ललितकलाकःमि गेहेन्द्रमान अमात्यया जन्म ने.सं. १०५६ गुंलाथ्वः पुन्हि, सोमबारखुन्हु येँया खेचापुखुलिइ अबु मोदमान अमात्य व मां हिरापिया अमात्यया कोखं जूगु खः । वाणिज्य शास्त्रय् स्नातक यानादीम्ह वय्कः निजामती सेवा व कलाकौशलय् नं नांजाः । वय्कलं नेपालय् दकलय् न्हापां वि.सं. २०१२ सालय् आधुनिक कला ब्वज्या यानादीगु खः । वय्कलं चित्रकारितालिसें झिद्वलं मयाक पोष्टर, आवरण, लोगो, होर्डिङ्ग, स्लाइड, चित्र डिजाइन यानादीगु दु । वय्कलं वि.सं. २०१८ सालय् मोडर्न आर्ट, २०२१ सालय् नेपाल, २०५३ सालय् म र मेरो कला, २०५५ सालय रेलिजिअस लाइफ इन नेपाल (प्यंगू ब्वतक), २०६१ सालय् आधुनिक कला, २०६२ सालय् अमूर्त कला व अभिव्यक्ति र टिप्पणी सफू च्वयाः पिथना दीगु दुसा चित्रकला व संस्कृति सम्बन्धी पत्रिका नं सम्पादन यानादीगु दु । वि.सं. २००९ य् नयाँदिल्लीइ जूगु बालकला प्रतियोगिताय् वय्कलं न्हाप सिरपाः, वि.सं. २०२२ य् प्रथम राष्ट्रिय कला प्रदर्शनीइ हःपाः सिरपाः त्याकादीगु दु । वय्कःयात शुभराज्याभिषेक पदक, २०३३ य् जनपद सेवा पदक, २०४१ सालय् गोरखा दक्षिणबाहु, २०४४ सालय् सार्क पदक व २०४५ सालय् दीर्घ सेवा पदक नं द्यछाःगु दु । वय्कःयात २० गू स्वयां अप्वः संघ संस्थापाखें प्रशंसापत्र द्यछानाः अभिनन्दन याःगु दु ।