा नं स्थापना यानातःगु दु । विहारया स्थापना लिच्छविकालय् जूगु अनुमान यानातःगु दु । थनया पुलांगु बहाः मिंनयेवं ने.सं. १य् वैश्रदेवं न्हूगु
देगः दयेकाबिउगु धइगु उक्ति दु । थबलय् थन ल्वहंयाम्ह अक्षोभ्य स्थापना यानाः कायपिन्त चूडाकर्म नं याकल । न.ेसं. ३७३या अभिलेखय् थ्व विहारया नां उल्लेख जुयाच्वंगु दु । थन झिम्ह आजुपिं दुसा संघसंख्या १९४ दु । उमिसं थन नियमित कथं नामसंगीति पाठ, द्यः खेचायेकेगु, पुजापाठ यायेगु, पुजा फयेगु व आरती यायेगु आदि ज्या यानाच्वंगु दु । अथे हे संघया दुजःतय् कायमस्तय्त बन्दे लुइगु, संघयापिं आजु तँय् थ्यनीबलय् नायः लुइगु, पञ्चथकालि लुइगु, थपा आजु तँय् थ्यनकि थपाः त्वयेगु आदि ज्या न्ह्याकावयाच्वंगु दु ।