बागलुङ्गया भाजु पशुपति श्रेष्ठ व मय्जु चन्द्रकुमारीया काय्मचा तेजकुमार सन् १९४२ स बूगु खः । सन् १९७६ स त्रिभुवन विश्वविद्यालयपाखें विद्यावारिधि उपाधि कयादिल । वन्यजीवतय् ब्यवहार सम्बन्धय् विशेष शोध यानादीम्ह थ्वय्कः नेपालय् दुपिं डल्फिनतय् सम्बन्धय् दुग्यंक अध्ययन यानावयाच्वंम्ह खः । वय्कलं नेपालय् वन्यजन्तु समाज, झङ्गःपंक्षी अवलोकन क्लब थुज्वःगु संस्थाया संस्थापकया नापनापं अन्तरराष्ट्रिय स्तरया आपालं मान, सम्मान व पदक नं कयातःगु दु ।
चित्रकलाकार तेजबहादुर चित्रकारया जन्म ने.सं. १०१८ कौलाथ्वः नःमि, आइतबारखुन्हु यलया सौगः त्वालय् अबु शिवदास चित्रकार व मां आशामती चित्रकारया कोखं जूगु खः । पेन्टिङ्गय् गवर्मेन्ट डिप्लोमा यानादीम्ह वय्कः कलाकार, अध्यापक व कलाशिक्षक नं खः । वय्कः पश्चिमेली यथार्थवादी शैलीया आधुनिक नेपाली कलाया न्हापांम्ह प्रवर्तक खः । वय्कः नेपाःया पोट्रेट (ख्वाःपाः जक) चित्रया जन्मदाता नं खः ।
थ्यं मथ्यं ५० दँतक मदिक्क चित्र च्वयेगु झ्वलय् नेपाली कलाचित्रय् ल्याःखाये मफयेक न्हूगु आयामया अभ्यास नं यानादीगु दु । वय्कःया चित्रकला जर्मन, डेनमार्क, अमेरिका, जापान आदि देशय् संग्रहित जुयाच्वंगु दु । वय्कःया चित्रकलाया कदर यासें २०१३ सालय् शुभराज्याभिषेक पदक लःल्हाःगु खः । अथे हे २००८ सालय् ललितपुर रक्षा मण्डल, २०११ सालय् नेपाल राष्ट्रिय प्रदर्शनी, २०१३ सालय् नेपाल कला समितिं वय्कःयात सम्मान लःल्हाःगु खः ।